ރައްޔިތުން ކައިރީގައި ދައްކާ ވާހަކައާ އެއްގޮތަށް އަމަލު ކުރަނީ ހަަމައެކަނި ޕީޕީއެމް: ރައީސް ޔާމީން
ރައްޔިތުން ކައިރީގައި ދައްކާ ވާހަކައާ އެއްގޮތަށް އަމަލު ކުރާ ހަމައެކަނި ސިޔާސީ ޕާޓީއަކީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
އެ މަނިކުފާނު މިފަދައިން ވިދާޅުވީ ޅ.ކުރެންދޫ ކައުންސިލުގެ ރައީސް ހޮވުމަށް، ހޮނިހިރު ދުވަހު ބޭއްވި ބައި-އިލެކްޝަންގައި ޕީޕީއެމަށް ލިބުނު ކާމިޔާބީ ފާހަގަކުރުމަށް އެ ރަށުގައި ރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.
އަންނަ އަހަރު ބާއްވާ ރިޔާސީ އިންތިހާބާ ދިމާކޮށް، ސިޔާސީ ލީޑަރުން ރައްޔިތުންގެ އަރިހަށް އިތުރު ވައުދުތަކާ އެކު ވަޑައިގަންނަވާނެކަން ފާހަގަކުރައްވައި ރައީސް ޔާމީން ވިދާޅުވީ، ރައްޔިތުން ކައިރީގައި ދައްކާ ވާހަކަތަކާ އެއްގޮތަށް އަމަލު ކުރަނީ ހަމައެކަނި ޕީޕީއެމް ކަމަށެވެ.
އެ މަނިކުފާނު ވިދާޅުވީ އިންތިހާބުތަކުގައި ޕީޕީއެމުން ވާދަކުރަނީ ދިވެހިރާއްޖެ ހަލާކުވެގެން ދިޔަ ނުދިނުމަށް ކަމަށެވެ.
"ބޭނުމެއް ނޫން ކޮންމެ ދިމާލަކުން ބޮޑު އަޣްލަބިއްޔަތެއް ލިބޭކަށް. ކޮންމެ ދިމާލަކުން ބޮޑު އަޣްލަބިއްޔަތެއް ލިބުނީމަ، ވާނެ ހައެތި ދިވެހީންނަށް މިއޮތީ ފެންނަން." އެމްޑީޕީއަށް ލިބުނު ބޮޑު އަޣްލަބިއްޔަތަށް އިޝާރާތް ކުރައްވައި އެމަނިކުފާނު ވިދާޅުވިއެވެ.
ރައީސް ޔާމީން އިތުރަށް ވިދާޅުވީ އަދުލުވެރިކަމާ އިންސާފުވެރިކަމާ އެކު އިންތިހާބެއް ބާއްވައިފި ނަމަ، އެމްޑީޕީއަށް ލިބޭނެ ބޮޑު އަޣްލަބިއްޔަތެއް ނޯންނާނެ ކަމަށެވެ.
"އެއީ އެވަރުގެ ބައެއް ނޫން. އަދި އެމީހުންނާ އެކު މަސައްކަތް ކުރަނީ އިންޑިއާ ކަމުގައި ވިޔަސް، އެމީހުންނަށް އެކަމެއް ނުކުރެވޭނެ. އެމީހުންނަކަށް އެވަރުގެ ތާއީދެއް ނެތް." ރައީސް ޔާމީން ވިދާޅުވިއެވެ.
ރައީސް ޔާމީންގެ ވާހަކަފުޅުގައި ޕީޕީއެމަކީ ރަައްޔިތުންގެ ތާއީދު ލިބިފައިވާ ޕާޓީއެއް ކަމަށާއި، އެޕާޓީ ދާނީ ކުރިއަށް ކަމަށް ވިދާޅުވިއެވެ. އެމަނިކުފާނު ވަނީ 2018ވަނަ އަހަރުގެ ރިޔާސީ އިންތިހާބު އެޕާޓީއަށް ގެއްލުމުން، ޕާޓީ ދޫކޮށް ދިޔަ މެމްބަރުންނަށް ފާޑު ވިދާޅުވެފައެވެ. އެ ގޮތުން ނާކާމިޔާބީއާ އެކު ޕާޓީއާ ފެއަށް ޖެހުނީ، ޕީޕީއެމްގެ މަގްސަދުތަކާ އުސޫލުތައް ގަބޫލު ކުރާ ބައެއް ނޫން ކަމަށް ވިދާޅުވިއެވެ.
ގަޑިއެއްހައި އިރު ، ރައީސް ޔާމީން ރޭ ދެއްކެވި ވާހަކަފުޅުތަކުގެ ތެރޭގައި ޖުޑިޝަރީ އިޞްލާޙްކުރުމަށް ވެވަޑައިގެންނެވި ވަޢުދުފުޅާ އެކު ރައީސް ޞާލިޙް ވެރިކަމަށް ވަޑައިގަންނަވައި ، ޝަރުޢީ ދާއިރާގެ މައްޗަށް އާރާއިބާރު ފޯރުވޭގޮތް ވުމުން ވައުދުފުޅު ހަނދާންނައްތައިލައިފައިވާކަމަށް ވިދާޅުވިއެވެ.
Ads by STO
