ނުވަދިހަ ނުވަ އަހަރަށް ތިލަފުށިން ބިން ވިއްކުމާމެދު ބަހުސް ކުރައްވަން، މެމްބަރުން ބޭނުންފުޅު ނުވި
ތިލަފުށިން ބިދޭސީންނަށް ބިން ވިއްކުން ހުއްޓާލުމަށް ސަރުކާރަށް ގޮވާލާ ރައްޔިތުންގެ މަޖިލީހަށް ހުށައެޅި ކުއްލި މައްސަލައަށް ބަހުސް ކުރަން ނުފެންނަ ކަމަށް މެމްބަރުން ވޯޓުން ފާސްވެއްޖެއެވެ.
ތިލަފުށިން ބިދޭސީންނަށް 99 އަހަރަށް ބިން ވިއްކުން ހުއްޓާލުމަށް ސަރުކާރަށް ގޮވާލައި، ރައްޔިތުންގެ މަޖިލީހުގެ ޤަވައިދުގެ 170ވަނަ މާއްދާގެ ދަށުން މި ކުއްލި މައްސަލަ މަޖިލީހަށް ހުޅައަޅާފައިވަނީ މަަޑުއްވަރީ ދާއިރާގެ މެންބަރު އާދަމް ޝަރީފެވެ.
މެމްބަރު އާދަމް ޝަރީފް ހުށަހެޅުއްވި ކުއްލި މައްސަލަގައި ވިދާޅުވީ ބިމުގެ ދަތިކަން މާލެ ސަރަހައްދުގައި ދިވެހި ވިޔަފާރިވެރިންނަށް ނުހަނު ބޮޑަށް މިހާރުވެސް ކުރިމަތިވެ ފައިވާއިރު، ބީލަމުގެ އުޞޫލުން ބިދޭސީންނަށް 99 އަހަރަށް ބިން ނުއަގުގައި ވިއްކުމަކީ އެކަމުގެ ނޭދެވޭ އަސަރު ދިވެހި ވިޔަފާރިވެރިންނަށާއި ރާއްޖޭގެ އިޤުތިޞާދަށް ވަރަށް ބޮޑަށް ކުރާނެކަމެއް ކަމަށެވެ.
އަދި ބިންގަތުމުގެ ވާދަވެރިކަމުގެތެރޭގައި، ޚާއްޞަކޮށް ކުދި އަދި މެދުފަންތީގެ ދިވެހި ވިޔަފާރިވެރިން ، ބިދޭސީންނާ ވާދަކުރަންޖެހޭ ފަދަ އުޞޫލެއް އެކުލަވާލައި، ދިވެހިންނެކޭ އެއްފަދައިން ބިދޭސީންނަށް ބިން ގަނެވޭނެގޮތެއް ހެދުމަކީ ދިވެހިންނަށް ވިޔަފާރީގެ ފުރުޞަތުތައް ހަނިވެ، ކުރިމަގުގައި ރާއްޖޭގެ ވިޔަފާރިތައް ކޮންޓްރޯލު ކުރުމުގެ ބާރު ބޭރު މީހުންގެ އަތްމައްޗަށް ދިއުމުގެ ދޮރު ހުޅުވިގެންދާނެ ކަމެއްކަމަށެވެ.
"ވަގުތީ މަންފާއެއް ހޯދުމުގެ ބޭނުމުގައި ނުވަތަ ރިޔާސީ އިންތިޙާބަށް ސަރުކާރުން ނުފޫޒު ފޯރުވުމަށް ބޭނުންވާ ފައިސާ ހޯދުމުގެ ނިޔަތުގައި، ގްރޭޓަރ މާލެއިން ބިދޭސީންނަށް 99 އަހަރަށް ބިން ނުއަގުގައި ވިއްކުމަކީ ކުރިމަގުގައި ރާއްޖޭގެ އިޤުތިޞާދަށް އެކަމުގެ ނޭދެވޭ އަސަރު ވަރަށް ބޮޑަށް ކުރާނެ ކަމަކަށް ވާތީވެ،
ކ.ތިލަފުށިން ބިދޭސީންނަށް 99 އަހަރަށް ބިން ވިއްކުން ހުއްޓާލުމަށް ސަރުކާރަށް ގޮވާލައި، ރައްޔިތުންގެ މަޖިލީހުގެ ޤަވައިދުގެ 170ވަނަ މާއްދާގެ ދަށުން މި ކުއްލި މައްސަލަ ހުށައަޅަމެވެ." މެމްބަރު އާދަމް ޝަރީފް ހުށަހެޅުއްވި މައްސަލައިގައިވެއެވެ.
މިމައްސަލަ އަށް ބަހުސް ކުރަން ފެންނަކަމަށް ވޯޓު ދެއްވީ 9 މެމްބަރުންނެވެ. ވޯޓު ލުމުގެ ޝަރުތު ހަމަވާ 48 މެމްބަރުން މަޖިލީހުގައި ތިއްބެވި އިރު ވޯޓުގައި ބައިވެރިވެވަޑައިގެންފައިވަނީ، 45 މެމްބަރުންނެވެ.ބަހުސް ކުރަން ނުފެންނަކަމަށް 36 މެމްބަރުން ވަނީ ވޯޓް ދެއްވައިފައެވެ.
