އިޤްތިޞާދީ ކަމެއްގައި ރައީސް ޞާލިޙަށް ވާނުވާ ވެސް ނޭނގެ: އަލީ ހުސެއިން

މިއަދުގެ ސަރުކާރު ހިންގުމުގެ ބައެއް ކަންކަމުގައި ރައީސް އިބްރާހީމް މުޙައްމަދު ޞާލިޙްގެ ދައުރު ވަރަށް ކުޑަ ކަމަށް ވިދާޅުވެ, ރައީސް ޞާލިޙަށް, ޖޭޕީގެ ކެންދޫ ދާއިރާގެ މެންބަރު އަލީ ހުސެއިން ފާޑު ވިދާޅުވެއްޖެއެވެ.
ސަލްޓަން ޕާކްގައި ރޭ އޮތް, ޖުމްހޫރީ ޕާޓީގެ ކެނޑިޑޭޓް ޤާސިމް އިބްރާހީމްގެ ކެންޕެއިން ޖަލްސާގައި ވާހަކަފުޅު ދައްކަވަމުން އަލީ ހުސެއިން ވިދާޅުވީ, ރާއްޖޭގެ ބައެއް ދާއިރާތަކުގައި ކަން ހިނގާގޮތް ރައީސް ޞާލިޙަށް އެނގި ވަޑައިނުުގަންވާ ކަމަށެވެ. އެ ގޮތުން ޚާރިޖީ ދާއިރާއާއި އިޤްތިޞާދީ ދާއިރާއިން މިސާލު ނެންގެވިއެވެ.
“ހާރިޖީ ވަޒީރު ނިންމަވަނީ މިގައުމުގެ ގުޅުން ގާއިމު ކުރާނީ ކޮން ބަޔަކާތޯ. ރާއްޖެ އާއި އީރާނާ ގުޅުން އަލުން ގާއިމްކުރަން ޖެހޭނެކަން ނިންމެވިކަމުގެ ޓުވީޓް ކުރެއްވީ ކޮން ބޭފުޅެއްތޯ. ހާރިޖީ ވަޒީރު. ރައީސުލްޖުމްހޫރިއްޔާއާ ބެހޭ ކަމެއްވެސް ނޫން. ރައީސް ނުވެސް ދެނަހުރި.“ ޚާރިޖީ ވަޒީރު ޝާހިދުގެ ނިންމުންތައް, ރައީސް ޞާލިޙަށް ނާންގަވާ ކަމަށް ތުހުމަތު ކުރައްވަމުން އަލީ ހުސެއިން ވިދާޅުވިއެވެ. އަދި ވިދާޅުވީ, އިޤްތިޞާދީ ކަމަކާ ޖެހުމުން ރައީސް ޞާލިޙަށް ވާނުވާ ވެސް އެނގި ވަޑައިނުގަންނަވާ ކަމަށެވެ.
"އިޤްތިޞާދީ ކަންކަމާ ޖެހުނީމައި ރައީސުލްޖުމްހޫރިއްޔާއަށް ވާނުވާ ނުވެސް އެނގޭ."
ރޭގެ ޖަލްސާގައި ވާހަކަ ދެއްކެވި ހުރިހާ ބޭފުޅުން ވެސް ވަނީ ރައީސް ޞާލިޙަށް ވަރަށް ބޮޑަށް ފާޑު ވިދާޅުވެފައެވެ. އަދި ވިދާޅުވަމުން ގެންދެވީ ރާއްޖެއަށް ބޭނުންވަނީ އެ ޕާޓީގެ ރިޔާސީ ކެނޑިޑޭޓް ޤާސިމް އިބްރާހީމްފަދަ ވެރިއެއް ކަމަށެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.