އެކައުންޓު ފްރީޒްކުރި މައްސަލައިގައި އަލްހާންގެ ކުންފުނިން ބީއެމްއެލްއާ ދެކޮޅަށް ދައުވާކޮށްފި
ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެންބަރު އަލްހާން ފަހުމީ ހިންގަވާ ކިންގްސް ކެޕިޓަލްސް ހޯލްޑިންސްގެ އެކައުންޓް ފްރީޒް ކުރި މައްސަލައިގައި އެ ކުންފުނިން ބޭންކް އޮފް މޯލްޑިވްސް (ބީއެމްއެލް)ގެ މައްޗަށް މިއަދު ދައުވާކޮށްފިއެވެ.
މައުލޫމާތު ލިބިފައިވާ ގޮތުުގައި ބީއެމްއެލްއިން ކިންގްސް ކުންފުނީގެ އެކައުންޓު ފްރީޒްކޮށްފައި ވަނީ އާންމުންގެ އަތުން ފައިސާ ނަގައިގެން ޕޮންޒީ ސްކީމެއް އެ ކުންފުނިން ހިންގި ކަމުގެ ތުހުމަތުގައެވެ.
އަލްހާނާއި އޭނާގެ ކޮއްކޮ ޝަހުބާން ފަހުމީގެ ހިއްސާ އޮންނަ ކިންގްސް ކުންފުނިން "ކިންގްސް ފޮރެކްސް"ގެ ނަމުގައި އާންމުންގެ އަތުން ފައިސާ ނަގައިގެން ސްކީމެއް ހިންގަން ފެށީ މިދިޔަ ޑިސެމްބަރުގައެވެ.
އޭގެ ފަހުން މަރުކަޒީ ބޭންކް ކަމަށްވާ އެމްއެމްއޭއިން މި މަހުގެ 10ވަނަ ދުވަހު ނެރުނު ބަޔާނެއްގައި ބުނެފައިވަނީ ކުޑަ ދުވަސްކޮޅެއްގެ ތެރޭގައި ބޮޑު ފައިދާއެއް ދޭނެ ކަމަށް ބުނެ އާންމުން އަތުން ބޮޑެތި އަދަދުތަކުން ފައިސާ ނަގައިގެން ހިންގާ ސްކީމަކާ މެދު އާންމު ރައްޔިތުން ސަމާލުވުމަށެވެ.
އެމްއެމްއޭގެ ބަޔާނުގައި އެއީ ސީދާ ކޮން ކުންފުންޏެއްކަން ނުބުނި ނަމަވެސް ހަމަ އެ ދުވަހު ބީއެމްއެލްއިން ވަނީ ކިންގްސް ކެޕިޓަލް ހޯލްޑިންސްގެ އެކައުންޓު ފްރީޒުކޮށްފައެވެ. އަދި އެއީ ކިންގްސް ކުންފުނީގެ ވާހަކަކަން އެ ކުންފުނިން ވެސް ވަނީ ހާމަކޮށް، އެމްއެމްއޭއާއި ބީއެމްއެލްގެ އެ އަމަލު އެ ކުންފުނިން ވަނީ ކުށްވެރިކޮށްފައެވެ.
ކިންގްސް ކެޕިޓަލް ހޯލްޑިންސްއިން ބީއެމްއެލްއާ ދެކޮޅަށް މިއަދު ސިވިލް ކޯޓަށް މައްސަލަ ހުށަހެޅި ދައުވާ ފޯމުގައި އެ ކުންފުނިން ބުނެފައި ވަނީ، އެ މައްސަލަ ހުށަހެޅީ ގާނޫނީ އެއްވެސް ސަބަބެއް ނުވަތަ އަމުރެއް ނެތި ބީއެމްއެލްއިން އެ ކުންފުނީގެ އެކައުންޓުގައިވާ ފައިސާ ހިފަހައްޓައިފައި ވާތީ ކަމަށެވެ.
ކިންގްސްއިން އެދިފައި ވަނީ އެކައުންޓް އަންފްރީޒް (އެކްޓިވް) ކުރަން ބީއެމްއެލްގެ މައްޗަށް އަމުރުކޮށްދިނުމަށާއި އެ އެކައުންޓް ދޫކޮށްލުމާ ހަމައަށް އެކަމުގެ ސަބަބުން ކުންފުނީގެ ވިޔަފާރިއަށް ލިބުނު ގެއްލުމުގެ ބަދަލު ހޯދުމަށް އެދި ދައުވާކުރުމުގެ ހައްގު އޮތް ކަމަށް ކަނޑައަޅައިދިނުމަށެވެ.
