ސައިފަށް 50 އަހަރު ފުރުން: ހަމައެކަނި ގާތް މީހުންނާއެކު ފާހަގަ ކުރިޔަސް ފޮޓޯތައް އާއްމުކޮށްފި
ބޮލީވުޑްގެ އެކްޓަރ ސައިފް އަލީ ޚާން އަށް 50 އަހަރު ފުރުން ރޭ ފާހަގަ ކޮށްފިއެވެ.
ސައިފް އާއި އޭނާގެ އަނބިމީހާ ، މަޝްހޫރު ބަތަލާ ކަރީނާ މުމްބާއީ ގައި ދިރިއުޅޭ އެމީހުންގެ ގޭގައި އުފަންދުވަހުގެ ޕާޓީ ބާއްވާފައިވާއިރު، ޕާޓީގައި ބައިވެރިވެފައިވަނީ ހަމައެކަނި އާއިލާ މީހުންނާއި އެދެމަފިރިންގެ ގާތް މީހުންނެވެ.
ނަމަވެސް ޕާޓީގެ ބައެއް ފޮޓޯތައް އެމީހުންވަނީ ސޯޝަލް މީޑިއާގައި އާއްމުކޮށްފައެވެ.
ރިޕޯޓުތަކުން ބުނެފައިވާ ގޮތުގައި ސައިފު އަށް އެޕާޓީ ބާއްވާ ދިނީ އޭނަގެ އަންހެނުން ކަރީނާ ކަޕޫރް ޚާން އެވެ. ޕާޓީގައި ކަރިސްމާ ކަޕޫރާއި އަމްރިތާ އަރޯރާ އަދި އޭނަގެ ފިރިމީހާ ވެސް ވަނީ ބައިވެރިވެފައިވެއެވެ.
ކަރީނާ ގޮވައިގެން ކޭކު ފަޅަން ތައްޔާރު ވެގެން ސައިފް ހުރި ފޮޓޯތަކަކާއި އާއިލާގެ އެކި މެންބަރުންނާއެކު ނަގާފައިހުރި ފޮޓޯތަކެއް އެމީހުން ވަނީ ސޯޝަލް މީޑިއާގައި އާއްމުކޮށްފައެވެ.
ސައިފު އާއި ކަރީނާ ކައިވެނި ކޮށްފައިވަނީ 2012 ވަނަ އަހަރުގައެވެ. އެދެމަފިރިންނަށް 2016 ވަނަ އަހަރު އެމީހުންގެ ފުރަތަމަ ދަރިފުޅު ލިބިފައިވާއިރު، މިހާރު ކަރީނާ އިނީ އެދެމަފިރިންގެ ދެވަނަ ދަރިއަށް ބަލިވެއެވެ.
ސައިފު ވަނީ މީގެ ކުރިން އަމްރިތާ ސިންގް އާއި ކައިވެނިކޮށް، ދެ ދަރިން ވެސް ލިބިފައެވެ.
