މޯދީއަށް ފުރައްސާރަކުރުމުން ސަރުކާރުން އެކަންކުށްވެރިކޮށްފި

އިދިކޮޅު ޕީޕީއެމް-ޕީއެންސީ ކޯލިޝަނުން އިއްޔެ ކުރިއަށްގެން ދިޔަ ސިޔާސީ ހަރަކާތުގެ ތެރެއިން އިންޑިއާގެ ބޮޑުވަޒީރު ނަރެންދުރަ މޯދީގެ މާސްކު އަޅައި މާލި ހެދިގެން އުޅެފައިވަނީ, ނަފްރަތާއި ރުޅިވެރިކަން އެ ކެމްޕޭނުގެ ތެރެއިން ފެތުރުމަށް ކަމަށް ބުނެ ސަރުކާރުން އެކަން ކުށްވެރިކޮށްފިއެވެ.

Ads by MWSC

އެކަމާ ގުޅިގެން ފޮރިން މިނިސްޓްރީން ނެރުނު ބަޔާނެއްގައި ވަނީ "އިންޑިއާ އައުޓް" ކެމްޕޭން ބޭނުންކޮށްގެން ހިންގި އެ ހަރަކާތް ކުށްވެރިކޮށްފައެވެ.

އެ ބަޔާނުގައި އިތުރަށް ބުނެފައިވަނީ, އީދަކީ ސުލްހަ އާއި ހަމަޖެހުމާއެކު ފާހަގަކުރަންޖެހޭ މުނާސަބަކަށް ވީއިރު އިދިކޮޅުން ހިންގި ހަރަކާތުގައި ނަފްރަތު އުފެއްދުމުގެ އިތުރުން ރާއްޖެއާ ގާތް ގުޅުމެއް ބާއްވަމުންދާ ގައުމަކާ އެކީ އޮތް ގުޅުމަށް ބުރޫއަރާ ފަދަ ކަންތައްތަކެއް ވެސް ހިންގާފައިވާ ކަމަށެވެ.

އަދި ފާއިތުވި ފަސް އަހަރު އިންޑިއާ އާއި ރާއްޖޭގެ ގުޅުން އާ އުސްމިންތަކަކަށް ދަތުރުކޮށްފައިވާއިރު މިފަދަ ދަށު ދަރަޖައިގެ އަމަލުތަކުން ދުރުވެ ދެ ގައުމުގެ ގުޅުމަށް ބުރޫއަރާ ފަދަ އަސްލެއް ނެތް ވާހަކަތައް ނުފެތުރުމަށް ސަރުކާރުން ވަނީ ގޮވާލައިފައެވެ.

އޭގެ އިތުރުން, އިންޑިއާ އަކީ އަބަދުވެސް ރާއްޖޭގެ އެންމެ ގާތް އެކުވެރިޔާ ކަމަށާއި އަބަދުވެސް "އިންޑިއާ ފަސްޓް" ސިޔާސަތު ދަމަހައްޓާނެ ކަމުގެ ޔަގީންކަން ވެސް ސަރުކާރުން ވަނީ ދީފަ އެވެ.