ކުރިއަށް އޮތް ދެ ދުވަހު އުދަ އަރައި ފެން ބޮޑު ވެދާނެ، މިކަންކަމަށް ސަމާލުވޭ!

ރާއްޖެއަށް މިހާރު ކުރަމުންދާ ވިއްސާރައިގައި ކުރިޔަށް އޮތް ދެ ދުވަހު ރާއްޖޭގެ އެކި ހިސާބުތަކުގެ ރަށްތަކަށް ބޯކޮށް ވާރޭ ވެހޭނެ ކަމަށާއި، ދިޔަ ބޮޑުވާ ގަޑިތަކުގައި އުދައަރާނެ ކަމަށް ލަފާކޮށް، ސަލާމަތީ ގޮތުން ކުރަން ޖެހޭ ބައެއް ކަންކަން ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)އިން ހަނދާން ކޮށްދީފިއެވެ.

Ads by Hajj Corporation

އެންޑީއެމްއޭ މިރޭ ނެރުނު ބަޔާނެއްގައި ވިދާޅުވީ، ކުރިއަށް ދުވަހު ވައި ގަދަވެ، ކަނޑުގަދަ، ވިއްސާރަކޮށް ގުގުރާނެ ކަމަށް މޫސުމާ ބެހޭ ގައުމީ އިދާރާއިން ލަފާކޮށްފައިވާ ކަމަށެވެ. އަދި ދިޔަވަރު ބޮޑުވާ ވަގުތު ބައެއް ރަށްރަށަށް އުދަ އެެރުމަކީ ވެސް އެކަށީގެންވާ ކަމެއް ކަމަށް ބުނެފައިވެއެވެ.

އެންޑީއެމްއޭއިން ވަނީ މޫސުން ގޯސްވާނެތީ، ރައްޔިތުންގެ މުދަލާއި އިމާރާތްތަކަށް ލިބިދާނެ ގެއްލުމަކުން ރައްކާތެރިވުމަށް ދުރާލައި މަސައްކަތް ކުރުމަށް އިލްތިމާސްކޮށްފައެވެ.

އެގޮތުން ގޭގެއަށް ފެން ނުވަންނާނެހެން ރައްކާތެރި ފިޔަވަޅު އެޅުމަށް ގޭގެ ދޮރުމަތީ ވެލިބަސްތާ ފަދަ ތަކެތި ޖަހައި، ގޭތެރޭގައި ފެންބޮޑު ވެއްޖެ ހިނދެއްގައި ގެއްލުންވެދާނެ މުދާ ފެން ނުޖެހޭ ފަދަ އުސްތަންތަނަށް ބަދަލުކުރުން ފަދަ ފިޔަވަޅުތައް އެޅުމަށް ސަމާލުވުމަށް އެންޑީއެމްއޭއިން އެދެއެވެ.

މީގެ އިތުރުން ވެސް އެޅިދާނެ ބައެއް ފިޔަވަޅުތައް:

• ގަދަވައިގެ ސަބަބުން ގޭގެ ފުރާޅު އެއްލާލަފާނެ ކަމަށް ލަފާ ކުރެވޭނަމަ ކުރިއާލައި ވައު ފަދަ އެއްޗެއް ބޭނުން ކޮށްގެން ފުރާޅު އެއްލައިނުލާނެ ފަދަ ގޮތަކަށް ހައްޔަރުކުރުން.
• ގަދަ ވައިގެ ސަބަބުން އެއްލައިލަފާނެ ތަކެތި ބަނދެ ރައްކާތެރިކުރުން.
• ބޭނުން ނުކުރާނަމަ ކަރަންޓުން ބޭނުންކުރާ ތަކެތި ނިއްވާލައިފައި ބެހެއްޓުން.
• ކަނޑު ދަތުރުކުރާ ފަރާތްތަކުން މޫސުމަށް ބަލައިގެން ދަތުރު ކުރުމަށް ސަމާލުވުން.
• އަދި ދަތުރަށް ނުކުންނައިރު ސަލާމަތީ ކަންކަމާއި މުއާސަލާތީ ނިޒާމުގެ ފުރިހަމަކަން ޔަޤީން ކުރުން

މިހާރު ކުރަމުން އަންނަ ވިއްސާރައިގައި ދެކުނު ރަށްތަކަށް ވަނީ ވަރަށް ބޮޑަށް އުދަ އަރައި، ބޮޑެތި ގެއްލުންތަކެއް ވެފައެވެ. އެގޮތުން މިހާތަނަށް ހަތް އަތޮޅަކުން 18 ރަށަކަށް އުދަ އެރިކަމުގެ ރިޕޯޓު ލިބިފައިވާ ކަމަށް ޑިޒާސްޓާ މެނޭޖުމަންޓުން ވަނީ ވިދާޅުވެފައެވެ.