"އެހެނަސް" އަކީ 18 އަހަރުން މަތީގެ މީހުން ބެލުމަށް އުފައްދާފައިވާ ވެބްސީރީޒެއް- ރިޝްމީ

ރާއްޖޭގެ ފިލްމީދާއިރާގެ ޚަބަރުތަކަށް ބަލާލާއިރު މިދުވަސްކޮޅު އެންމެ ގަދަޔަށް ދެކެވެމުން އަންނަ އެއް ވާހަކައަކީ މަޝްހޫރު ވާހަކަ ލިޔުންތެރިޔާ އަޙުމަދު އިޤްބާލު (އައިކިޔު) ލިޔެ ޕްރޮޑިއުސް ކޮށްފައިވާ ވެބްސީރީޒް "އެހެނަސް" ގެ މަންޒަރެއް ހިމެނޭ ވީޑިއޯ ކްލިޕެއް ސޯޝަލް މީޑިއާގައި ދައުރުވަމުން އަންނަ ވާހަކައެވެ.

Ads by STELCO

ތިރީސް ސިކުުންތުގެ އެކްލިޕުގައި ސީރީޒްގެ އެއް ލީޑް އެކްޓްރެސް އައިޝަތު ރިޝްމީ ބޭނުން ކޮށްފައިވާ ޑަޔަލޮގުތަކަށް ވަރަށް ގިނަ ބެލުންތެރިން ވަނީ ފާޑުކިޔާ ނުރުހުން ފާޅު ކޮށްފައެވެ. ގިނަ މީހުން ބުނެފައިވާ ގޮތުގައި އެއީ އާއްމު އަޚްލާގީ މިންގަނޑާއި ޚިލާފު، ފާހިޝް ވާހަކަތަކަކަށް އަލި އަޅުވާލާފައިވާ ޑަޔަލޮގެކެވެ. އަދި އެއީ އާއިލާއެއްގެ ތެރޭގައި ބަލަން ނުވާވަރުގެ ސިރީޒެއް ކަމަށް ވެސް ބައެއް މީހުން ބުނެފައިވެއެވެ. އަދި ރިޝްމީގެ ކެރެކްޓަރާއި ބެހޭގޮތުން ވެސްް ގިނަ ބަޔަކު ވަނީ އިނގިލި ދިއްކޮށް ނުރުހުމުގެ ބަސްތައް އަމާޒު ކޮށްފައެވެ.

މީހުންގެ އެފަދަ ބަސްތަކަށް ޖަވާބު ދެމުން ރިޝްމީ މިއަދު ފޭސްބުކް މެދުވެރިކޮށް ބުނެފައިވަނީ އޭނާއަކީ އާއްމުންނަށް ދަންނަ މޫނަކަށް ވާތީ، އަބަދުވެސް އެންމެ އިސްކަމެއް ދީފައިވާނީ އަޚުލާޤީ މިންގަނޑު ދެމެހެއްޓުމަށް ކަމަށާއި ކުރިއަށް އޮތްތަނުގައި ވެސް ކުރިއަށްދާނީ އެގޮތަށް ކަމަށެވެ. އަދި އޭނާ އާއްމުންގެ ތެރޭގައި އުޅޭ ގޮތާއި އުޅުން ބަހައްޓާ ގޮތަކީ އޭނާގެ އަސްލު ޕާސަނަލިޓީ ކަމަށާއި އެކްޓު ކުރާއިރު އެފެންނަ ފެނުމަކީ ހަމައެކަނި އޭނާ ކުޅެފައިވާ ރޯލެއް ކަމަށް ވެސް ރިޝްމީ ބުނެފައިވެއެވެ.

"އެހެނަސް" އަކީ (ހަމައެކަނި ފޯނުން ބޭނުން ކުރެވޭ) ބައިސްކޯފަށް ހަދާދީފައިވާ ވެބްސީރީޒެއް ކަމަށާއި އަދި އެއީ ސަބްސްކްރައިބް ކުރުމުން ނޫނީ ނުބެލޭނެ ޕްރީއަމް ކޮންޓެންޓެއް ކަމަށް ވެސް ރިޝްމީ ބުނެފައިވެއެވެ.

"މިއީ 18 އަހަރުން މަތީގެ މީހުންނަށް އުފައްދާފައިވާ ވެބްސީރީޒެއް. އަދި ކޮންމެ އެޕިސޯޑެއް ފެށުމުގެ ކުރިން އޭގެން ދައްކާ ބައެއް މަންޒަރުތަކުގެ ސަބަބުން ބައެއް މީހުންނަށް އަސަރު ކޮށްފާނެ ކަމަށް އިންޒާރެއް ވެސް ވާނީ އަރުވާފަ. މިސީރީޒްގައި ދައްކުވައި ދެނީ ޒުވާން ފިރިހެނަކަށް ކުރިމަތިވާ ގިނަ ކަންތައްތަކެއް. އާއްމު ދިރިއުޅުމުގައި ވެސް ދިމާވެފައިވާ ވަރަށް ގިނަ ކަންތައްތަކަކަށް ލިޔުންތެރިޔާ އައިކިޔު މިސީރީޒްގައި އަލިއަޅުވާލާފައިވާނެ. ބޭނުމަކީ މުޖުތަމައު ހޭލުންތެރި ކުރުވުމަށް މިސީރީޒްގެ އަލީގައި މެސެޖެއް ދިނުން" ރިޝްމީ ބުނެފައިވެއެވެ.

މީގެއިތުރުން ރިޝްމީ ބުނީ މިސީރީޒު 18 އަހަރުން މަތީގެ މީހުންނަށް ހަދާފައިވަނީ ސަބަބެއް އޮވެގެން ކަމަށާއި ޓީވީތަކުން ނުފެންނާނެ "އެހެނަސް" ހަމައެކަނި ފެންނާނީ ވެސް ފޯނުން ބައިސްކޯފު މެދުވެރިކޮށް ކަމަށެވެ.

"އެހެނަސް" އަކީ ބައިސްކޯފުގެ އެއްޗަކަށް ވީހިނދު މިފަދައިން އޭގެ ވީޑިއޯތައް ރިކޯޑުކޮށް މީސްމީޑިއާގައި އާއްމު ކުރުމަކީ ޤާނޫނީ ގޮތުން ކުށެއްކަން ވެސް ރިޝްމީ ފާހަގަ ކޮށްފައިވެއެވެ.