މިދިޔަ ދެ އަހަރުތެރޭ ރާއްޖެއަށް 71 ބިލިއަން ރުފިޔާގެ ގެއްލުމެއް
ކޮވިޑާ ގުޅިގެން މިދިޔަ ދެ އަހަރުތެރޭ ރާއްޖޭގެ އިގުތިސާދަށް ގާތްގަނޑަކަށް 71 ބިލިއަން ރުފިޔާއަށް ވުރެ ބޮޑު ގެއްލުމެއް ލިބިފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.
ކޮވިޑާ ގުޅިގެން 2020ވަނަ އިއުލާންކުރި އާންމު ސިއްހަތުގެ ކުއްލި ނުރައްކަލުގެ ހާލަތު އުވާލިކަން އިއުލާންކުރެއްވުމުގެ ގޮތުން މިރޭ ގައުމާ މުޚާތަބުކުރައްވަމުން ރައީސް ވިދާޅުވީ ކޮވިޑުގެ ސަބަބުން ގައުމުތަކުގެ އިގުތިސާދީ ހަރަކާތްތައް ހުއްޓެމުން ދިޔަ އިރު، މުޅި ދުނިޔޭގެ ނިސްބަތުން ވެސް، އިގުތިސާދީ ގޮތުން އެންމެ ބޮޑު ގެއްލުމެއް ކުރިމަތިވާނެ ކަމަށް ލަފާކުރެވުނީ ރާއްޖެއަށް ކަމަށާއި އެގޮތުން ފާއިތުވި ދެ އަހަރު ތެރޭގައި ރާއްޖެއަށް ބޮޑު ގެއްލުމެއް ކުރިމަތިވެފައިވާ ކަމަށެވެ.
"ކޮވިޑްގެ ސަބަބުން ގައުމުތަކުގެ އިގްތިސާދީ ހަރަކާތްތައް ހުއްޓެމުން ދިޔައިރު، މުޅި ދުނިޔޭގެ ނިސްބަތުން ވެސް، އިގްތިސާދީ ގޮތުން އެންމެ ބޮޑު ގެއްލުމެއް ކުރިމަތިވާނެ ކަމަށް ލަފާކުރެވުނީ ރާއްޖެއަށް. މިދިޔަ ދެ އަހަރުގެ ތެރޭގައި ރާއްޖޭގެ އިގްތިސާދަށް ގާތްގަނޑަކަށް 71.3 ބިލިއަން ރުފިޔާގެ ގެއްލުން ލިބުނު ކަމަށް އަންދާޒާ ކުރެވޭ،" ރައީސް ޞާލިޙް ވިދާޅުވިއެވެ.
ރައީސް ޞާލިޙް ވިދާޅުވީ، އިޤްތިޞާދު ހުއްޓުނު މި ދަނޑިވަޅުގައި ވެސް، ސަރުކާރުން މަސައްކަތްކުރީ ރައްޔިތުން އުފުލަން ޖެހޭ ތަކުލީފުތައް ކުޑަކޮށްދޭން ކަމަށެވެ. އަދި ދައުލަތުގެ ފުދުންތެރިކަން ހުރި ވަރަކަށް ބަލައި ތަފާތު ގޮތްގޮތުން އެހީތެރިކަން ފޯރުކޮށްދީފައިވާކަން ރައީސް ޞާލިޙް ފާހަގަ ކުރެއްވިއެވެ.
ގޭބީސީތަކުގެ ކަރަންޓާއި ފެން ބިލްތަކުން ޑިސްކައުންޓްތައް ދެވުނު. ވަޒީފާ ގެއްލުނު މީހުންނަށާއި މުސާރަ ދަށްވި މީހުންނަށް އިންކަމް ސަޕޯޓް އެލަވަންސް ދެވުނު. ލޯނު ނަގައިފައިވާ މީހުންގެ ލޯނުތައް އަނބުރާ ދެއްކުމުގެ މުއްދަތު ފަސްކޮށްދެވުނު. ވަޒީފާތަކުން މީހުން ވަކިނުކުރުމަށް ޝަރުތުކޮށް، ވިޔަފާރިތަކަށް ލުއި ލޯނު ދޫކުރެވުނު. އިޖުތިމާއީ ރައްކާތެރިކަމަށް ބޭނުންވާ މީހުންނަށް އިޖުތިމާއީ ރައްކާތެރިކަން ފޯރުކޮށްދެވުނު. ރިސޯޓްތަކުގެ ކުލި ދެއްކުން ފަސްކޮށްދެވުނު،
ރައީސް ޞާލިޙްގެ ވާހަކަފުޅުގައި އިތުރަށް ވިދާޅުވީ، މިހާރު ކުރެވޭ އަންދާޒާތަކަށް ބަލާއިރު، އެންމެ ހަލުވިކޮށް އިގްތިސާދު ކުރިއަރާނެ ފަސް ގައުމުތަކުގެ ތެރޭގައި ރާއްޖެ ހިމެނޭ ކަމަށެވެ. އަދި އެކަން ހާސިލްވީ، ކޮވިޑުން ރައްކާތެރިވުމަށް ސަރުކާރުން އެޅި ފިޔަވަޅުތަކަށް، ރާއްޖޭގެ ރައްޔިތުން ދެއްވި ފުރިހަމަ އެއްބާރުލުން ކަމަށް ރައީސް ޞާލިޙް ވިދާޅުވިއެވެ.
"މިއަހަރުގެ ތެރޭގައި އެންމެ ހަލުވިކޮށް އިގްތިސާދު ކުރިއަރާނެ ކަމަށް، ދުނިޔޭގެ މާލީ އިދާރާތަކުން ލަފާކުރާ ފަސް ގައުމުގެ ތެރޭގައި، އަޅުގަނޑުމެންގެ ރާއްޖެ ވެސް ހިމެނޭ." ރައީސް ޞާލިޙް ވިދާޅުވިއެވެ.
