ޙައްޖަށް މީހުން ގެންދިޔުމަށް ރާއްޖެއަށް ލިބުނީ 453 ކޯޓާ
މިއަހަރު ރާއްޖެއިން މީހުން ހައްޖަށް ގެންދިޔުމަށް ޓަކައި 453 ކޯޓާ ސަޢުދީ ޢަރަބިއްޔާއިން ދީފިއެވެ.
އިސްލާމިކް މިނިސްޓަރ ޑރ.އަޙްމަދު ޒާހިރު އަލީ ވިދާޅުވީ ރާއްޖެއަށް 453 ކޯޓާ ލިބިފައިވާކަމަށް ސައުދީގެ ލިސްޓްގައި އޮތް ނަމަވެސް ރަސްމީކޮށް މިނިސްޓްރީއަށް އަދި އަންގައިފައި ނުވާކަމަށެވެ. އަދި ރަސްމީކޮށް ސައުދީ ސަރުކާރުން ހައްޖު ކޯޓާއާ ގުޅިގެން މައުލޫމާތު ދިނުމުން އެކަން ހިއްސާ ކުރާނެ ކަމަށް ވިދާޅުވިއެވެ.
ކޮވިޑްގެ ކުރިން ސައުދީން ރަސްމީކޮށް ރާއްޖެއަށް ދެމުން އައީ 1000 ކޯޓާއެވެ. މިހާރުު ލިބިފައިވާ ވަރަށް ވުރެ އިތުރަށް ކޯޓާ ހޯދުމަށް މަސައްކަތް ކުރަމުން ގެންދާނެކަމަށް މިނިސްޓަރ ވިދާޅުވިއެވެ.
މަސްޖިދުލް ހަރަމްގެ ޓުވިޓާ އެކައުންޓުން އާއްމުކުރި ލިސްޓުގައި ވާގޮތުން މިއަހަރު އެންމެ ގިނަ ކޯޓާ ލިބިފައިވަނީ، އިންޑޮނޭޝިޔާއަށެވެ. އެގައުމަށް 100،051 ކޯޓާ ދިނުމަށް ނިންމައިފައި ވާއިރު، ދެވަނައަށް އެންމެ ގިނަ ކޯޓާ ދީފައި ވަނީ ޕާކިސްތާނަށެވެ. ޕާކިސްތާނަށް ލިބިފައި ވަނީ 81،132 ކޯޓާއެވެ. ތިންވަނައަށް އެންމެ ގިނަ ކޯޓާ ލިބިފައިވަނީ އިންޑިޔާއަށެވެ. އެއީ 79،237 ކޯޓާއެވެ.
