ޒުވާން ނަރުސް އުދައިޝާންގެ މެސެޖު: މިއީ ފިރިހެނުން ލަދުގަނެ ފަސްޖެހެންވީ މަސައްކަތެއް ނޫން

ނަރުހެކޭ ބުނެފި ނަމަ ގިނަ މީހުންގެ ސިކުނޑިއަށް އަންނާނީ ހުދު ހެދުމެއްގައި ހުންނަ ޞިއްޙީ މަރުކަޒެއްގައި މަސައްކަތްކުރާ އަންހެނެއްގެ ވިސްނުމެކެވެ. ޒަމާނުއްސުރެ އެ މަސައްކަތުގައި ހަރަކާތްތެރިވީ އަންހެނުންކަމަށް ވުމާ އެކު ގިނަ ބަޔަކަށް އެއީ އަންހެނުންނަށް ޚާއްޞަ މަޤާމެކެވެ. ނަމަވެސް މިއީ ބަދަލުކުރަން ޖެހިފައި އޮތް ވިސްނުމެއްކަން ދިވެހި ފިރިހެން އެތައް ނަރުހުންނެއް ވެސް ދަނީ ދައްކައިދެމުންނެވެ. އެއީ ފިރިހެނުން ވެސް ޙަރަކާތްތެރިވާން މުހިންމު މަސައްކަތެއްކަމާއި ވަޒީފާތަކުގެ ތެރެއިން މިއީ ވެސް ސަޅި އަދި އިންސާނީ ޚިދުމަތުގެ ފުރިހަމަ މަސައްކަތެއްކަން ބުނެދީ އަމަލުން ދައްކާ އެކަކީ ށ.ފޯކައިދޫއަށް އުފަން އުދައިޝާނެވެ.

Ads by STELCO

ހދ. ކުޅުދުއްފުށި ރީޖަނަލް ހޮސްޕިޓަލުގެ އައިސީޔޫއާއި އެމަޖެންސީ ރޫމްގައި މަސައްކަތް ކުރަމުން އަންނަ އުދައިޝާނަކީ ރާއްޖޭގެ ހަވަނަ ފިރިހެން ނަރުހެވެ. މަދަރުސީ ދައުރު ނިންމައި އުމުރުން އެންމެ 18އަހަރުގައި ނަރސިން ކިޔަވަން ފައްޓައި ލ.ގަމުން ނަރސިންގެ އެޑްވާންސް ސެޓްފިކެޓް ކިޔަވައި ކުޅުދުއްފުށީ ހޮސްޕިޓަލްގައި މަސައްކަތް ކުރަމުން އަންނަ އުދައިޝާންގެ ހިތް ގުޅިފައި އޮތީ މި މުހިންމު މަސައްކަތާއެވެ.

އާންމުންނަށް އޭނާ ބުނެދޭން ބޭނުން ވަނީ މިއީ ފިރިހެނުން މަސައްކަތްކުރަން ލަދުގަނެ ފަސްޖެހެންވީ ދާއިރާއެއް ނޫންކަމެވެ. އޭގެ ބަދަލުގައި އަދިވެސް ގިނަ ފިރިހެނުން މި މަސައްކަތަށް ނިކުތުމަށް އުދައިޝާން އުއްމީދުކުރެއެވެ. އުދައިޝާންގެ ތަޖުރިބާ އޭނާ ވަނީ "ދެން"އާ ހިއްސާކޮށްފައެވެ.

ފޮޓޯ: މުހައްމަދު ޒަޔާން

އެންމެ ފުރަތަމަ ވިސްނީ ނަރުހަކަށް ވާކަށް ނޫން!

އުދައިޝާންގެ ކެރިއަރު ފެށުނު ގޮތް ހިއްސާ ކުރަމުން އޭނާ ބުނީ، ނަރުސްކަމަކީ އޭނާ އެންމެ ފުރަތަމަ ކުރިއަށް ދާން ވިސްނި ދާއިރާއެއް ނޫން ކަމަށާއި އެ ދާއިރާއިން ކުރިއަށް ދާން ނިންމީ ދިރިއުޅުމުގައި ދިމާވި ހާދިސާއެއްގެ ސަބަބުން ކަމަށެވެ.

"ސްކޫލްގައި އުޅުނު އިރު އެންމެ ފުރަތަމަ ވިސްނީ ޖާނަލިޒަމް ދާއިރާއިންނޭ ކުރިއަށް ދާނީ. އެއްވެސް ވަރަކަށް އެއިރު ހިތަކަށް ނާރާ ނަރުސްކަން ކިޔަވައިގެން ނަރުހަކަށް ވާނަމެކޭ. އެކަމަކު ގްރޭޑް 10ގައި އުޅެނިކޮށް ބަލިވެގެން ރަށު މަރުކަޒަށް ދިޔައިރު، ދިމާވި ހާދިސާއަކުން އަސްލު ބޮޑަށް ނަރުސްކަމުގެ ދާއިރާއަށް ނުކުންނަން ނިންމީ. އެއީ އަޅުގަނޑަކީ ފިރިހެނަކަށް ވެފައި، އަންހެން ނަރުހަކު އަޅުގަނޑުގެ ގަޔަށް އިންޖެކްޝަނެއް ޖަހަން އައުމުން އަޅުގަނޑު ތަންކޮޅެއް ޖެހިލުންވި. އެހެންވެ ހިތަށް އެރީ ހަމަ އެފަދައިން އެހެން ފިރިހެނުން ވެސް ޖެހިލުންވާނޭ. އެހެންވެ ހިތަށް އެރީ ނަރުހަކަށޭ ވާނީ" އުދައިޝަން ކިޔައިދިނެވެ.

އޭނާ ބުނި ގޮތުގައި ނަރުހަކަށްވުމަށް ޓަކައި އޭނާގެ ދައްތައެއްގެ އެހީތެރިކަން ވަރަށް ބޮޑަށް ލިބުނެވެ. އެ ދައްތައަކީ ވެސް ނަރުހަކަށް ވެފައި، ރާއްޖޭގައި ބައެއް ފިރިހެން ނަރުހުން ވެސް އުޅޭކަން އެ ދައްތަގެ ފަރާތުުން އެނގުމުން، ދާއިރާގައި ކުރިއަށް ދާން އިތުރު ހިތްވަރެއް ލިބުނު ކަމަށް އުދައިޝާން ބުންޏެވެ.

އެއިރު އެ ހާދިސާއާ ގުޅިގެން ނަރުސްކަމުގެ ދާއިރާއަށް ވަތް ނަމަވެސް، އޭނާ ސިއްހީ އެހީތެރިކަން ދެނީ ހަމައެކަނި ފިިރިހެން ބަލިމީހުންނަށް އެކަންޏެއް ނޫނެވެ. އަންހެނުންނަށް ވެސް ދެއެވެ. ނަމަވެސް އަންހެނުންނަށް ހިދުމަތް ދެނީ އެމީހުންގެ ހަށިގަނޑުގެ ޕްރައިވެޓް ތަނެއް ނުފެނި ދޭން ޖެހޭ ހިދުމަތްތައް އެކަނި ކަމަށާއި އެފަދަ ހާލަތްތަކުގައި އަންހެން ބަލިމީހުންނަށް ހިދުމަތް ދޭނީ އަންހެން ނަރުހުން ކަމަށް އުދައިޝާން ބުންޏެވެ. އަދި ހަމަ އެފަދައިން ފިރިހެނުންނަށް ވެސް އެފަދަ ހާލަތްތަކުގައި ހިދުމަތް ކުރާނީ ފިރިހެން ނަރުހުން ކަމަށް އުދައިޝާން ބުނެފައިވެއެވެ.

ލިބުނު ބައެއް ފާޑުކިޔުންތަކާ އެކު ވެސް ހިތްވަރާއެކު ކުރިއަށް

ފިރިހެނުން ނަރުސްކަމުގެ ދާއިރާއަށް ވަނުން ބީ ރައްޓެހިކަމަކަށް ވެފައި މި އޮތް މި ގައުމުގައި އެފަދަ މީހުންނަށް މަލާމާތާއި ފުރައްސާރަ ކުރިމަތިވި ވެއެވެ. މީހުންގެ ފާޑުކިޔުން އަމާޒުވެއެވެ. އެ ފަދަ ފާޑު ކިޔުމާއި ފުރައްސާރައިގެ އަމާޒަކަށް އުދައިޝާން ވެސް ވެފައި ވަނީ މަދެއްކޮށެއް ނޫނެވެ.

ނަރުސްކަމުގެ ދާއިރާ އުދައިޝާން އިހްތިޔާރު ކުރުމުން އެކަމާ ވެސް ވަރަށް ގިނަ މީހުން ހައިރާންވިކަން އޭނާ ފާހަގަ ކުރިއެވެ.

"ސްކޫލް ދައުރުގައި އުޅުނު އިރު އަޅުގަނޑު ނާސިންގ ކިޔަވަން ދިޔައީ އަޅުގަނޑުގެ ކަޒިން ބޭބެއަކާ އެކީގައި. ދެމީހުން އެއްކޮށް ކިޔަވަން ދިޔައީ. އެހެންވެ އެކަނިވެރިކަން އެހައި ބޮޑަށް އެއިރަކު އިހުސާސެއް ނުވި. ނެގެޓިވް ކޮމެންޓަށް ވުރެ ޕޮޒިޓިވް ކޮމެންޓު ގިނައީ އެއިރު. މަދު މީހަކު ނެގެޓިވްކޮށް އެއްޗެއް ބުނީ. ބައެއް މީހުން މަލާމަތްކުރަން ވެގެން ގޮވި ސިސްޓަރއޭ ކިޔައިފައި ވެސް. ދިޔައިރު މީހުން އެގޮތަށް ކިޔައިތީ ތަންކޮޅެއް ލަދު ވެސް ގަތް، މާޔޫސް ވެސް ވި. އެކަމަކު އޯވަރޯލްކޮށް ވަރަށް ސަޕޯޓް ލިބުން އަޅުގަނޑުމެން ދެމީހުންނަށް ވެސް. ހާއްސަކޮށް ލ.ގަމު ކެމްޕަހުން. އެހެންވެ ކުރިއަށް ދާން އިތުރު ހިތްވަރު ލިބުނު" ނަރުސްކަން ކިޔަވަން ފެށިއިރުގެ ތަޖުރިބާ ހިއްސާ ކުރަމުން އުދައިޝާން ކިޔައިދިނެވެ.

ނަރުސްކަން ކިޔަވަން ބޭނުންވާ ފިރިހެނުންނަށް އުދައިޝާންގެ މެސެޖު

ނަރުހެއްގެ ގޮތުގައި ކުރިއަށްދާން ބޭނުން ވެފައި، ނަމަވެސް އެކިއެކި ސަބަބުތަކާ ހެދި ކުރިއަށް ނުދެވިފައި ތިބި ފިރިހެނުންނަށް އުދައިޝާން ދޭން ބޭނުންވާ މެސެޖެއް އެބައޮތެވެ. އެއީ ނަރުހުން ކުރާ މަސައްކަތްތަކުގެ ފުރިހަމަ މައުލޫމާތު އެންމެ ފުރަތަމަ ރަނގަޅަށް ހޯދުމެވެ.

ފޮޓޯ: މުހައްމަދު ޒަޔާން

ނަރުހުންގެ ހިދުމަތްތަކާ ބެހޭ ގޮތުން މައުލޫމާތު ދޭ އެކިއެކި ޕްރޮގްރާމްތައް މިހާރު ކުރިއަށް ދާކަން ފާހަގަކޮށް އުދައިޝާން ބުނީ އެ ޕްރޮގްރާމްތަކުން ރަނގަޅު މައުލޫމާތު ހޯދުމަށް ފަހު، ހިތްވަރާ އެކު ކުރިއަށް ދިޔުމަށެވެ. އަދި ރަނގަޅު މައުލޫމާތު ލިބުމަށް ފަހު މިއީ ކުރިއަށް ދާން ވަރަށް ފަސޭހަ ދާއިރާއެއްކަން އަމިއްލައަށް ވިސްނޭނެ ކަމަށް ވެސް އުދައިޝާން ބުނެފައިވެއެވެ.

"މިދާއިރާއަކީ އަސްލުގައި ފިރިހެނުން ވެސް ވަރަށް ބޭނުންތެރި ދާއިރާއެއް. މިސާލަކަށް ބުނާނަމަ އެއް ރަށުން އަނެއް ރަށަށް ބަލިމީހުން އުފުލުމުގައި ވެސް، ފިރިހެނަކު ހުރެއްޖެ ނަމަ ވަރަށް ފަސޭހަވާނެ. އެހެންވެ ދާއިރާއާ ބެހޭގޮ ތުން ރަނގަޅަށް މައުލޫމާތު ލިބުން މުހިންމު. މިއީ ފިިރިހެން ނަރުހުން ތިބުން ކިހައި މުހިންމު ދާއިރާއެއްކަން ވެސް އެ އިރުން ވިސްނޭނެ." އުދައިޝާން ބުންޏެވެ

މަސައްކަތަށް ބަލައިފި ނަމަ މިއީ އެއްވެސް ވަރަށް ލަދުގަނެ، މާޔޫސްވާންވީ ދާއިރާއެއް ނޫން

އުދައިޝާން ބުނި ގޮތުގައި ފިރިހެން ނަރުހުން ރާއްޖޭގައި ތިބި ނަމަވެސް އެ އަދަދު އަދިވެސް އިތުރު ކުރުން ވަރަށް މުހިންމެވެ.

ނަރުހެއްގެ ގޮތުގައި ދިމާވާ އެންމެ ބޮޑު ދަތިކަން

އުދައިޝާން ބުނި ގޮތުގައި ނަރުހުންގެ ދާއިރާގައި ދިމާވާ އެންމެ ބޮޑު ދަތިކަމަކީ މި ދާއިރާގައި އަދިވެސް ހުންނަންޖެހޭ ވަރަށް ނަރުހުން ނެތުމެވެ. ސިއްހީ ދާއިރާގައި ބަލިމީހުންނަށް ހިދުމަތް ދިނުމުގައި ނަރުހުން މަދުވުމަކީ ވަރަށް ބޮޑަށް ދަތިވާ ކަމެއް ކަމުގައި އުދައިޝާން ފާހަގަ ކޮށްފައިވެއެވެ.

"ރާއްޖޭގެ ހުރިހާ ހޮސްޕިޓަލުތަކެއްގައި ވެސް ދިމާވާ ކަމެއް މިއީ. ފިރިހެން ނަރުހުން ވެސް އަންހެން ނަރުހުން ވެސް އިތުުރުވެގެންދާ ނަމަ އަޅުގަނޑުމެންގެ މަސައްކަތްތަކަށް ވެސް ވަރަށް ބޮޑަށް ލުޔެއް ލިބިގެންދާނެ. ގިނަ ބަލިމީހުންތަކެއް ތިބެފައި، ހިދުމަތް ދޭން މަދު ނަރުހުންތަކެއް ތިބީމަ، މަސައްކަތް ކުރަން ޖެހޭ ވަރު ވަރަށް ބޮޑަށް އިތުރު ވެގެންދާނެ" އުދައިޝާން ހިއްސާ ކޮށްފައިވެއެވެ.

މީގެ އިތުރުން އަތޮޅުތެރޭގެ ހޮސްޕިޓަލުތަކުގައި އަދިވެސް ސިއްހީ ހިދުމަތްދޭ ވަސީލަތްތައް މަދުކަން ވެސް އުދައިޝާން ވަނީ ފާހަގަކޮށްފައެވެ.

ދާއިރާގައި ކުރިއަށް ދާން ލިބުނު އެންމެ ބޮޑު ހިތްވަރު!

ނަރުސްކަމުގެ ދާއިރާގައި ކުރިއަށް ދާން އުދައިޝާނަށް ހިތްވަރު ލިބުނީ ވެސް ހެޔޮ އެދޭ އެތައް ބައެއްގެ ފަރާތުންނެވެ. އެންމެ އިސް ނަމަކީ މަންމައެވެ. އުދައިޝާންގެ އުމުރުން އެންމެ ފަސް އަހަރުގައި ބައްޕަ ނިޔާވުމުން، އޭނާއާއި އޭނާގެ އެއްބަނޑު އެއްބަފާ މީހުން ބަލައި ބޮޑުކުރި މަންމަގެ ޤުރުބާނީ އޭނާގެ ހިތުގައި ބިންވަޅު ނެގިފައި ވެއެވެ. މާލީ ހާލަތު ދަތިވީ އިރު ވެސް އެ މަންމަގެ ހިތްވަރުން މަދަރުސީ ދައުރު ނިންމައިލައި ނަރުސްކަން ކިޔެވުނުކަމާ މެދު އޭނާ އުފާކުރެއެވެ.

މަންމަގެ އިތުރުން އުދައިޝާން ދެން ހާއްސަ ޝުކުރު އަދާކޮށްފައި ވަނީ އޭނާގެ ދޮންބެއަށާއި އޭނާގެ މަންްމަ ފަރާތު ކާފަގެ އިތުރުން އާއިލާގެ އެންމެންނަށެވެ. އޭގެ އިތުރުން ލ. ގަމު ކެމްޕަސްގައި އުދައިޝަނަށް ކިޔަވައިދިން ލެކްޗަރާއިންނަށާއި އެކީގައި ކިޔެވި އެހެން ކުދިންގެ އިތުރުން ލ. ގަމު ރީޖަނަލް ހޮސްޕިޓަލުގެ ނަރުހުންނަށާއި އޭނާގެ ހުރިހާ ރަށްޓެހިންނަށް ވަރަށް ޚާއްސަ ޝުކުރެއް އުދައިޝާން ވަނީ އަދާކޮށްފައެވެ. އަދި ބަލި މީހުން ގޮވައިގެން މާލެ ދާއިރު، މާލޭގައި ތިބޭ އުދައިޝާންގެ ބޭބެއިންގެ ފަރާތުން އޭނާއަށް ލިބޭ އެހީތެރިކަން ފާހަގަކޮށް އެމީހުންނަށް ވެސް އުދައިޝާންގެ ޝުކުރު ޚާއްޞަ ވެއެވެ. މީގެ އިތުރުން އުދައިޝާން މަސައްކަތް ކުރަމުންދާ ކުޅުދުއްފުށި ރީޖަނަލް ހޮސްޕިޓަލުގެ ހުރިހާ ނަރުހުންނަށް ވެސް އޭނާގެ ޚާއްސަ ޝުކުރެއް އަދާ ކޮށްފައިވެއެވެ.