ރިޝްވަތު ނަގާ ވަރަށްވުރެ އަޅުގަނޑުމެން ތަހުޒީބު ވެއްޖެ: ޖާބިރު
ރިޝްވަތު ނަގާ ވަރަށްވުރެ ދިވެހި މިހާރު ތަހުޒީބު ވެފައިވާކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
ޖާބިރު ވިދާޅުވީ ލާރި ހިފައިގެން ދިޔައީމައި ލާރި ބޭނުން ނޫންކަމަށް ބުނާ ކަމަށާއި އެމީހުން ބޭނުންވަނީ އެމީހުންގެ ހައްޤުގައި މަޖިލީހުގައި ވަކާލާތު ކުރަން ކަމަށެވެ.
"މީހުން އެބަބުނޭ ލާރި ހިފައިގެން ދިޔައީމަ، ޖާބިރުއޭ ލާރި ބޭނުމެއް ނޫނޭ ތިމަންނަމެނެއް. ކީއްކުރަންގެނައި ލާރި އެއްހޭ. މަޖިލީހުގައި ވާހަކަ ދައްކާށޭ ގޮސް ތިމަންނަމެންގެ ހައްޤުގައި ވަކާލާތު ކުރާށޭ" ޖާބިރު ވިދާޅުވިއެވެ.
އެފަދަ މެމްބަރުން މިހާރުގެ މަޖިލީހުގައިވެސް ފެންނަން އެބަތިބި ކަމަށާއި ވާހަކަ ނުދައްކާ ތިއްބަވަނީ އެ މެމްބަރުން ކަން ޖާބިރު ވަނީ ފާހަގަކުރައްވާފައެވެ.
"ތިމަންނާމެނަށް ލާރިކޮޅެއްދީފައި ގޮސް މަޖިލީހުގައި އަނގައިން ނުބުނެ ފަސް އަހަރު ހަމަކޮށްފައިތިބި މެމްބަރުން އެބަތިއްބޭ. މިހާރުވެސް މިތާނގައިވެސް އެ މެމްބަރުން ތިބި ކަމަށް އަޅުގަނޑުމެންނަށް އެބަ ފެނޭ މެމްބަރުންގެ ނަން ކިޔުމަކީ ހަޑިކަމެއްތާ ވާހަކަ ނުދައްކާ މެމްބަރުންނަކީ އެއީ އެ މެމްބަރުން ރައްޔިތުންގެ ހައްޤުގައި ވަކާލާތު ނުކުރާ މެމްބަރުންނަކީ އެ މެމްބަރުން" ޖާބިރު ވިދާޅުވިއެވެ.
ޖާބިރު އެހެން ވިދާޅުވީ އިންތިޚާބުތަކާބެހޭ އާންމު ގާނޫނަށް ސަރުކާރުގެ ފަރާތުން ހުށަހެޅި އިސްލާހުތަކުގެ އިބްތިދާއީ ބަހުސްގައި މިއަދުގެ މަޖިލީހުގައި ވާހަކަފުޅު ދައްކަވަމުންނެވެ.
އިންތިހާބުތަކުގައި ކެންޑިޑޭޓުންގެ ވައުދާއި ރިޝްވަތު ވަކިކުރުމަށް އިންތިޚާބުތަކާބެހޭ އާންމު ގާނޫނަށް އިސްލާހު ހުށަހެޅުއްވީ ހެންވޭރު އުތުރު ދާއިރާގެ މެންބަރު އިބްރާހީމް މުއިއްޒެވެ.
