ރާއްޖެ ހިމެނޭހެން ބައެއް ގައުމުތަކަށް ޓްރެވަލް އެޑްވައިޒަރީ ނެރެފި

ޓެރަރިޒަމްގެ ނުރައްކާ އޮތުމުން ރާއްޖެ ހިމެނޭހެން، މި ސަރަހައްދުގެ ބައެއް ގައުމުތަކަށް ޓްރެވެލް އެޑްވައިޒަރީ ނެރެފިއެވެ.

ރާއްޖޭގައި ހުންނަވާ އިނގިރޭސިވީލާތުގެ ސަފީރު ކެރޮލިން ރޮސްލާ ވިދާޅުވީ ޓްރެވަލް އެޑްވައިޒަރީއަކީ ހަމައެކަނި ރާއްޖެއަށް އަމާޒުކޮށް ނެރުނު އެޑްވައިޒަރީއެއް ނޫންކަމަށާއި އެއީ މި ސަރަހައްދުގެ ގައުމުތަކަށް ބަލައި ނެރުނު އެޑްވައިޒަރީއެއް ކަމަށެވެ.

އެމެރިކާގެ ޓްރެވެލް އެޑްވައިޒަރީސް ވެބްސައިޓުގައިވާ ގޮތުން މިދިޔަ ހުކުރު ދުވަހު ވަނީ ރާއްޖެ އާއި އިންޑިއާ އަދި ލަންކާއަށް ދަތުރުކުރުމަށް ނެރެފައިވާ އެލާޓް، ލެވެލް 2 އަށް އަރައިފައެވެ.

މިގޮތަށް އިނގިރޭސި ވިލާތުން ޓްރެވަލް އެޑްވައިޒްރީ ނެރެފައިވާއިރު ދާދިފަހުން ރައީސް ނަޝީދަށް އަމާޒު ކުރި ބޮމުގެ ހަމަލާއާއި މީގެ އިތުރުންވެސް ހަރުކަށި ފިކުރުގެ މީހުންނަށް ތުހުމަތުކުރާ ގިނަ މައްސަލަތަކެއް އެބަހުއްޓެވެ.