ޑރ.ފަރަހަނާޒަށް ޝަރަފުވެރި އެވޯޑެއް ލިބިވަޑައިގެންފި
ޑިޕްލޮމެޓް އޮފް ދި ޔިއަރ ފްރޮމް އޭޝިއާ އެންޑް އޯޝޭނިއާގެ އެވޯޑް އިނގިރޭސިވިލާތަށް ކަނޑައަޅުއްވައިފައި ހުންނަވާ ދިވެހި ސަފީރު ޑރ. ފަރަހަނާޒް ފައިސަލްއަށް ލިބިވަޑައިގެންފިއެވެ.
މި އެވޯޑް އެކަމަނާއާ ޙަވާލުކުރައްވައިފައި ވަނީ، 25 އޭޕްރީލް 2022ގައި ބޭއްވި އައި.އެޗް.ޖީ ޑިޕްލޮމެޓު އޮފް ދަ އިޔަރ އެވޯޑްސް ހަފްލާގައި ކަމަށް ފޮރިން މިނިސްޓްރީން މައުލޫމާތު ދެއްވައިފައިވެއެވެ.
ޑިޕްލޮމެޓް އޮފް ދަ އިޔަރ އެވޯޑަކީ އިނގިރޭސިވިލާތުގައި ޤާއިމުކޮށްފައިވާ 165އަށް ވުރެ ގިނަ ޑިޕްލޮމެޓިކް މިޝަންގެ ޑިޕްލޮމެޓުންގެ ތެރެއިން ވޯޓްލައިގެން ދޭ ވަރަށް ޝަރަފުވެރި އެވޯޑެކެވެ. ކޮންމެ އަހަރަކު ވެސް މި އެވޯޑު ދެނީ 10 ބޭފުޅަކަށެވެ. މިއީ މިއެވޯޑް ދޭތާ 12ވަނަ އަހަރެވެ. އޭޝިއާ އަދި އޯޝޭނިއާއަކީ ގިނަ ޤައުމުތަކެއް ކަވަރުކުރާ ބޮޑު ސަރަހައްދަކަށްވާއިރު އެ ޤައުމުތަކުގެ ޑިޕްލޮމެޓުންގެ ތެރެއިން ޑރ. ފަރަހަނާޒް ފައިސަލްއަށް މި އެވޯޑް ލިބިވަޑައިގަތުމަކީ ދިވެހިރާއްޖެއަށް ލިބުނު ވަރަށް ބޮޑު ޝަރަފެކެވެ.
މި އެވޯޑް ޙަފްލާ އިންތިޒާމުކުރައްވައިފައި ވަނީ "ޑިޕްލޮމެޓް މެގަޒިން"ގެ ފަރާތުންނެވެ. އެ މެގަޒިންއަކީ ޚަރިޖީ ދާއިރާއާ ގުޅުންހުރި މުހިންމު މަޢުލޫމާތުތަކާއި ވާހަކަތައް ޝާއިޢުކުރާ މަޝްހޫރު މަޖައްލާއެކެވެ. މިއަހަރުގެ އެވޯޑު ހަފްލާ ހުށަހަޅުއްވައިދެއްވައިފައި ވަނީ ބީ.ބީ.ސީ ނިއުސްގެ ޑިޕްލޮމެޓިކް ކޮރެސްޕޮންޑެންޓް މރ. ޖޭމްސް ލެންޑޭލްއެވެ.
މި އެވޯޑާ ޙަވާލުވެވަޑައިގަތުމަށް ފަހު ޑރ. ފަރަހަނާޒް ފައިސަލް ދެއްކެވި ވާހަކަފުޅުގައި އެކަމަނާ ވަނީ އެވޯޑް ލިބިވަޑައިގެންނެވި ކަމަށް ޓަކައި މާތްﷲގެ ޙަޟްރަތަށް ހަމްދުކުރައްވައި އިނގިރޭސިވިލާތުގައި ހުންނަ ދިވެހިރާއްޖޭގެ ސަފީރުގެ މަޤާމުގައި ހުންނަވައިގެން ރާއްޖެއަށް ޚިދުމަތް ކުރެއްވުމުގެ ފުރުޞަތު އެކަމަނާއަށް ދެއްވިކަމަށްޓަކައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ޝުކުރު އަދާކުރައްވައިފައެވެ. އަދި ހަމައެއާ އެކު މިނިސްޓަރ އޮފް ފޮރިން އެފެއާޒް އަލްފާޟިލް ޢަބްދުﷲ ޝާހިދުއާއި އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަންގައި މަސައްކަތްކުރައްވާ ޓީމަށް ވަރަށް ޚާއްސަ ޝުކުރެއް އެކަމަނާ ރައްދުކުރެއްވިއެވެ.ހަމަ އެހެންމެ ޝުކުރުގެ ލިސްޓު ނިންމަވައިލެއްވުމުގެ ކުރިން އެ ކަމަނާގެ އާއިލާގެ ފަރާތްޕުޅުން ލިބިޑައިގަންނަވާ އެހީތެރިކަމާއި އެއްބާރުލެއްވުން ފާހަގަކުރައްވައި ޝުކުރު އަދާކުރެއްވިއެވެ.
Ads by STO
