ކައުންސިލަރުންނާއި އެލްޖީއޭގެ އޮފިޝަލުން ތަމްރީންވާން އިންޑިއާއަށް!
ދެ ހަފުތާގެ މުއްދަތަށް ކެޕޭސިޓީ ބިލްޑިންގ ޓްރެއިނިންގ ޕްރޮގްރާމެއްގައި ބައިވެރިވުމަށް އިންޑިއާގެ ހައިދަރުއާބާދުގެ އެން.އައި.އާރް.ޑީ.ޕީ.އާރުއަށް ދަތުރުކުރުމަށް ހަމަޖެހިފައިވާ ރަށްރަށުގެ ކައުންސިލްތަކުގެ މަންދޫބުންނާއި އެލްޖީއޭގެ އޮފިޝަލުން ހިމެނޭ 2 ވަނަ ބެޗް ފޮނުވުމުގެ ރަސްމިއްޔާތެއްވަނީ އިއްޔެ ބާއްވަފިއެވެ.
ރަތަމަ ބެޗްގައި 20 އަތޮޅު ކައުންސިލްތަކުގެ މަންދޫބުންނާއި އެލްޖީއޭގެ އޮފިޝަލުން ހިމެނޭހެންވަނީ ހައިދަރުއާބާދުގެ އެން.އައި.އާރް.ޑީ.ޕީ.އާރްއަށް 19-31 ޑިސެމްބަރަށް ދަތުރުކޮށްފައިވެއެވެ.
ރަސްމިއްޔާތުގައި އިންޑިއާގެ ސަފީރު މުނޫ މަހާވާރުދެއްކެވި ވާހަކަފުޅުގައި، ޤާބިލުކަން އިތުރުކުރުމުގެ ދާއިރާއިން އިންޑިއާއި ރާއްޖޭގެ ގުޅުން ފުޅާވެފައިވާކަން ފާހަގަކުރެއްވިއެވެ. އަދި ލާމަރުކަޒީ އުޞޫލުން ހިންގުމުގެ ދާއިރާއިން އިންޑިޔާގެ ތަޖުރިބާއިން ބެސްޓް ޕްރެކްޓިސްތައް ދަސްކުރުމަށާއި ، ރާއްޖޭގައި ޕްރެކްޓިސްކުރާ މި ދާއިރާއިން އެންމެ ރަނގަޅު ގޮތްތަކާއި ތަޖުރިބާ ޙިއްޞާކުރެއްވުމަށް ސަފީރު އިލްތިމާސްކުރެއްވިއެވެ.
އެލް.ޖީ.އޭ.ގެ ޗީފް އެގްޒެކެޓިވް އޮފިސަރ (ސީއީއޯ) އަލްފާޟިލާ އަފްޝަން ލަޠީފް ދެއްކެވި ވާހަކަފުޅުގައި، އިންޑިޔާ ސަރުކާރަށާއި އެން.އައި.އާރު.ޑީ.ޕީ.އާރު.އަށް ޝުކުރު އަދާކުރެއްވިއެވެ. އެކަމަނާ ވަނީ މި ފުރުސަތުގެ ބޭނުން އެންމެ ފުރިހަމަގޮތުގައި ހިފުމަށާއި އެނބުރި އައުމަށްފަހު އެކުގައި މަސައްކަތްކުރާ ކުދިންނާ ޙިއްޞާކުރެއްވުމަށް ބާރުއަޅުއްވާފައެވެ.
ހައިދަރުއާބާދުގެ އެން.އައި.އާރް.ޑީ.ޕީ.އާރުގައި 2 ހަފުތާގެ މުއްދަތަށް ކުރިއަށް ގެންދާ މި ދަތުރުފުޅުގައި، ލާމަރުކަޒީ ނިޒާމާއި ލޯކަލް ގަވަރނަންސްއާ ގުޅުންހުރި މައުޟޫޢުތަކުގެ ތެރެއިން ސެލްފް ގަވަރނަންސް އެންޑް ގުޑް ގަވަރނަންސް، ލޯކަލައިޒޭޝަން އޮފް އެސް.ޑީ.ޖީ، ސަރވިސް ޑެލިވަރީ، ސިސްޓަމްސް ފޮރ ރިޑްރެސަލް އޮފް ޕަބްލިކް ގްރިވެންސަސް، ސޯޝަލް ޕްރޮޓެކްޝަން އެންޑް ސޯޝަލް ކޯޒޭޝަން، ޕްލޭނިންގ، ރެވެނިއު، ފައިނޭންޝަލް އެމް.ޖީ.ޓީ. އަކްކައުންޓިން އެންޑް އޮޑިޓް، ވިމެން އެމްޕަވަރމަންޓް، ރޯލް އޮފް އެޑިއުކޭޝަން އިން ލޯކަލް ގަވަރނަންސް، ގްރޫޕް ޑައިނަމިކްސް، ލޭންޑް ޔޫސް ޕްލޭނިންގ، ވޭސްޓް އެމްޖީޓީ، ފިޝަރީޒް، ރިނިއުބަލް އެނަރޖީ ފަދަ ކަންކަން ހިމެނެއެވެ. މީގެ އިތުރުން ހައިދަރުއާބާދުގެ ސަޤާފަތާއި ތަރިކައާއި ބެހޭ ތަންތަން ބަލައިލުމަށްހަމަޖެހިފައިވެއެެވެ.
ވޭތުވެދިޔަ 4 އަހަރާއި ބައިގެ ތެރޭގައި 2000 އަށްވުރެ ގިނަ ދިވެހި އެކުވެރިން ވަނީ އިންޑިއާއަށް ޒިޔާރަތްކޮށް ތަފާތު އިން ޕަރސަން ޓްރެއިނިންގ ޕްރޮގްރާމްތަކުގައި ބައިވެރިވެފައިއެވެ. އޮންލައިންކޮށް ހިންގާ ތަމްރީނު ޕްރޮގްރާމްތަކުގައި ވެސް މިވަރަށް ދިވެހިން ވަނީ ބައިވެރިވެފައެވެ.
ޔޫނިއަން މިނިސްޓްރީ އޮފް ރޫރަލް ޑިވެލޮޕްމަންޓްގެ ދަށުން ހިންގާ އަމިއްލަ ޖަމްޢިއްޔާއެއް ކަމުގައިވާ އެން.އައި.އާރް.ޑީ.ޕީ.އާރް އަކީ ރޫރަލް ޑިވެލޮޕްމަންޓާއި ޕަންޗަޔަތީ ރާޖްގެ ނެޝަނަލް ސެންޓަރ އޮފް އެކްސެލެންސްގެ އެންމެ އިސް މަރުކަޒެކެވެ. މިއީ ޔޫއެން-އެސްކޭޕް ސެންޓަރ އޮފް އެކްސެލެންކް ގޮތުގައި ބައިނަލްއަޤްވާމީ ފެންވަރުގައި ބަލައިގަނެފައިވާ ތަނެކެވެ. އެ މަރުކަޒުގެ މެދުވެރިވެ ރޫރަލް ޑިވެލޮޕްމަންޓް އޮފިޝަލުންނާއި، ޕީއާރުއައިގެ އިންތިޚާބީ މަންދޫބުންނާއި، ބޭންކަރުންނާއި، އެންޖީއޯތަކާއި، އެހެނިހެން ސްޓޭކްހޯލްޑަރުންގެ ޤާބިލުކަން އިތުރުކޮށްދެނީ ތަމްރީނާއި، ދިރާސާކުރުމާއި ކޮންސަލްޓެންސީގެ އިންޓަރ ރިލޭޓެޑް ޙަރަކާތްތަކުގެ ތެރެއިންނެވެ.
