ޝްރައްދާއާއެކު އިވެންޓުތަކަށް ދާން އާލިއާ ރަންބީރަށް މަނާކުރީތަ؟
ލަވް ރާންޖަންގެ ރޮމޭންޓިކް ކޮމެޑީ "ތޫ ޖޫޓީ މޭ މައްކާރް" ރިލީޒްވާން ދަނީ ތައްޔާރުވަމުންނެވެ. މި ފިލްމުގައި ފުރަތަމަ ފަހަރަށް އެކްޓަރު ރަންބީރު ކަޕޫރާއި ބަތަލާ ޝްރައްދާ ކަޕޫރު އެކީގައި ފެނިގެންދާނެއެވެ. މި ދެތަރިން ލަވް އާއިއެކު މަސައްކަތް ކުރާވެސް މިއީ ފުރަތަމަ ފަހަރެވެ.
ފިލްމު ޕްރޮމޯޓު ކުރުމުގެ ހަރަކާތްތައް އިންޑިއާގެ އެކި ހިސާބުތަކުގައި ކުރިއަށް ގެންދާއިރު، އެއް ކަމެއް ފާހަގަވެއެވެ. ޕްރޮމޯޝަން ހަރަކާތްތަކަށް ރަންބީރާއި ޝްރައްދާ ދަނީ ވަކިވަކިންނެވެ. އެއްވެސް ހަރަކާތެއްގައި ދެތަރިން އެކީގައެއް ނުފެނެއެވެ.
އިންޑިއާ މީޑިއާތަކުން ދަނީ މިކަމާމެދު ސުވާލު އުފައްދަމުންނެވެ. ރަންބީރު ބައިވެރިވި ހަރަކާތެއްގެ ތެރެއިން ނޫސްވެރިޔަކު ވަނީ ޝްރައްދާއާއިއެކު އެއްވެސް އިވެންޓެއްގައި ރަންބީރު ނުފެންނަނީ އާލިއާ މަނާކޮށްފައި އޮތީމަތޯ ސުވާލުކޮށްފައެވެ. ޖަވާބުގައި ރަންބީރު ބުނީ އެއީ ދޮގު ވާހަކައެއް ކަމަށެވެ.
"އޭނާ (އާލިއާ) މަނާ ކުރަންވީ ކީއްވެ؟ އެކަހަލަ ވާހަކައެއް މީހަކު ނުދައްކާ. ތިއުޅެނީ އަމިއްލައަށް ކޮންމެވެސް ވާހަކައެއް ހަދައިގެން. މިވަގުތު އަހަރެންގެ ދިރިއުޅުމާ ގުޅޭގޮތުން މީހަކު އެއްވެސް ވާހަކައެއް ނުދައްކާ" ހިނި އައިސްފައި ހުރެ ރަންބީރު ޖަވާބު ދިނެވެ.
ބައެއް މީޑިއާތަކުން ރިޕޯޓު ކުރާ ގޮތުގައި ރަންބީރާއި ޝްރައްދާ ވަކިވަކިން އިވެންޓުތަކަށް ފޮނުވަން ނިންމީ ފިލްމުގެ ޕްރޮޑިއުސަރުންނެވެ. އެއީ ދެމީހުންގެ ކެމިސްޓްރީ ހަމައެކަނި ސްކްރީނުން ބަލަން ބެލުންތެރިންނަށް ފުރުސަތު ދިނުމުގެ ގޮތުންނެވެ.
ކައިވެނި ކުރުމުގެ ކުރިން ރަންބީރަކީ ބޮލީވުޑްގެ ގިނަ ބަތަލާއިންނާއިއެކު ލޯބީގެ ގުޅުން ބޭއްވި އެކްޓަރެކެވެ. ބައެއް ބަތަލާއިންނާއި ރަންބީރާއި މައްސަލަވެސް ޖެހުނެވެ. އެހެންނަމަވެސް 2018 ވަނަ އަހަރު އާލިއާ އާއި ލޯބީގެ ގޮތުން ގުޅުނު ފަހުން ރަންބީރުގެ މިފަދަ ކަމެއް ހިނގިކަމުގެ އަޑެއް ނުފެތުރެއެވެ.
Ads by STO
