އައު ސަރުކާރުން އަންނަ އަހަރަށް ހުށަހަޅާ ބަޖެޓު އެކުލަވާލާނީ 8 މެންބަރުންގެ ކޮމިޓީއަކުން
އައު ސަރުކާރުން 2024 ވަނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާ ފުރަތަމަ ބަޖެޓު އެކުލަވާލައްވާނީ 8 މެންބަރުން ހިމެނޭ ކޮމިޓީއަކުންކަމަށް އިންތިޚާބީ ރައީސުލްޖުމްހޫރިއްޔާގެ ތަރުޖަމާނު މުހައްމަދު ފިރުޒުލް އަބްދުﷲ ހަލީލް ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ފިރުޒުލް ވިދާޅުވީ، ބަޖެޓުގެ މަސައްކަތަށް އެކުލަވާލީ އަށް މެމްބަރުންގެ ކޮމިޓީއެއް ކަމަށެވެ.
ކޮމިޓީގެ މެންބަރުން:
- މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރު މުހައްމަދު ސައީދު (ޗެއަރ)
- ކުރީގެ ނައިބު ރައީސް އަދި ފިނޭންސް މިނިސްޓަރު އަބްދުﷲ ޖިހާދު
- ކުރީގެ ޓޫރިޒަމް މިނިސްޓަރު މޫސާ ޒަމީރު
- ކުރީގެ ފިނޭންސް މިނިސްޓަރު އަހުމަދު މުނައްވަރު
- އިކޮނިމިކް މިނިސްޓްރީގެ ކުރީގެ ސްޓޭޓް މުހައްމަދު ލުވޭޒް
- އެމްއެމްއޭގެ ކުރީގެ ގަވަނަރު އަހުމަދު ނަސީރު
- ޕެންޝަން އޮފީހުގެ ކުރީގެ ބޯޑު މެމްބަރު އަބްދުލް ހަލީލް އަބްދުއްލަތީފް
- މަޖިލީހުގެ ގުރައިދޫ ދާއިރާގެ މެމްބަރު ޣައްސާން މައުމޫންނެވެ.
ކޮމިޓީގެ މަސައްކަތްތައް ނިމިދިޔަ ހަފްތާގެ ތެރޭގައި ފަށާފައިވާކަން ފާހަގަކުރައްވަމުން ފިރުޒުލް ވިދާޅުވީ، ބަޖެޓު އެކުލަވާލާނީ އިންތިޤާލީ ކޮމިޓީތަކުން މުވައްސަސާތަކަށް ގޮސް އެއްކުރާ މައުލޫމާތުތަކުންނާއި، އިންތިހާބީ ރައީސްގެ 100 ދުވަހުގެ ވައުދުގެ މައްޗަށް ކަމަށެވެ.
އަންނަ އަހަރަށް ލަފާ ކުރާ ދައުލަތުގެ ބަޖެޓު ފާސް ކުރުމަކީ ރައްޔިތުންގެ މަޖިލީހުގައި ދެން ކުރިޔަށް އޮތް އެންމެ މުހިންމު މަސައްކަތަށްވާއިރު މިނިސްޓްރީތަކާއި، މުވައްސަސާތަކާއި ބައްދަލުކޮށް ބަޖެޓާއި ގުޅުން ހުރި ބައްދަލުވުންތައް މިހާރު ކޮމިޓީތަކުން ފަށްޓަވާފައިވާކަމަށް ފިރުޒުލް ފާހަގަކުރެއްވިއެވެ. ނަމަވެސް، ބަޖެޓުގެ ސީދާ އަދަދު ދަންނަވަން ދަތިކަމަށާއި އެ މަސައްކަތް ބިނާވާނީ އެއް ކުރެވޭ މައުލޫމާތުތަކުގެ މައްޗަށްކަމަސް ފިރުޒުލް ވިދާޅުވިއެވެ.
