އިންޑިއާ އޮންނާނީ އަބަދު ވެސް ކޮންމެ ބަޔަކާއެކީގައި ވެސް މަސައްކަތް ކުރަން ތައްޔާރަށް: މުނޫ މަހާވަރު
ސަރުކާރު ބަދަލުވަކުން، އިންޑިއާ-ރާއްޖެ ގުޅުމަށް ބުރޫ އަތުވެދާނެ ކަމަށް ޤަބޫލުފުޅު ނުކުރައްވާ ކަމަށާއި އިންޑިއާ އޮންނާނީ އަބަދު ވެސް އެކުގައި މަސައްކަތް ކުރައް ތައްޔާރަށް ކަމަށް އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު ވިދާޅުވެއްޖެއެވެ.
މުނޫ މަހާވަރު މިހެން ވިދާޅުވެފައިވަނީ ދައުލަތުގެ މީޑިއާއިން ގެނެސްދިން ޕްރޮގްރާމެއްގައި ދެއްކެވި ވާހަކަފުޅުގައެވެ.
ރާއްޖޭގެ ވެރިކަން ބަދަލުވެއްޖެނަމަ ދެ ޤައުމުގެ ވެރިކަމަށް ހީނަރުކަމެއް އައިސްފާނެތޯ ސުވާލު ކުރުމުން މުނޫ މަހާވަރު ވިދާޅުވީ، އެފަދަ ކަމެއް އަތުވެދާނެ ކަމަށް ޤަބޫލު ނުކުރައްވާ ކަމަށެވެ. އަދި ރާއްޖެއާއި އިންޑިއާގެ ގުޅުން އަބަދުވެސް ވަރުގަދަ ކަމަށާއި އެގުޅުން ހީނަރުވާނެ ހާލަތެއް އައިސްދާނެ ކަމަށް ޤަބޫލު ނުކުރައްވާ ކަމަށް ވިދާޅުވިއެވެ.
އިދިކޮޅުންދަނީ އިންޑިއާއާ ދެކޮޅަށް "އިންޑިއާ އައުޓް" ކެންޕެއިނެއް ކުރައްވަމުންނެވެ. އިދިކޮޅުގެ ލީޑަރު ރައީސް ޔާމީން މިހާރު ވެސް އިންޑިއާ އާ ދެކޮޅު ޝުއޫރުތައް ފާޅު ކުރެއެވެ.
މުނޫ މަހާވަރު ވިދާޅުވީ، ރާއްޖެއާއި އިންޑިއާއަކީ ދެ ޑިމޮކްރަޓިކް ޤައުމު ކަމަށާއި އެކުގައި މަސައްކަތް ކުރަން އަބަދު ވެސް ފުރުސަތު އޮންނާނެ ކަމަށް ޤަބޫލު ކުރައްވާ ކަމަށެވެ.
އޭނާގެ ވާހަކަފުޅުގައި އިންޑިއާއާއި ރާއްޖެއާ ދެމެދު އޮންނަ ގާތް ގުޅުމާއި ބެހޭ ގޮތުން ވެސް ވާހަކަފުޅު ދެއްކެވިއެވެ. މިގޮތުން ވިޔަފާރިީގެ ރޮގުންނާއި، އިޤްތިޞާދީ ރޮގުން ދެ ޤައުމުގެ މެދުގައިވާ ގާތް ގުޅުމާއި ބެހޭ ގޮތުން ވާހަކަފުޅު ދެއްކެވިއެވެ.
