ސަމާލުވޭ! ކޮވިޑް ވޭދަނަތައް އަނެއްކާ ވެސް އިތުރުވަނީ
ރާއްޖޭގައި ކޮވިޑް-19ގެ ވޭދަނަތައް އަނެއްކާ ވެސް އިތުރުވަމުން އަންނަ ކަމަށާއި އެހެންކަމުން މި ބައްޔާ މެދު ރައްކާތެރިވެ ތިބުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން އިލްތިމާސް ކުރައްވައިފިއެވެ.
އެޗްޕީއޭއިން މިއަދު ނެރުނު ނޫސްބަޔާނެއްގައި ވިދާޅުވީ، ވޭތުވެދިޔަ މަސްތަކުގައި ކޮވިޑް-19ގެ ވޭދަނަތައް ރާއްޖޭގައި މަދުވެފައި އޮތުމަށް ފަހު، އަނެއްކާ ވެސް ގިނަވަމުންދާކަމަށް އެއޭޖެންސީގެ ތަފާސްހިސާބުތަކުން ދައްކައިފައިވާ ކަމަށެވެ. މިގޮތުން ވޭތުވެދިޔަ ހަފްތާގައި 142 ވޭދަނަ ފެނިފައިވާ ކަމަށާއި އެއީ އޭގެ ކުރީ
ހަފްތާއާ އަޅާ ބަލާއިރު %69 އިތުރު ވުމެއްކަން ވެސް އެޗްޕީއޭއިން ފާހަގަ ކުރައްވައިފައި ވެއެވެ.
މިއާ އެކު، ފައްސިވާ ވޭދަނަތަކާއި ހޮސްޕިޓަލުގައި އެނދުމަތި ކޮށްގެން ފަރުވާދޭ މީހުންގެ އަދަދު ވެސް އިތުރުވަމުންދާ ކަމަށް އެޗްޕީއޭއިން ވިދާޅުވެފައި ވެއެވެ. ފާއިތުވި މޭމަހު ކޮވިޑް -19 ޖެހިގެން ރާއްޖޭގައި
އެޑްމިޓް ކޮށްފައި ވަނީ މުޅިއެކު 15 މީހުންނެވެ. އެހެން ނަމަވެސް ޖޫންމަހުގެ 12ވަނަ ދުވަހާ ހަމައަށް 11 މީހުންނަށް އެޑްމިޓްކޮށްގެން ފަރުވާދޭން ޖެހިފައިވާ ކަމަށް އެޗްޕީއޭއިން ބުނެފައިވެއެވެ.
އެހެންކަމުން ރާއްޖޭގައި ކޮވިޑް-19ގެ ހާލަތު އިތުރަށް ގޯސްވިޔަ ނުދިނުމަށް ޓަކައި އަންނަނިވި ކަންތައްތަކަށް ސަމާލުވުމަށް އެޗްޕީއޭއިން ވަނީ އިލްތިމާސް ކުރައްވައިފައެވެ.
- ބަލީގެ އެއްވެސް އަލާމާތެއް ފެނިއްޖެ ނަމަ، ވީހައި އަވަހަކަށް އެހެން މީހުންނާ އެކަހެރިވެ، ޓެސްޓް ކުރުން
- މާސްކް އެޅުން: ޚާއްސަކޮށް ބަލީގެ އަލާމާތްތައް ހުރި ފަރާތްތަކުން އަދި ބަލީގެ ސަބަބުން ނުރައްކާވެދާނެ ފަރާތްތަކާއި އެ ފަދަ ފަރާތްތަކާ އެކު ދިރިއުޅޭ ނުވަތަ އެފަދަ މީހުން ބަލަހައްޓާ މީހުންނާއި ސިއްހީ ޚިދުމަތްދޭ މަރުކަޒުތަކުގައްޔާއި އެ ތަންތަނަށް ޒިޔާރަތްކުރާ އިރު
- ކޮވިޑަށް ފައްސި ވެއްޖެ ނަމަ އެކަހެރިވުމާއި އެއްތާވި މީހުންގެ މައުލޫމާތު ފޯރުކޮށްދިނުން
- ވެކްސިންގެ ޑޯޒުތައް ފުރިހަމަ ނުވާ ފަރާތްތަކުން ވެކްސިން ފުރިހަމަ ކުރުން: 12 އަހަރުން މަތީގެ ފަރާތްތަކަށް ވެކްސިންގެ ދެ ޑޯޒު އަދި 18 އަހަރުން މަތީގެ ފަރާތްތަކުގެ ތެރެއިން ދެޑޯޒު ފުރިހަމަކޮށް 6 މަސްވެފައިވާ ފަރާތްތަކަށް ބޫސްޓަރ ޖެހުމުގެ އިންތިޒާމުތައް މިހާރު ވެސް ވަނީ ހަމަޖެހިފައެވެ. މާލެ ސަރަހައްދުގައި ވެކްސިން ޖަހާ ސެންޓަރުތަކާއި ގަޑިތައް ކޮވިޑް-19 ވެބްސައިޓްއިން ފެންނަން ހުންނާނެއެވެ.
ކޮމެންޓް