ރައީސަށް ވުރެ މަތީގައި އުޅޭ ވަޒީރުން އެބަ އުޅޭ: އަލީ ހުސައިން
ރައީސުލްޖުމްހޫރިއްޔާއަށް ވުރެ މަތީގައި އުޅުއްވާ ކެބިނެޓްގެ ވަޒީރުން ރާއްޖޭގެ ކެބިނެޓްގައި އެބަ ތިއްބެވިކަމަށް ކެންދޫ ދާއިރާގެ މެންބަރު އަލީ ހުސެއިން ވިދާޅުވެއްޖެއެވެ.
އަލީ ހުސެއިން މިހެން ވިދާޅުވެފައި ވަނީ، ރާއްޖޭގެ ފޮރިން ސާރވިސް ޤާނޫނުގައި ޚާރިޖީ ދާއިރާގައި މަސައްކަތްކުރާ މުވައްޒަފުންގެ މުސާރައާއި އިނާޔަތްތައް ކަނޑައެޅުމުގެ ބާރު ވަޒީރަށް އޮންނަ ގޮތަށް އޮތް މާއްދާ އިސްލާހުކުރުމަށް ސަރުކާރުގެ ފަރާތުން ހުށައަޅުއްވައިފައިވާ އިސްލާހަށް ބަހުސް ކުރައްވަމުންނެވެ.
އަލީ ހުސެއިން ވިދާޅުވީ، ޤާނޫން ފަސް ކުރިތާ ހަތަރު މަސް ފަހުން ޤާނޫނު އިސްލާޙް ކުރަން ޖެހުމުން، މައްސަލަތައް ހުރިކަން އެނގޭ ކަމަށެވެ.
"ދިމާވެގެން އުޅޭ މައްސަލައަކީ ރައީސަށް ވުރެ ފޮރިން މިނިސްޓަރުގެ ބާރު ގަދަވެފައި އޮތުން. ޚާރިޖީ ސިޔާސަތު ކަނޑައެޅުމަކީ ޙަޤީޤަތުގައި ރައީސްގެ މަސްއޫލިއްތުގައި ހިމެނޭ ކަމެއް. އެހެން ނަމަވެސް ރައީސްގެ މަތިން ކަންކަން ނިންމާ ވަޒީރުން، ވަޒީރުންގެ މަޖިލީހުގައި ތިބިކަން، މި އިސްލާޙުން އަޅުގަނޑުމެންނަށް އެނގިގެން ދިޔައީ" އަލީ ހުސެއިން ވިދާޅުވީ، މިއަދު ރާއްޖޭގައި ރައީސަކު ހުރިތޯ ވެސް ބައެއް ފަރާތްތަކުން ސުވާލު އުފައްދާ ކަމަށެވެ.
1968ގެ ފަހުން ދިވެހި ރާއްޖޭގެ ޚާރިޖީ ސިޔާސަތު މި ވަރަށް ބޮއްސުން ލައިފައި އޮތް ޒަމާނެއް، އަޅުގަނޑު ވެސް ޙަޤީޤަތުގައި ނުދެކެން. ޚާރިޖީ ސިޔާސަތު ބޮއްސުން ލައިފައިވާ މިންވަރަކީ އަޅުގަނޑުމެން ބައެއް ފަހަރަށް ހިތަށް އަރާ، މިއަދު ރާއްޖޭގައި ރައީސެއް އެބަހުރި ބާއޭ. ނޫނީ މި ޤައުމުގައި ހުރީ ހަމައެކަނި ޚާރިޖީ ވަޒީރު ބާއޭ.
ކެބިނެޓްގެ އިތުރު ވަޒީރުންނަށް ވެސް އަލީ ހުސެއިން ފާޑު ވިދާޅުވިއެވެ. މިގޮތުން ވިދާޅުވީ، ބައެއް ވަޒީރުން އެ ވަޒީރަކު ބޭނުންފުޅުވުމުން ކުންފުނިތައް އުފައްދަވައި އެ ކުންފުނިތަކުގެ ބޯޑުތަކަށް މެންބަރުން އައްޔަން ކުރައްވައި އެ ބޭފުޅުންނަށް ބޮޑެތި މުސާރަތައް ދެއްވަމުން އަންނަ ކަމަށެވެ.
"ހިފެހެއްޓުމެއް ނެތި އެއްވެސް މިނިސްޓަރަކަށް ބާރުތައް ދޫކޮށްލުމަކީ ކޮށްގެންވާނެ ކަމެއް" އަލީ ހުސެއިން ވިދާޅުވިއެވެ.
