އެއް ސީޒަނެއްގައި ޔުވެންޓަސްއަށް އެންމެ ގިނަ ގޯލް ކާމިޔާބު ކޮށްދިން ކުޅުންތެރިއަކަށް ރޮނާލްޑޯ!
މި ސީޒަނުގައި ޔުވެންޓަސްއަށް ޖުމްލަ 37 ލަނޑު ކާމިޔާބު ކޮށްދީ ކްރިސްޓިއާނޯ ރޮނާލްޑޯ އެ ޓީމުގެ ރިކޯޑެއް މުގުރާލައިފިއެވެ.
80 އަހަރަށްވުރެ ވެސް ގިނަ ދުވަސްވެފައިވާ މި ރިކޯޑް އޭނާ މުގުރާލީ މިރޭ ޗެމްޕިއަންސް ލީގުގެ “ރައުންޑް އޮފް 16” ގައި ލިޔޯން އާއި ދެކޮޅަށް ޖެހި ދެ ގޯލާއިއެކުގައެވެ. އެގޮތުން 37 ގޯލާއެކު އެއް ސީޒަނެއްގައި ޔުވެންޓަސްއަށް އެންމެ ގިނަ ގޯލް ކާމިޔާބު ކޮށްދިން ކުޅުންތެރިއަކަށް ރޮނާލްޑޯ މިވަނީ ވެފައެވެ.
ރޮނާލްޑޯ މި ސީޒަނުގައި ޔުވެންޓަސް އަށް ޖަހާދީފައިވާ 37 ގޯލުގެ ތެރެއިން 31 ގޯލް ކާމިޔާބު ކުރީ އިޓަލީގެ ސީރީއޭ ގައެވެ. އަދި ހަމަ އެހެންމެ ޗެމްޕިއަންސް ލީގުގައި 3 ގޯލް ޖަހާފައިވާއިރު ވިކްޓޯރިއަސް ކޮޕާ އިޓަލިއާ ކެންޕެއިންގައި ރޮނާލްޑޯވަނީ ޔުވެންޓަސް އަށް 2 ގޯލް ކާމިޔާބު ކޮށްދީފައެވެ. މި ރިކޯޑް އޭނާ މުގުރާލައިފައި ވާއިރު އޭނާގެ އުމުރަކީ 35 އަހަރެވެ.
މި ރިކޯޑަކީ 80 އަހަރު ވަންދެން ޔުވެންޓަސްގެ ލެޖެންޑަރީ ކުޅުންތެރިއެއް ކަމަށްވާ ފެލައިސް ބޮރެލްގެ އަތުގައި އޮތް ރިކޯޑެކެވެ. އޭނާ މި ރިކޯޑް ހަދާފައިވަނީ މީގެ 87 އަހަރު ކުރިން 1933 ވަނަ އަހަރުއެވެ. އެގޮތުން އެ ސީޒަނުގައި އޭނާ ޖަހާފައިވަނީ 36 ގޯލެވެ. އޭނާ މި ރިކޯޑް މުގުރާލި އިރު އުމުރަކީ 34 އަހަރެވެ.
ކްރިސްޓިއާނޯ ރޮނާލްޑޯ އަކީ ޔޫއެފާ ޗެމްޕިއަންސް ލީގުގައި އެންމެ ކާމިޔާބު ކުޅުންތެރިޔާކަން ފާހަގަ ކޮށްލެވެއެވެ. އެގޮތުން ރޮނާލްޑޯ ވަނީ 5 ފަހަރު ޗެމްޕިއަންސް ލީގު ކާމިޔާބު ކޮށްފައެވެ. އަދި ޗެމްޕިއަންސް ލީގުގައި އެންމެ ގިނަ ގޯލް ޖެހި ކުޅުންތެރިޔާ އަކީ ވެސް ދުނިޔެ މިހާތަނަށް ދުށް އެންމެ މޮޅު އެއް ފުޓުބޯޅަ ކުޅުންތެރިޔާ ރޮނާލްޑޯއެވެ.
