ރިޔާސީ ބަޔާނަށް އިދިކޮޅުގެ ރައްދު: ރައީސް އިއްވެވީ ސިޔާސީ ބަޔާނެއް
މި އަހަރު ރައީސުލްޖުމްހޫރިއްޔާ އިއްވެވި ރިޔާސީ ބަޔާނަކީ، ސިޔާސީ ބަޔާނެއް ކަމަށް ރައްޔިތުންގެ މަޖިލީހުގެ މައިނޯރިޓީ ލީޑަރު އަހްމަދު ސަލީމް ވިދާޅުވެއްޖެއެވެ.
މިއަހަރުގެ ރިޔާސީ ބަޔާނަށް ރައްދު ދެއްވައި މައިނޯރިޓީ ލީޑަރު މިއަދު ވިދާޅުވީ، ރައީސް އިއްވަވާ ރިޔާސީ ބަޔާނެއްގައި ގައުމުގެ ހާލަތު ބަޔާން ކޮށްދޭން ޖެހޭ ކަމަށެވެ.
އެހެން ނަމަވެސް ރައީސް ސޯލިހުގެ ބަޔާނުގައި ގައުމުގެ ހާލަތު ބަޔާން ކުރައްވައިފައި ނުވާކަން ފާހަގަކުރަައްވައި ސަލީމް ވިދާޅުވީ ރިޔާސީ ބަޔާނުގެ ބަދަލުގައި ރައީސް އިއްވެވީ ސިޔާސީ ބަޔާނެއް ކަމަށެވެ.
"އެ ބަޔާނުގައި ދެއްކެވި ގިނަ ވާހަކަފުޅުތަކަކީ ނަތީޖާ ނުނެރެވޭނެ، އެއްވެސް ކަހަލަ ރޭވުންތެރިކަމެއް ނެތް، ދުރު ރާސްތާގެ އަމާޒެއް ނެތި، ދެއްކެވި ހުސް ވާހަކަފުޅުތަކެއް." ސަލީމް ވިދާޅުވިއެވެ.
ސަލީމް ވިދާޅުވީ ރައީސް ސޯލިހު މިހައިތަނަށް އިއްވެވި އެއްވެސް ރިޔާސީ ބަޔާނެއްގައި ކީރިތި ޤުރުއާނަށް ހަޖޫ ޖަހައި، ރަސޫލާއަށް ފުރައްސާރަކޮށް، އިސްލާމް ދީނުގައި ހުކުމް ކަނޑައެޅިފައިވާ ކަންކަމަށް ގޮންޖަހައި، އެމްޑީއެން އަދި އުތެމައިން ނެރުނު ރިޕޯޓު ކުށްވެރި ކުރައްވައިފައި ނުވާ ކަމަށެވެ.
ސަލީމް ވަނީ ލާދީނީ ރިޕޯޓް ލިޔުނު މީހުން ސަރުކާރުގެ އިސް މަގާމުތަކުގައި ތިބިކަން ފާހަގަކުރައްވައި ވަރަށް ބޮޑަށް ކަންބޮޑުވުން ފާޅު ކުރައްވައިފައެވެ.
އިދިކޮޅުން ރިޔާސީ ބަޔާނަށް ދެެއްވި ރައްދުގައި، އިދިކޮޅު ލީޑަރު ރައީސް ޔާމީން ހުރަގެއަށް ލައި، ވާދަވެރި ސިޔާސީ މާހައުލެއް އޮތުމަށް ސަރުކާރުން ހުރަސް އަޅަމުންދާކަން ވެސް ފާހަގަކޮށްފައިވެއެވެ.
"ސިޔާސީ ނުފޫޒު ފޯރުވައިގެން، ރައީސް ޔާމީންގެ ޝަރީއަތުގެ ތާވަލު ބަދަލު ކުރުމަކީ ބިރު ދެއްކުން. މިއީ ޖުޑިޝަރީ އިސްލާހު ކުރުމުގެ ނަމުގައި ޖުޑިޝަރީ ޚަރާބު ކުރުން." ސަލީމް ވިދާޅުވިއެވެ.
ސަލީމް ވަނީ ރައީސް ޔާމީންގެ ހުރިހާ މައްސަލަތަކެއް އަނބުރާ ގެންދިޔުމަށް ވެސް ސަރުކާރަށް ގޮވައިލައްވައިފައެވެ.
