އިންތިޚާބީ ރައީސް ހުވާ ކުރައްވާނީ 17 ނޮވެންބަރު ވާ ހުކުރު ދުވަހު ހަވީރު, ޖުމްހޫރީ މައިދާނުގައި
އިންތިޚާބީ ރައީސް, ޑރ. މުޙައްމަދު މުޢިއްޒު ހުވާ ކުރެއްވުމަށް ހަމަޖެހިފައިވަނީ ނޮވެންބަރު މަހުގެ 17 ވަނަ ދުވަހުގައި ކަމަށް އިންތިޚާބީ ރައީސްގެ އޮފީހުގެ އިންތިޤާލީ ތަރުޖަމާނު މުޙައްމަދު ފިރުޒުލް ވިދާޅުވެއްޖެއެވެ.
އިންތިޚާބީ ރައީސްގެ އޮފީހުން ކޮންމެ ދުވަހަކު ބާއްވަމުން އަންނަ ޑެއިލީ ބްރީފިންގައި ފިރުޒުލް ވިދާޅުވީ, އިންތިޚާބީ ރައީސް ހުވާ ކުރުމުގެ ރަސްމިއްޔާތަކީ ޤާނޫނުގައި ބުނާ ގޮތުންނަމަ ރައްޔިތުންގެ މަޖިލީހުގެ ޖަލްސާއެއް ކަމަށްވާތީ, އެ ރަސްމިއްޔާތުގެ ކަންކަން ބަލަހައްޓަވަމުން ގެންދަވަނީ ރައްޔިތުންގެ މަޖިލީހުގެ ރައީސް ކަމަށެވެ.
ފިރުޒުލް ވިދާޅުވީ, އިންތިޚާބީ ރައީސްގެ އެދިލެއްވުމުގެ މަތިން, އެ ރަސްމިއްޔާތު ބޭއްވުމަށް މަސައްކަތް ކުރަމުން އަންނަނީ ނޮވެންބަރު މަހުގެ 17 ވަނަ ދުވަހު ހަވީރު ޖުމްހޫރީ މައިދާނުގައި ކަމަށެވެ. އަދި ރައީސް އެދިލެއްވި ގޮތަށް ކަންތައް ތަރުތީބުވަމުން އަންނަ ކަމުގެ ޔަޤީންކަން މަޖިލީހުން ދީފައިވާ ކަމަށް ވެސް ފިރުޒުލް ވިދާޅުވިއެވެ.
ފިރުޒުލް އިތުރަށް ވިދާޅުވީ, މޫސުންތަން ނުދިނުންފަދަ މައްސަލައެއް ދިމާނުވެއްޖެނަމަ, އޯޕަން އޭރިއާއެއްގައި ޖަލްސާ އޮންނާާނެ ކަމަށެވެ.
އިންތިޚާބީ ރައީސް, ޑރ. މުއިއްޒު މީގެ ކުރިން މީޑިއާއަކަށް ދިން އިންޓަރވިއުއެއްގައި ވިދާޅުވެފައިވަނީ, އެމަނިކުފާނުގެ ހުވާ ކުރުއްވުމުގެ ރަސްމިއްޔާތު ބާއްވަން ބޭނުންފުޅުވަނީ ހުރިހާ ދިވެހިންނަށް ބައިވެރިވެވޭ ގޮތަށް ޖުމްހޫރީ މައިދާނުގައި ކަމަށެވެ.
