އައްޑޫގައި ހިންގި މާރާމާރީގައި ހާލު ސީރިއަސްވި ޒުވާނާ ނިޔާވެއްޖެ

އައްޑޫ ސިޓީގައި ހިންގި މާރާމާރީގައި ޒަހަމްކޮށްލި ޒުވާނާ ނިޔާވެއްޖެއެވެ.

ނިޔާވެފައި ވަނީ އުމުރުން 21 އަހަރުގެ ޒުވާނެކެވެ. އޭނާ ޒަޚަމްކޮށްލައިފައި ވަނީ ރޭ ދަންވަރު 3:10 ކަންހައިއިރު އައްޑޫ ސިޓީ ފޭދޫގައެވެ.

ޒުވާނާ ނިޔާވީ އައްޑޫ ހޮސްޕިޓަލްގެ އައިސީޔޫގައި ފަރުވާ ދެނިކޮށެވެ. ފުލުހުން އެކަން ވަނީ ކަށަވަރުކޮށްދީފައެވެ.

އެނގިފައިވާ ގޮތުގައި ރޭ ތޫނު އެއްޗެހި ބޭނުންކޮށްގެން މާރާމާރީ ހިންގައިފައި ވަނީ ދެ ގްރޫޕެއްގެ މެދުގައެވެ.

މި މާރާމާރީގެ ކުރިން މިދިޔަ ބުދަ ވިލޭރޭ ވެސް މާރާމާރީއެއް ހިންގައި ޒުވާނަކު ޒަހަމްކޮށްފައިވެއެވެ.

މާރާމާރީތަކުގެ މައްސަލައިގައި އަދި މީހަކު ހައްޔަރެއް ނުކުރެއެވެ.