ފުލުހުންގެ ލޯންޗެއްގައި ރޯކުރި މީހަކު، ހެކި ނައްތާލުމުން، ޖަލަށްލާން ހުކުމް ކޮށްފި
ލ.ގަމު ތުނޑީ އަވަށު ބަނދަރުގައި އޮތް ފުލުހުންގެ ލޯންޗެއްގައި ރޯކޮށްލި ކަމަށް ތުހުމަތު ކުރެވޭ ދެ މީހުންގެ ތެރެއިން އެކަކު ހެކި ނައްތާލުމުން، ޖަލަށް ލާން ހުކުމް ކޮށްފިއެވެ.
އެގޮތުން ޖަލަށްލާން ހުކުމް ކޮށްފައިވަނީ ލ. ގަން، ތުނޑި، ލަވްސައިޑް އަބްދުއްލަތީފް އިބްރާހީމް އެވެ.
އަބްދުލްލަތީފުގެ އިތުރުން މިމައްސަލައިގައި ދެން ތުހުމަތު ކުރެވެނީ ލ. ގަން، ތުނޑި، ކަޅައިދޫ ފިނިހިޔާގެ މޫސާ އިނާސްއެވެ.
އަބްދުއްލަތީފް އާއި އިނާސް ފުލުހުންގެ ލޯންޗެއް ރޯކޮށްލި ކަމަށް ތުހުމަތު ކުރެވޭ ހާދިސާ ހިނގާފައިވަނީ މިދިޔަ މާރޗް މަހުގެ 22 ވަނަ ދުވަހުގައެވެ.
މިމައްސަލައާއި ގުޅިގެން ޕްރޮސިކިއުޓަރު ޖެނެރަލް (ޕީޖީ) އޮފީހުން މިއަދު ބުނީ، އެ މައްސަލައިގެ ހެކި ނައްތާލާފައި ވާތީ އަބްދުއްލަތީފް އިބްރާހީމްގެ މައްޗަށް ލ. ގަމު މެޖިސްޓްރޭޓް ކޯޓަށް ހުށަހެޅި އަދުލުއިންސާފު ގާއިމުކުރުމަށް ހުރަސްއެޅުމުގެ ކުށުގެ ދައުވާއަށް އޭނާ އިޢުތިރާފްވެފައިވާ ކަމަށާއި އެހެންކަމުން އޭނާ 1 އަހަރާއި 12 ދުވަހަށް ޖަލަށްލުމަށް ގަމު މެޖިސްޓްރޭޓު ކޯޓުން ހުކުމް ކޮށްފައިވާ ކަމަށެވެ.
މީގެއިތުރުން ޕީޖީ އޮފީހުން ބުނެފައިވަނީ މި މައްސަލައާއި ގުޅިގެން އަބްދުއްލަތީފް އިބްރާހީމް ދިރިއުޅޭ ގެ، ލ. ގަން މެޖިސްޓްރޭޓް ކޯޓުގެ އަމުރެއްގެ ދަށުން ބަލާ ފާސްކުރިއިރު ފެނުނު ހާޑް ޑިސްކްއެއް ތަހުލީލްކުރިއިރު ޓެރެރިސްޓް ޖަމާއަތްތައް ކަމަށްވާ ޖަބްހުތުއް ނުސްރާއާއި އަލް ގައިދާއަށް ތާއީދުކުރާކަން ދޭހަކޮށްދޭ ލިޔުންތަކެއް ވެސް ފެނިފައިވާ ކަމަށެވެ.
