އަންހެނުންގެ ދުވަސް: ކިހާދޫގެ އިކޯ ސެންޓްރޯ މިއަދު ހިންގީ އެ ރަށު އަންހެނުން
ބައިނަލްއަގްވާމީ އަންހެނުންގެ ދުވަސް ފާހަގަކުރުމުގެ ގޮތުން ބ.ކިހާދޫގެ އަންހެނުން އެރަށު އީކޯ ސެންޓްރޯ ހިންގުމާ ހަވާލުވެއްޖެއެވެ.
މިގޮތުން އީކޯ ސެންޓްރޯގެ މެނޭޖްމަންޓާއި، އޮޕަރޭޝަންސްގެ ހުރިހާ މަސައްކަތެއް މި ދުވަހު ކުރިއަށް ގެންދިޔައީ ކިހާދޫގެ އަންހެނުންނެވެ. މީގެ އިތުރުން އަންހެނުންގެ ދުވަހުގެ މުނާސަބަތުގައި ބައިވެރިވުމަށް ދަރަވަންދޫ، ދޮންފަނު، ކަމަދޫ، ކުޑަރިކިލު އަދި ކެންދޫގެ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއި ކައުންސިލް މެންބަރުން ވެސް ކިހާދޫއަށް ވަޑައިގެންނެވިއެވެ.
ކިހާދޫގެ 26 ޒީރޯ ވޭސްޓް ޗެމްޕިއަނުން އިންތިޒާމުކޮށްގެން ކުރިއަށް ގެންދިޔަ މި ހަރަކާތުގެ މަގުސަދަކީ ހައުސް ހޯލްޑް ވޭސްޓް ސެގްރެގޭޝަން ނުވަތަ ގޭބީސީތަކުގައި ކުނި ވަކިކުރާނެ ގޮތާއި، ހަރުދަނާ ގޮތެއްގައި ކުނި މެނޭޖްކުރުމާއި، ޕްރޮފެޝަނަލް ވޭސްޓް މެނޭޖްމަންޓްގެ ކެރިއަރއަކަށް ޝައުގުވެރިވާ އަންހެނުންނަށް މިމަސައްކަތް ތަޖުރިބާ ކުރުމުގެ ފުރުސަތު ފަހިކޮށްދިނުމެވެ.
ސޮނޭވާ ނަމޫނާގެ އެއްބާރުލުމާ އެކު ހަދާފައިވާ އެ ރަށުގެ އީކޯ ސެންޓްރޯއަކީ ކުނި ޕްރޮސެސް ކުރުމަށް ވަރަށް ފުރިހަމައަށް އިންތިޒާމުކުރެވި، ކުނި މެނޭޖްކުރުމަށް ބޭނުންވާނެ މެޝިނަރީއާ އެއްކޮށް ތައްޔާރުކުރެވިފައިވާ ކުނި މެނޭޖްކުރާ ސެންޓަރެކެވެ. މިގޮތުން ކުނި ކޮމްޕެކްޓް ކުރާ މެޝިނާއި މޯބައިލް ގްލާސް ކްރަޝަރސްގެ އެހީގައި ކުނިން ނަގައި ޖާގަ ދިހަ ގުނައަށް ކުޑަކޮށްދީ ކުނި މެނޭޖްކުރުމުގައި އެހީތެރިވެދެއެވެ.
މިހަރަކާތް ރޭވި 26 ޒީރޯ ވޭސްޓް ޗެމްޕިއަނުންނަކީ ދެމެހެއްޓެނިވި ގޮތެއްގައި ކުނި މެނޭޖްކުރުމަށް ހޭލުންތެރިކަން އިތުރު ކުރުމުގެ ގޮތުން ކިހާދޫގައި ތަފާތު އިވެންޓްތައް ރާވައި ކުރިއަށް ގެންދާ ވޮލިއުންޓަރީ ގްރޫޕެކެވެ. އަދި ކުނި މެނޭޖް ކުރުމުގެ ކަންކަމުގައި ކިހާދޫގެ މުޖުތަމަޢާއި ރަށު ކައުންސިލާއި ޒީރޯ ވޭސްޓް ޗެމްޕިއަނުން ގުޅުވައިދެއެވެ.
"މިއަދު އީކޯ ސެންޓްރޯގައި މަސައްކަތް ކުރަމުން ދިޔައިރު ވަރަށް ގިނަ އެއްޗެހި ދަސްވި. އަޅުގަނޑުމެން މި ސާބިތުކޮށްދިނީ، ކޮންމެ މީހަކަށް ވެސް މިބާވަތުގެ މަސައްކަތެއް ކުރެވިދާނެކަން. މިފަދަ ފުރުސަތުތައް ފަހިވުމަކީ، ޒުވާން އަންހެނުންނަށް އެމީހުން ކުރިއަށް ދާން ބޭނުންވާ ކޮންމެ ދާއިރާއެއްގައި ވެސް މަސައްކަތްކޮށް ކުރިއަށް ދިއުމަށް ލިބޭ ހިތްވަރެއް،" މި ހަރަކާތުގެ ބައިވެރިއެއް ކަމަށްވާ ރަތީބާ މޫސާ ބުންޏެވެ.
މިއަދުގެ ހަރަކާތާ ގުޅިގެން ސޮނޭވާ ނަމޫނާގެ އޮޕަރޭޝަންސް އެންޑް ކޮމިއުނިޓީ އެންގޭޖްމަންޓްގެ ޑިރެކްޓަރު ކަތަރްޒިނާ މާރިއާ އިޒިޑޯރިކްޝެކް (ކޭޝް) ވިދާޅުވީ މިއަދުގެ ހަރަކާތަކީ ލިބުނު ވަރަށް ބޮޑު އުފަލެއް ކަމަށާއި މިއަދު މި ފެންނަނީ ކުންޏާ މެދު ދެކޭ ގޮތް ބަދަލުވަމުންދާ ކަން ކަމަށެވެ،
"ކިހާދޫގެ ޒީރޯ ވޭސްޓް ޗެމްޕިއަނުންގެ އިސްނެގުމާ އެކު މިފަދަ ހަރަކާތްތައް ކިހާދޫގައި ކުރިއަށް ގެންދާކަމީ އަޅުގަނޑުމެންނަށް ލިބޭ ވަރަށް ބޮޑު އުފަލެއް. މިވަގުތު ކިހާދޫގައި މިތިބީ އެންމެ 26 ޒީރޯ ވޭސްޓް ޗެމްޕިއަނުންކަމުގައި ވިއަސް އެބޭފުޅުން އެގެންދަވަނީ މުޅި ކިހާދޫގެ މުޖުތަމަޢު ވެސް ޒީރޯ ވޭސްޓް ޗެމްޕިއަނުންނަށް ބަދަލުވުމަށް ނަމޫނާ ދައްކައިދީ ހިތްވަރުދެމުން. މި ހަރަކާތުން އަޅުގަނޑުމެންނަށް ފެންނަމުން މިދާ މަންޒަރަކީ، މުޖުތަމަޢު ކުންޏާ ދޭތެރޭ ދެކޭގޮތް ބަދަލުވާ ތަން. އަޅުގަނޑުމެންގެ އުންމީދަކީ ގައުމީ ފެންވަރުގައި ވެސް މިފަދަ ބަދަލެއް އައުން،" ކޭޝް ވިދާޅުވިއެވެ.
ސޮނެވާ ނަމޫނާއަކީ ރަށު ފެންވަރުގައި ދެމެހެއްޓެނިވި ގޮތެއްގައި ކުނި މެނޭޖްކުރުމަށް ކުރެވިދާނެ ކަންކަމަށް އަހައްމިއްޔަތުކަން ދީގެން، ރާއްޖޭގައި ކުނި މެނޭޖްކުރުމުގެ އައު ވިސްނުމެއް ކުރިއެރުވުމަށް ޓަކައި މަސައްކަތްކުރާ މަދަނީ ޖަމިއްޔާއެކެވެ. ބ.އަތޮޅުގައި ދެމެހެއްޓެނިވި ގޮތެއްގައި ކުނި މެނޭޖްކުރުމުގެ ޕްރޮގްރާމްތައް ޕައިލެޓް ކުރުމަށް ފަހު، އެ ޖަމްޢިއްޔާއިން ދާދި ފަހުން ވަނީ ނ. އަތޮޅުގައި ދެމެހެއްޓެނިވި ގޮތެއްގައި ކުނި މެނޭޖްކުރުމުގެ ނިޒާމެއް ގާއިމް ކުރުމަށް ބޭނުންވާ ސްޓްރެޓީޖިކް އަދި ޓެކްނިކަލް އެހީ ނ. އަތޮޅު ކައުންސިލަށް ފޯރުކޮށްދިނުމަށް ޓަކައި އެމް.އޯ.ޔޫ.އެއްގައި ސޮއިކޮށްފައެވެ.
