ޕާކިސްތާނުގައި ގޮއްވާލި ބޮމުގައި މަރުވި މީހުންގެ އަދަދު 63އަށް
ޕާކިސްތާނުގައި ދިން ބޮމުގެ ހަމަލާއެއްގައި މަރުވި މީހުންގެ އަދަދު 63 އަށް އަރާފައިވާ ކަމަށް އޮފިޝަލުން ބުނެފި އެވެ.
ޕާކިސްތާނުގެ ހުޅަނގު އުތުރުގައި އޮންނަ ޓްރައިބަލް ޑިސްޓްރިކްޓް ކަމަށްވާ ބަޖާއުރުގައި ދީނީ ސިޔާސީ ޕާޓީ ޖަމިއްޔަތު އުލަމާއީ އިސްލާމް ފަޒާލް (ޖޭޔޫއައި-އެފް) ގެ އެއްވުމެއްގައި ބައިވެރިވި މީހުންނަށް އަމާޒުކޮށް މިދިޔަ އާދީއްތަ ދުވަހު ބޮން ގޮއްވާލި އެވެ.
ޕާކިސްތާނުގެ އަސްކަރިއްޔާއިން ވަނީ 2016 ވަނަ އަހަރު ޕާކިސްތާނުގެ ތާލިބާނުންނާ ދެކޮޅަށް އެ ޑިސްޓްރިކްޓް ބަޣާވާތްކުރި މީހުންގެ ކިބައިން ސާފުކޮށް ކަނޑައެޅުމުގެ ކުރިން އެ ސަރަހައްދުގައި އެތައް އަހަރެއް ހޭދަކޮށްފަ އެވެ.
ބަޖާއުރުގައި ހުންނަ ސަރުކާރު ހޮސްޕިޓަލްގެ ތަރުޖަމާނު ލިއަކަތު އަލީ ބުދަ ދުވަހު ވިދާޅުވީ ބޮމުގެ ހަމަލާގައި މިހާތަނަށް 63 މީހުން މަރުވެފައިވާ ކަމަށެވެ.
އަފްޣާނިސްތާނުގެ ބޯޑަރު ކައިރީގައި ދިން ހަމަލާގައި ޒަހަމްވި އިތުރު 123 މީހަކަށް ފަރުވާ ދެމުން އަންނަ ކަމަށް ހޮސްޕިޓަލުގެ އޮފިޝަލަކު ވިދާޅުވި އެވެ.
އަލީ ވިދާޅުވީ ޒަހަމްވި ބައެއް މީހުންނަށް ޚައިބަރު ޕަޚްތޫންޚުވާ ޕްރޮވިންސްގެ ވެރިރަށް ޕިޝާވަރުގެ ހޮސްޕިޓަލްތަކުގައި ފަރުވާ ދެމުން އަންނަ ކަމަށެވެ.
މައުލާނާ ފަޒްލޫރު ރަހްމާން އިސްކޮށް ހުންނަވާ ޖޭޔޫއައި-އެފްގެ ސަޕޯޓަރުންގެ އެއްވުމަކަށް ދިން ހަމަލާގެ ޒިންމާ އައިއެސްއައިއެލް (އައިއެސް) ގެ ހަތިޔާރު އެޅި ޖަމާއަތުން ވަނީ އުފުލާފަ އެވެ.
