ތުރުކީއަށް ހަދިޔާ ކުރަން ނިންމި ބައި މިލިއަން މަސްދަޅުގެ ފުރަތަމަ ބެޗު ފޮނުވައިފި

ތުރުކީ-ސީރިއާ ބޯޑަރު ސަރަހައްދަށް މިދިޔަ މަހުގައި އައި ބާރުގަދަ ބިންހެލުންތަކާ ގުޅިގެން، ދިވެހި ސަރުކާރުން އިންސާނީ އެހީގެ ގޮތުގައި ތުރުކީއަށް ފޮނުވުމަށް ނިންމި 500،000 މަސްދަޅުގެ ފުރަތަމަ ބެޗު މިއަދު އެ ގަމަށް ފޮނުވައިފިއެވެ.

Ads by MWSC

ފޮރިން މިނިސްޓްރީން މިއަދު ނެރުއްވި  ބަޔާނެއްގައި ވިދާޅުވީ، ދިވެހި ސަރުކާރުގެ ފަރާތުން ތުރުކީއަށް ދޭ އެހީގެ ފުރަތަމަ ބެޗު ހަވާލުކޮށްދެއްވީ ފޮރިން ސެކްރެޓަރީ އަޙުމަދު ލަތީފެވެ.

އަދި އަންނަ ހުކުރު ދުވަހުގެ ނިޔަލަށް 500،000 މަސްދަޅު ތުރުކީއަށް ފޮނުވައި ނިންމާލެވޭނެ ކަމަށްވެސް މިނިސްޓްރީން މަޢުލޫމާތު ދެއްވައެވެ.

ބިންހެލުންތަކާ ގުޅިގެން ރައީސް އިބްރާހީމް މުޙައްމަދު ޞާލިޙު ވަނީ، ތުރުކީ-ސީރިއާއަށް އެއް މިލިއަން މަސްދަޅު ހަދިޔާ ކުރައްވަން ނިންމަވައިފައެވެ. ސީރިއާއަށް މަސްދަޅު ފޯރުކޮށްދެވޭނެ ތާރީޚެއް ސަރުކާރުން ހާމައެއް ނުކުރައްވައެވެ.

މިދިޔަ މަހުގެ ހަވަނަ ދުވަހު ތުރުކީއާ ސީރިއާގެ އައި ބާރުގަދަ ބިންހެލުމާ ގުޅިގެން، އެ ދެ ޤައުމުން މިހައިތަނަށް 50،000އަށް ވުރެ ގިނަ މީހުން މަރުވެ، 1.5 މިލިއަން މީހުންގެ ގެދޮރު ވަނީ ގެއްލިފައެވެ.