ފަލަސްޠީނުގެ ޝަހީދުންގެ އަދަދު ފަސްހާހުން މައްޗަށް!
އިސްރާއީލުން ހައްދުފަހަނައަޅައިފައިވާ ޔަހޫދީން ފަލަސްތީނުގެ ޣައްޒާއަށް ދެމުން ގެންދާ ހަމަލާތަކުގައި ޝަހީދުވި ފަލަސްތީނު މީހުންގެ އަދަދު 5،000 އިން މައްޗަށް އަރައިފިއެވެ.
ބައިނަލްއަޤްވާމީ ނޫސްތަކުން ފަލަސްތީނުގެ ކަމާބެހޭ އިދާރާތަކާއި ހަވާލާދީ މިއަދު ހާމަ ކޮށްފައިވާ ގޮތުގައި އިސްރާއިލުން ޣައްޒާއަށް ދެމުންދާ އުދުވާނީ ހަމަލާތަކުގައި މިހާތަނަށް 5،087 މިހުންވަނީ ޝަހީދުވެފައެވެ.
މިގޮތުން ރޭ އެކަނިވެސް އިސްރާއީލުން ދިން ހަމަލާތަކުގައި ފަލަސްތީނުގެ 400 އަށްވުރެ ގިނަމީހުން ޝަހީދުވެފައި ވެއެވެ. ރޭގެ ވަރުގަދަ ހަމަލާ ތަކަކީ، މި ހިނގައިދިޔަ ދެހަފްތާ ތެރޭގައި އިސްރާއީލުގެ އަނިޔާވެރި ހަމަލާތަކުގައި ފަލަސްތީނުގެ އެންމެ ގިނަ މީހުން ޝަހީދުވި ހަމަލާތަކެވެ.
ފަލަސްޠީނުގެ ދިފާޢުގައި މަސައްކަތް ކުރާ ހަމާސް ޖަމާޢަތުގެ ހަމަލާތަކުގައި، މިހާތަނަށް އިޒްރޭލުގެ 1،405މީހުން މަރާލާފައިވާއިރު އޭގެ ތެރޭގައި 307 ސިފައިންނާއި 57 ޕޮލިސް އޮފިސަރުން ހިމެނެއެވެ.
ފަލަސްޠީނުގެ 5000އަށްވުރެ ގިނަ މީހުން ޔަހޫދީން ޝަހީދުކޮށްލިއިރު، އޭގެ ތެރޭގައި 2055 ކުޑަކުދިންނާއި 1،119 އަންހެނުން ހިމެނެއެވެ.
އަދި 15،273 މީހަކު ވަނީ ޒަޚަމްވެފައެވެ. އޭގެ ތެރޭގައި 2،000 ކުޑަކުދިންނާއި 1،400 އަންހެނުން ހިމެނެއެވެ. މީގެ އިތުރުން،ބޣައްޒާއިން 1،400 މީހަކު ވަނީ ގެއްލިފައެވެ. އޭގެ ތެރޭގައި 720 ކުޑަކުދިން ހިމެނެއެވެ.
