އާރްއާރްއާރް، ބާހޫބަލީގެ ރެކޯޑުތައް މުގުރާލައި އެންމެ އުހަށް
މިހާރު ސިނަމާތަކުގައި ދައްކަމުންދާ މަލްޓި ލޭންގުއޭޖް ފިލްމު "އާރްއާރްއާރް" އިންޑިއާ ސިނަމާގެ ގިނަ ރެކޯޑުތަކެއް މުގުރައިފިއެވެ.
ޖޫނިއާ ރާމަ ރާއޯ، ރާމް ޗަރަން ލީޑްރޯލުން ފެނިގެންދާ މި ފިލްމުގައި ބޮލީވުޑް ބަތަލާ އާލިއާ ބަޓާއި އެކްޓަރު އަޖޭ ދޭވްގަން ވެސް ކެމިއޯ ރޯލުން ފެނެއެވެ. މިފިލްމު ޑައިރެކްޓުކޮށްފައި ވަނީ ބާހޫބަލީ އަދި ބާހޫބަލީ 2ގެ ޑައިރެކްޓަރު އެސްއެސް ރާޖަމޯލީއެވެ.
"އާރްއާރްއާރް" ސިނަމާތަކުގައި އެޅުވި ފުރަތަމަ ދުވަހުން އެކަނި ވެސް ބޮކްސް އޮފީހުގެ ގިނަ ރެކޯޑުތަކެއް ވަނީ މުގުރައިލައިފައެވެ. އެގޮތުން އެދުވަހު އެކަނި އެ ފިލްމުން 228.50 ކްރޯރް ރުޕީސް ހޯދިއެވެ. މިއީ އެންމެ ފަހުން އެޅުވި ހިންދީ ފިލްމު "ގަންގޫބާއީ ކަތިއަވަޑީ"ގެ 10 ދުވަހުގެ ވިޔަފާރީގެ ގާތްގަނޑަކަށް ދެގުނައެވެ.
ފުރަތަމަ ދުވަހު "އާރްއާރްއާރް"އިން ހޯދި ފައިސާ، "ބާހޫބަލީ 2" އިން ފުރަތަމަ ދުވަހު ހޯދި ފައިސާއަށް ވުރެ އިތުރެވެ، "ބާހޫބަލީ 2" އެއީ އިންޑިއާ ސިނަމާގައި ވިޔަފާރީގެ ގޮތުން މިހައިތަނަށް އެންމެ ބޮޑު ކާމިޔާބެއް ހޯދި ފިލްމެވެ.
"އާރްއާރްއާރް" ސިނަމާގައި ދައްކަމުންދާތާ 9 ދުވަސް ވެފައިވާއިރު މިހައި ތަނަށް އެފިލްމުން 738 ކްރޯރް ރުޕީސް ވަނީ ހޯދައިފައެވެ. މިއީ ފަހުގެ ތާރީހެއްގައި ފިލްމަކުން އެންމެ ރަނގަޅު ވިޔަފާރިއެއް ކުރި ފިލްމެވެ.
ސައުތު އިންޑިއަން ސިނަމާގެ ޓީމަކުން އުފެއްދި "އާރްއާރްއާރް"އަށް ބޮޑު ތަރުހީބެއް ބޮލީވުޑް ބެލުންތެރިންގެ ވެސް ލިބެމުންދާއިރު އެންމެ ފަހުން ރިލީޒްކުރި ހިންދީ ފިލްމު "އެޓޭކް" އަށް ބެލުންތެރިންގެ ފަރާތުން ލިބެމުންދަނީ ފިނި ތަރުހީބެކެވެ.
މިދިޔަ 2021ވަނަ އަހަރު ވެސް އިންޑިއާގައި ހަމައެކަނި ހިނގި ފިލްމަކީ ސައުތު އިންޑިއާގެ ޓީމަކުން އުފެއްދި "ޕުޝްޕާ" އެވެ. ހިންދީ ފިލްމުތަކަށް ބެލުންތެރިންގެ ފަރާތުން ލިބެމުން އަންނަ ތަރުހީބު ކުޑަވާން ފަށައިފައި ވަނީ އެކްޓަރު ސުޝާންތު ސިންގް ރާޖުޕޫތުގެ މަރަށް ފަހު ބޮލީވުޑް ތަރިންގެ މައްޗަށް ހިންގި ތަހުގީގުތަކަށް ފަހު ފަޅާއެރި ކަންކަމުގެ ސަބަބުންކަމަށް ބެލެވެއެވެ.
