ތުނީޝާގެ މަރަށްފަހު ޝިޒާން ފުރަތަމަ ފަހަރަށް މީޑިއާއަށް:"ދުނިޔޭގައި ހުރިނަމަ އަހަންނަށްޓަކައި "ފައިޓު" ކުރީސް"
މިދިޔަ ޑިސެމްބަރު މަހުގެ 24 ވަނަ ދުވަހު އަމިއްލައަށް މަރުވި ބޮލީވުޑްގެ ބަތަލާ ތުނީޝާ ޝަރުމާގެ މަރުގެ މައްސަލައާއި ގުޅިގެން ހައްޔަރު ކުރި އޭނާގެ ކުރީގެ ލޯބިވެރިޔާ ޝީޒާން ޚާން ކަފާލާތުގެ ދަށުން ޖަލުން ދޫކޮށްލައިފިއެވެ.
މިދިޔަ ހޮނިހިރު ދުވަހު ކަފާލާތުގެ ދަށުން މިނިވަން ވުމަށްފަހު އޭނާ ވަނީ ތުނީޝާގެ މަރަށްފަހު ފުރަތަމަ ފަހަރަށް މީޑިއާއާއި ވާހަކަ ދައްކާފައެވެ. މިގޮތުން ޓައިމްސް އޮފް އިންޑިއާއަށް ދިން އިންޓަވިއުއެއްގައި ޝީޒާން ބުނީ މިނިވަންކަމުގެ ހަގީގީ މާނަ މިއަދު އޭނާއަށް ވިސްނޭއިރު، އެކަން އިހުސާސް ކުރެވޭކަމަށެވެ.
"އެންމެ ފަހުން އަހަރެން މިހުރީ އަހަރެންގެ ޢާއިލާއާއެކު. ދުވަސްކޮޅަކަށް އަހަރެން ބޭނުންވަނީ މަންމަގެ ކޮނޑުގައި އޮށޯވެ އޮންނަން، މަންމަ ތައްޔާރުކުރާ ކާއެއްޗެހި ކެއުމާއި، ކޮއްކޮމެންނާއި އެކު ވަގުތު ހޭދަކުރުމަށް" ޝީޒާން ބުންޏެވެ.
ތުނީޝާ މަރުވުމުގެ 15 ދުވަސް ކުރިން އޭނާ އާ ގުޅުން ކަނޑާލުމާއި ބެހޭގޮތުން ވާހަކަ ދައްކަމުން ޝީޒާން ބުނީ އޭނާމަތިން ވަރަށް ހަނދާންވާކަމަށެވެ.
"އަހަރެން އޭނަ މަތިން ވަރަށް ހަނދާންވޭ، ދިރިހުރިނަމަ އަހަރެންގެ ހައްގުގައި ތެދުވެ "ފައިޓު" ކުރީސް" ޝީޒާން ބުންޏެވެ.
މިދިޔަ ޑިސެމްބަރު މަހުގެ 24 ވަނަ ދުވަހު ތުނީޝާ ޝަރުމާ މަރުވީ ސަބް ޓީވީގެ މަޝްހޫރު ޝޯ "އަލީ ބާބާ" ގެ ސެޓުގައި ދަންޖެހިގެންނެވެ. ތުނީޝާ މަރުވިތާއެއް ދުވަސް ފަހުން ތުނީޝާގެ މަންމަ ވަނީ އޭނާގެ ކުރީގެ ލޯބިވެރިޔާ ޝީޒާން ޚާންއާ ދެކޮޅަށް އަމިއްލައަށް މަރުވާން ތުނީޝާއަށް ހިތްވަރު ދިނުމުގެ މައްސަލައެއް ހުށަހަޅައިފައެވެ. އެއާއެކު ޑިސެމްބަރު މަހުގެ 25 ވަނަ ދުވަހު އޭނާ ހައްޔަރުކޮށް ގާތްގަނޑަކަށް 70 ދުވަސް ވަންދެން ޖަލުގައި ހުރުމަށްފަހު ޝީޒާންއަށް އެންމެ ފަހުން ވަނީ ކަފާލާތު ލިބިފައެވެ.
