ވޯޓުން ނިންމާ ނިންމުމެއްގެ ސަބަބުން އިޔާދަ ނުކުރެވޭ ވަރުގެ ގެއްލުމެއް ލިބިދާނެ: ސެމްބެ
އަންނަ ހޮނިހިރު ދުވަހު ބާއްވާ ރިޔާސީ އިންތިޚާބުގައި، ވޯޓުލައި ނިންމާ ނިންމުމެއްގެ ސަބަބުން އިޔާދަ ނުކުރެވޭ ވަރުގެ ގެއްލުމެއް ލިބިދާނެ ކަމަށް ޕީއެންސީގެ ރިޔާސީ ކެންޑިޑޭޓް، ޑރ.މުޙައްމަދު މުޢިއްޒުގެ ރަނިންމޭޓް، ޙުސައިން މުޙައްމަދު ލަތީފު(ސެމްބެ) ވިދާޅުވެއްޖެއެވެ.
މުޢިއްޒުގެ މެނިފެސްޓޯގައި އަންހެނުންނަށް ޚާއްސަ ކަންކަން އިޢުލާނު ކުރުމަށް މިރޭ ބޭއްވި އިވެންޓުގައި ސެމްބެ ވިދާޅުވީ، 9 ސެޕްޓެމްބަރުގައި، ރައްޔިތުން ނިންމަނީ ހަމައެކަނި ފަސް އަހަރަށް ނިންމާ ނިންމުމެއް ނޫން ކަމަށެވެ.
"އަޅުގަނޑުމެން ނިންމަން މިދަނީ، މިހާރުގެ ހާލަތު ވަޒަން ކޮށްލާނަމަ، ނިންމާ ނިންމުމެއްގެ ސަބަބުން، އިޔާދަ ނުކުރެވޭ ފަދަ ގެއްލުމަކާއި އަޅުގަނޑުމެން ކުރިމަތިލާން ޖެހިދާނެ. އިޖްތިމާއީ ފޭރާން، އަޅުގަނޑުމެންގެ އަތުން ގެއްލިގެން ހިނގައިދާނެ،" އޭނާ ވިދާޅުވިއެވެ.
ރައީސް ޔާމީންގެ ވެރިކަމުގައި އިގުތިސާދީ ގޮތުން ދިވެހީން ހަމަ އިސްކޮޅަށް ތެދު ކުރެއްވިކަން ފާހަގަކުރައްވައި ސެމްބެ ވިދާޅުވީ، ވޯޓުލާން ނުކުމެ ގޯސް ނިންމުމެއް ނިންމައިފިނަމަ، ފަރުދީ މިނިވަންކަން ވެސް ގެއްލިގެން ހިނގައިދާނެ ކަމަށެވެ.
"އިޖްތިމާއީ މިނިވަންކަމެއް ނޯންނާނެ، އިގްތިސާދީ މިނިވަންކަމެއް ނޯންނާނެ، މިފަދަ ޕޯޑިއަމްތަކުގައި ސިޔާސީ ހަރަކާތް ހިންގާކަށް ޖާގައެއް ނޯންނާނެ."
އޭނާ އިތުރަށް ވިދާޅުވީ ޕީޕީއެމް-ޕީއެންސީގެ މެނިފެސްޓޯ އެކުލަވައިލުމުގެ މަސައްކަތް މީގެ އެތައް ސަތޭކަ ދުވަސް ކުރިން ފެށުނު ކަމަށާއި، އެކަން ފެށުނީ އިދިކޮޅު ލީޑަރު، ރައީީސް ޔާމީންގެ ހާޒިރުގައި ކަމަށެވެ. އަދި އެ ފުރިހަމަ މެނިފެސްޓޯ ތަންފީޒު ކުރެވޭނެ، ޤާބިލު ޓީމެއް، ޕީޕީއެމް-ޕީއެންސީގައި އޮތް ކަމަށް ވެސް ވިދާޅުވިއެވެ.
ެ
