އަމީނާއި ޔާސިރް ޔަހްޔާއާ ގުޅުމެއް އޮތް ކަމަށް ހެކިބަސްދީފި
އައިއެސް ޖަމާއަތުގެ ރާއްޖޭގައި ހަރަކާތްތެރިވާ އެންމެ އިސް މީހާ ކަމަށް ތުހުމަތުކޮށް ހައްޔަރުކޮށްފައިވާ ޏ. ފުވައްމުލަކު މާދަނޑު/ ކަރިއްޔާވިލާ މުހައްމަދު އަމީނާއި ޓެރަރިޒަމްގެ ސީރިއަސް ތުހުމަތުތަކެއް އުފުލުނު ޔަމަންގެ ރައްޔިތެއް ކަމަށްވާ ޔާސިރު ޔަހްޔާއާ ގުޅުމެއް އޮތް ކަމަށް މީހަކު ކޯޓުގައި ހެކިބަސް ދީފިއެވެ.
ދައުލަތުން އަމީންގެ މައްޗަށް ވަނީ ޓެރަރިސްޓް ޖަމާޢަތެއްގައި ބައިވެރިވުމާއި ޓެރަރިޒަމްގެ ޢަމަލެއް ހިންގަން ރޭވުމުގެ ކުށުގެ ދައުވާއެވެ. ނަމަވެސް މި ދައުވާތަކަށް އަމީން ވަނީ އިންކާރުކޮށްފައެވެ.
މި މައްސަލައާ ގުޅޭ ގޮތުން މިއަދު ބޭއްވި އަޑުއެހުމުގައި ދައުލަތުން ވަނީ ކާކުކަން ނޭނގޭ ގޮތަށް ސިއްރު ހެކިވެރިއެއް ހުށަހަޅައިފައެވެ. ނަމަވެސް އެއީ ފުލުހުންގެ އިދާރާގައި ޓެރަރިޒަމްގެ އޮޕަރޭޝަންތަކުގައި ހަރަކާތްތެރިވާ އޮފިސަރެއްކަން ވަނީ ހާމަކޮށްފައެވެ.
ހެކިބަސް ދެމުން އޭނާ ބުނީ އަމީނަކީ ޓެރަރިޒަމްގެ ތުހުމަތުގައި ހައްޔަރުކޮށް ސުވާލުކޮށްފައިވާ މީހެއް ކަމަށާއި އަމީނަކީ ހަރުކަށި ފިކުރުގެ މީހުންނާ ގުޅުން އޮންނަ އަދި އެ ފިކުރު ފަތުރަން އުޅޭ މީހެއް ކަމަށެވެ.
މީގެ އިތުރުން ޓެރަރިޒަމްގެ ސީރިއަސް ތުހުމަތުތަކެއްކޮށް މީގެ ކުރިން ހައްޔަރު ކުރި ޔާސިރް ޔަހްޔާއާ އަމީންގެ ގުޅުމެއް އޮތް ކަމަށް ވެސް ހެކިވެރިޔާ ބުނެފައިވެއެވެ. އެގޮތުން އަމީން ދިރިއުޅުނު ގެ ކައިރިން ދެ ފަހަރެއްގެ މަތިން އޭނާ ވަނީ ޔާސިރާ ބައްދަލު ކޮށްފައި ކަމަށާއި ޔާސިރަކީ ހަރުކަށި ފިކުރުގެ ބޮޑު މީހެއްކަމަށް ތުހުމަތުކުރެވޭ ކަމަށް ވެސް ހެކިވެރިޔާ ބުންޏެވެ. އަދި ސޯޝަލް މީޑިއާގައި ހަރުކަށި ފިކުރު ޕްރޮމޯޓުކޮށް، ފަހުން ހަނގުރާމައަށް ވެސް ދިޔަ ޝިފާޒް ކިޔާ މީހަކާއި ޢަލީ އާދަމް ކިޔާ މީހަކާ ވެސް އަމީން ބައްދަލުކުރި ކަމަށް ހެކިވެރިޔާ ބުނެފައިވެއެވެ.
ޓެރަރިޒަމްގެ ތުހުމަތުގައި ހައްޔަރު ކުރި ޔާސިރް ޔަހްޔާ ވަނީ، ހުޅުމާލޭ ޑިޓެންޝަން ސެންޓަރުގައި ބަންދުކޮށްފައި ހުއްޓާ ބަނޑުހައި ހޫނުކަމުގެ ހަޅުތާލެއް ހިންގައިފައެވެ. މިއާއެކު އޭނާގެ ހާލު ވަރަށް ބޮޑަށް ސީރިއަސްވެ އައިޖީއެމްއެޗްގައި ފަރުވާދެމުން ދަނިކޮށް އޭނާ ވަނީ 2020ވަނަ އަހަރުގެ އޯގަސްޓު މަހުގެ 3 ވަނަ ދުވަހު ނިޔާވެފައެވެ.
އެއްވެސް ކުށެއް ނެތް ޔާސިރުވެސް މަރާލީ މި ލާދީނީސަރުކާރުން. އަދި 2019 ވަނަ އަހަރުގެ ސެޕްޓެމްބަރު މަހުން ފެށިގެން އާމީން އެއްވެސް ސާބިތު ހެއްކެއް ނެތި އަނބިދަރިންނާ ދުރުގައި އެކަހެރިކޮށް ޔަހޫދީން ފަލަސްތީނުގައި މުސްލިމުންނަށް ހަދާ ގޮތަށް ހައްޔަރު ކުރަން ބޭނުންވާ މީހުންނަށް ކޮންމެވެސް އެއްޗެކޭ ކިޔާފަ ޖަލަށް ލާފަ އެއޮތީ.
އަނިޔާވެރިންނަށް الله އޭގެ ފުރިހަމަ އުޤޫބާތް ދެއްވާށި. އާމީން