މޮރިޝަސްއަށް ފޮނުވި ސިޓީ ހޯދަން މަޖިލީހަށް
މޮރިޝަސްއަށް ޗާގޯސްގެ ސިޔާދަތީ ބާރު ލިބިގެންވާކަމަށް ރާއްޖެއިން ގަބޫލުކޮށް ރައީސް އިބްރާހިމް މުޙައްމަދު ޞާލިޙް މޮރިޝަސްގެ ބޮޑުވަޒީރަށް ފޮނުއްވި ސިޓީ މަޖިލީހުގެ ކަމާބެހޭ ކޮމިޓީއަށް ގެނެސް އެ މައްސަލަ ބަލައިދިނުމަށް މަހިބަދޫ ދާއިރާގެ މެންބަރު އަޙްމަދު ޠާރިޤް އެދިވަޑައިގެންފިއެވެ.
ރާއްޖޭގެ ޚާއްސަ އިގުތިސާދީ ކަނޑުގެ ސަރަހައްދާއި ޗާގޯސްގެ ކަނޑުގެ ސަރަހައްދުގައި ފުށުއެރުންތަކެއް ހުރިކަމަށް ބުނެ ބައިނަލްއަގްވާމީ ޓްރައިބިއުނަލަށް މޮރިޝަސްގެ ފަރާތުން ވަނީ ރާއްޖެއާ ދެކޮޅަށް މައްސަލައެއް ހުށަހަޅައިފައެވެ.
އެ މައްސަލައިގައި މި މަހުގެ 20 ވަނަ ދުވަހު ބައިނަލްއަގްވާމީ ޓްރައިބިއުނަލުގައި ކުރިއަށްދިޔަ އަޑުއެހުމުގައި އެޓާނީ ޖެނެރަލް އިބްރާހިމް ރިފްޢަތު ވަނީ, މޮރިޝަސްއަށް ޗާގޯސްގެ ސިޔާދަތީ ބާރު ލިބިގެންވާކަމަށް ރާއްޖެއިން ގަބޫލުކޮށް, މިދިޔަ އޮގަސްޓު 22 ގައި މޮރިޝަސްގެ ބޮޑުވަޒީރަށް ރައީސް ޞާލިޙް ސިޓީއެއް ފޮނުއްވާފައިވާކަމަށް ވިދާޅުވެފައެވެ.
ނަމަވެސް އެ ސިޓީ ހާމަކުރަން ސަރުކާރުން ވަނީ ދެކޮޅު ހަދައިފައެވެ.
މި މައްސަލައާ ގުޅިގެން މެންބަރު ޠާރިޤް, މަޖިލީހުގެ ރައީސް މުޙައްމަދު ނަޝީދަށް އެޑްރެސް ކުރައްވައި ފޮނުއްވި ސިޓީގައި ވިދާޅުވެފައިވަނީ މޮރިޝަސްއިން ޗާގޯސްގެ މައްޗަށް ސިޔާދަތީ ބާރު ލިބިގެންވާކަމަށް ދަޢުވާކުރާ މި މައްސަލައިގައި ޒަމާނުއްސުރެ ރާއްޖެއިން ދަމަހައްޓަމުން އަންނަ ރާއްޖޭގެ އެންމެ މަތީ މަސްލަހަތު ހިމާޔަތްކުރުމުގެ ސިޔާސަތު ބަދަލުކުރުމުގެ ސަބަބުން ރާއްޖޭގެ ޚާއްސަ އިގުތިސާދީ ސަރަހައްދުން ބައެއް އުނިވާ ކަމަށެވެ.
އެހެންކަމުން ރައީސް ޞާލިޙް ފޮނުއްވި ސިޓީއަކީ ރާއްޖޭގެ ސަރަހައްދަށް ބަދަލު އަންނާނެ ހާލަތެއް މެދުވެރިވާ ކަމެއްކަން ފާހަގަކުރައްވައި ޠާރިޤް އެދިވަޑައިގެންނެވީ މަޖިލީހުގެ ކަމާބެހޭ ކޮމިޓީއަށް އެ ސިޓީ ގެނެސް, އެ މައްސަލަ ބަލައި ދިނުމަށެވެ.
މިކަމާ ގުޅިގެން ރައީސް ޞާލިޙް ވިދާޅުވީ، ޗާގޯސް މައްސަލައިގައި މިހާރު ވެސް ދަމަހައްޓަމުން މި ދަނީ މިކަމުގައި އެންމެ ކުރިން ވެސް ދިވެހި ދައުލަތުން ދަމަހައްޓަމުންއައި ދިވެހިރާއްޖޭގެ އެންމެ މަތީ މަސްލަހަތު ދިފާޢުކުރުމުގެ ސިޔާސަތު ކަމަށެވެ. އަދި މި މައްސަލައިގައި ވެސް އަދި ޚާރިޖީ ދާއިރާއާގުޅޭ އެހެން ކަމެއްގައި ވެސް ރާއްޖޭގެ ސިޔާދަތީ މިނިވަންކަމަށް ގެއްލުމެއް ލިބޭފަދަ ނިންމުމެއް މި ސަރުކާރުން މިހާތަނަށް ވެސް ނިންމާފައެއް ނޯންނާނެ ކަމަށާއި, ދެން ވެސް މި ސަރުކާރުން އެފަދަ ގެއްލުމަކަށް ޖާގައެއް ނުދޭނެ ކަމަށެވެ.
