އަންހެނެއްގެ އިނގިލީގައި ދަތް އަޅައި ބުރިކޮށްލި މީހާ ޝަރީއަތް ނިމެންދެން ބަންދުކޮށްފި

• އެނގިހުރެ ހުއްދަ ނޫން ތަނަކަށް ވަނުމުގެ ކުށުގެ ދައުވާ (އަސާސީ އަދަބު: ހަތަރު މަހާއި 24 ދުވަހުގެ ޖަލު ހުކުމެއް)
• ގައިގައި އަތްލުމުގެ ކުށުގެ ދައުވާ (އަސާސީ އަދަބު: އެއް މަހާއި ހަ ދުވަހުގެ ޖަލު ހުކުމެއް)
• އަނިޔާއެއް ދިނުމުގެ ކުށުގެ ދެ ދައުވާ (އަސާސީ އަދަބު: ކޮންމެ ދައުވާއަކަށް އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެއް)
• އަނިޔާއެއް ދިނުމުގެ ކުށުގެ ދައުވާ (އަސާސީ އަދަބު: ދެ މަހާއި 12 ދުވަހުގެ ޖަލު ހުކުމެއް)

އެނގިފައިވާ ގޮތުގައި މިދިޔަ މެއި މަހުގެ 1ވަނަ ދުވަހު އަލީ ހަސަން އެ ރަށަށް ދިޔައީ އޭނާގެ ދަރިންނާ ބައްދަލު ކޮށްލަން ކަމަށް ބުނެއެވެ. ނަމަވެސް އޭނާއާއި އެ އާއިލާއާ ދެމެދު މައްސަލަ ޖެހުނީ ފަތިސް ނަމާދަށް ދަރިން ގެންދަން ކަމަށް ބުނެ ދަންވަރު ތިނެއް ޖެހިއިރު އެ ގެއަށް ދަރިން ބަލައި ދިޔުމުންކަން ވެސް އެނގިފައިވެއެވެ. އަލީ ހަސަން އުޅުނީ އޭނާގެ އެ ދެދަރިން ގޮވައިގެން އެ ރަށުން ފިލައިގެން ދާން ކަމަށް އާއިލާއިން ތުހުމަތު ކުރި ކަމަށާއި އެހެންކަމުން އެކަމާ ދެކޮޅު ހެދުމުން އޭނާ ތަޅައިގަތީ ކަމަށް ވެސް މައުލޫމާތު ލިބިފައިވެއެވެ. އޭނާ ހައްޔަރުކޮށް ބަންދާ މެދު ގޮތެއް ނިންމަން ކޯޓަށް ހާޒިރުކުރި ދުވަހު ކޯޓުގެ ހުރުމަތް ކަނޑައިގެން 150 ދުވަހަށް ޖަލަށް ލާން ވިލިނގިލީ މެޖިސްޓްރޭޓް ކޯޓުން އަމުރުކުރިއެވެ. ޕީޖީގެ އޮފީހުގެ ތަރުޖަމާނު، ޕަބްލިކް ޕްރޮސެކިއުޓާ އަހްމަދު ޝަފީއު ވިދާޅުވީ މައާފަށް އެދި އަދަބު ލުއިކޮށްދިނުމަށް އޭނާ އެދުމުން، ކޯޓުން 15 ދުވަހުގެ ޖަލު އަދަބަކަށް ބަދަލުކޮށްދިން ކަމަށެވެ. އޭގެ ފަހުން ދައުލަތުން މިމަހުގެ ހަތަރުވަނަ ދުވަހު އެދިފައި ވަނީ، އަލީ ހަސަން ޝަރީއަތް ނިމެންދެން ބަންދުކޮށްދިނުމަށެވެ. އެގޮތުން ޕީޖީ އޮފީހުން މިއަދު ބުނީ އެ މައްސަލައިގައި މިއަދު ބޭއްވި އަޑުއެހުމުގައި އޭނާ ޝަރީއަތް ނިމެންދެން ބަންދުކުރަން ގއ. ވިލިނގިލީ މެޖިސްޓްރޭޓް ކޯޓުން އަމުރުކޮށްފައިވާ ކަމަށެވެ.