ވެރިކަން ބަދަލުވާން 37 ދުވަހަށް ވެފައިވާއިރު ސަފީރުން އައްޔަންކުރުމުން ކަންބޮޑުވުން ފާޅުކޮށްފި
ހިނގަމުންދާ ސަރުކާރު ނިމުމަކަށް އައިސް އާ ސަރުކާރެއްގެ ވެރިކަން ފެށުމަށް މިއޮތް 37 ދުވަހުގެ ތެރޭގައި ސަފީރުން އައްޔަންކުރުންފަދަ ކަންކަން ކުރާކަމުގައިވާނަމަ، އާ ސަރުކާރުގެ މަސައްކަތްތަކަށް ހުރަސްތަކެއް ކުރިމަތިވެގެންދާނެކަމަށް އިންތިޚާބީ ރައީސް ޑރ. މުހައްމަދު މުޢިއްޒުގެ ތަރުޖަމާނު މުޙައްމަދު ފިރުޒުލް ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ފިރުޒުލް ވިދާޅުވީ، މި 37 ދުވަސް ތެރޭގައި އައު މަޝްރޫއުތައް ފަށައި، އާމުވައްޒަފުންތަކެއް ނަގައި އަދި މުސާރަބޮޑުކުރާކަމަށް ވާނަމަ، އާ ސަރުކާރުން ރައްޔިތުންނަށް ވެވަޑައިގެންފައިވަ ވަޢުދުތައް ފުއްދުމާއި އަދި ހަމަ އެހެންމެ އާ ސަރުކާރުގެ މަސައްކަތްތަކަށް ހުރަސްތަކެއް ކުރިމަތިވެގެންދާނެކަމަށެވެ.
މީގެ އިތުރުން، ރައްޔިތުން ނިންމަވާފައި އޮތް ނިންމެވުން ވަރަށް ސާފު ކަމަށާއި ރައްޔިތުން ނިންމާފައިވަނީ މިހާރު ހިނގަމުންދާ ސަރުކާރުން އާ ސަރުކާރަކަށް ރައްޔިތުންގެ ކަންކަން ހަވާލުކުރުން ކަމަށާއި މަޝްރޫއުތައް ހިންގުމާއި، ވުޒާރާތައް ހިންގުމާއި، ދައުލަތުގެ އިދާރާތަކުގެ ސިޔާސަތުތަކާއި މިހުރިހާ ކަމެއްވެސް އާ ގޮތަކަށް ބައްޓަންކޮށް އާ މިސްރާބަކަށް ގެންދިޔުމަކީ ރައްޔިތުންގެ ނިންމުން ކަމަށެވެ.
"ރައްޔިތުންގެ ނިންމުމަކީ މިހާރު ހިނގަމުންދާ ސަރުކާރުން އާ ސަރުކާރަކަށް ރައްޔިތުންގެ ކަންތައްތައް ހަވާލުކުރުން. މަޝްރޫއުތައް ހިންގުމާއި، ވުޒާރާތައް ހިންގުމާއި، ދައުލަތުގެ އިދާރާތަކުގެ ސިޔާސަތުތަކާއި މިހުރިހާ ކަމެއްވެސް އާ ގޮތަކަށް ބައްޓަންކޮށް އާމިސްރާބަކަށް ގެންދިޔުން އެއީ ރައްޔިތުންގެ ނިންމުމަކީ. އެހެންވީމާ މި 37 ދުވަހުގެ ތެރޭގައި އާ މަޝްރޫއުތައް ފަށާކަމުގައިވާނަމަ، އާމުވައްޒަފުންތަކެއް ނަގާކަމަށްވާނަމަ، މުސާރަބޮޑުކުރާކަމަށް ވާނަމަ، މިކަންކަމުގެ ސަބަބުން އާ ސަރުކާރުން ރައްޔިތުންނަށް ވެވަޑައިގެންފައިވާ ވަޢުދުތައް ފުއްދުމާއި އަދި ހަމަ އެހެންމެ އާ ސަރުކާރުގެ މަސައްކަތްތަކަށް ހުރަސްތަކެއް ކުރިމަތިވެގެންދާނެ" ފިރުޒުލް ވިދާޅުވިއެވެ.
"އަދި ހަމަ އެހެންމެ އަޅުގަނޑުމެން ވިސްނާލާއިރުވެސް ވަރަށް ސާފުކޮށް އެނގިވަޑައިގަންނަވާނެ މި 37 ދުވަހުގެ ތެރޭގައި މިކަންކަން ކުރަންޖެހޭ އެއްވެސް ސަބަބެއް އަޅުގަނޑުމެންނަކަށް ފެންނާކަށް ނެތް" ފިރުޒުލް ވިދާޅުވިއެވެ.
ބަންގްލަދޭޝް އާއި ޔޫއޭއީ އަށް އާ ސަފީރުން ކަނޑައަޅަން ރައްޔިތުންގެ މަޖިލިހުގެ ރުހުން ހޯދަން ސަރުކާރުން ހުށަހަޅާފައިވާއިރު މަޖިލީހުން މިއަދު ވަނީ އެ ނަންތައް ދިރާސާ ކުރަން ކޮމިޓީއަށް ފޮނުވައިފައެވެ.
ސަފީރަކަށް ދާން އުޅޭފަރާތަށް އެގޭތޯ 37 ދުވަހުގެ ސަފީރަކަށް ދާން . ދާމީހާ އެކަމަށް ވިސްނަވާ. މުއިއްޒު ހުވާކުރުމަށްފަހު އައްޔަންކުރެވޭނީ މުޅިންވެސް އާމީހުން.