ފަލަސްތީނުގެ މަޝްރަހް: މިހާތަނަށް 30 މީހުން ޝަހީދުކޮށްލައިފި
މިދިޔަ އަންގާރަ ދުވަހުންފެށިގެން އިސްރާއީލުން ހުއްޓުމެއްނެތި ފަލަސްތީނަށް ދެމުން ގެންދާ ހަމަލާތަކުގައި މިހާތަނަށް ފަލަސްތީނުގެ 30 މީހުން ޝަހީދު ކޮށްލާފައިވާކަމަށް ރިޕޯޓްތައް ބުނެފިއެވެ.
އިސްރާއިލުން ފަލަސްތީނަށް ފޮނުވާލި ވައިގެ ހަމަލާތަކުގައި ޝަހީދުވި މީހުންގެ ތެރޭގައި އަންހެނުންނާއި ކުޑަކުދިން އަދި އިސްލާމިކް ޖިހާދުގެ ލީޑަރުން ހިމެނޭއިރު، ފަލަސްތީނުން ރައްދުގައި ދިން ރޮކެޓް ހަމަލާތަކުގައި އިސްރާއީލުގައި އެކަކު ވަނީ މަރުވެފައެވެ.
ޝަހީދުވި މީހުންގެ ތެރޭގައި ހަ ކުޑަކުދިންނާއި ތިން އަންހެނުންގެ އިތުރުން ފަލަސްތީނު އިސްލާމިކް ޖިހާދު (ޕީއައިޖޭ) ގެ ރޮކެޓް ފޯސްގެ ވެރިޔާ އާއި އޭނާގެ ޑެޕިއުޓީ ވެސް ހިމެނެއެވެ. މިހަމަލާތަކުގައި ޒަހަމްވީ މީހުންގެ އަދަދު ވަނީ 90 އަށް ވުރެ މައްޗައްގޮސްފައެވެ.
ފަލަސްތީނު އިސްލާމިކް ޖިހާދު ހަރަކާތުން އަންގާރަ ދުވަހު ކުރި އިއުލާނެއްގައި ބުނެފައި ވަނީ ވައިގެ ހަމަލާތަކުގައި އެ ޖަމާއަތުގެ ތިން ލީޑަރުން ޝަހީދުވެފައިވާ ކަމަށެވެ. ޝަހީދުވެފައިވަނީ ޖިހާދު އަލް ގަންނަމް އާއި ޚަލީލް އަލް ބަހްތީނީ ގެ އިތުރުން ތާރިގު އިއްޒު އަލްދީން އެވެ.
ފޭރިގަނެފައިވާ ފަލަސްތީނުގެ ބިންތަކުގައި ވަޒަންވެރިވެގަނެގެން އުޅޭ އިސްރާއިލުގެ މީހުންގެ ފަރާތުން ފަލަސްތީނުގެ ރައްޔިތުންނަށް ދަނީ މެދުކެނޑުމެއްނެތި އަނިޔާއާއި ދުއްތުރާކުރަމުންކަން ފާހަގަކޮށްލެވެއެވެ.
