އިންތި ވިދާޅުވަނީ ފަލަސްޠީނުގެ މައްސަލައިގައި ދުނިޔެ އޮތީ ނިދާފައި ކަމަށް
ފަލަސްޠީނުގެ މައްސަލައިގައި ދުނިޔެ ފެންނަނީ ނިދާފައި އޮތް ކަހަލަ ގޮތަކަށް ކަމަށް ވިދާޅުވެ، ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ(އިންތި) ކަންބޮޑުވުންފާޅުކުރައްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން އިންތި ވިދާޅުވީ މީގެ 18 ވަރަކަށް ދުވަސް ކުރިން، އިޒްރޭލުގެ ޔަހޫދީންނަށް ހަމާސްއިން ހަމަލާ ދިނުމުން މުޅި ދުނިޔެވެސް އެކަން ކުށްވެރި ކުރި ކަމަށާއި، ނަމަވެސް މިހާރު ފެންނަނީ މުޅިން އެހެން މަންޒަރެއް ކަމަށާއި، މި މައްސަލައިގައި ދުނިޔޭގެ ޑަބަލް ސްޓޭންޑަޑް ފެންނަމުންދާ ކަމަށެވެ.
"އދ އިން ފޮނުވާފައި ތިބޭ އެއިޑް ޖަމާއަތްތަކަށް ވެސް ހަމަލާ ދޭތަން މި ފެންނަނީ." އޭނާ ވިދާޅުވިއެވެ.
ފަލަސްޠީނުގެ ރައްޔިތުންނަށް އަނިޔާ ދެމުން އަންނައިރު، ދުނިޔޭގެ ޤައުމުތަކުގެ ދެފުށް ކެހެރިކަން ފެންނަ ކަމަށް ވެސް އޭނާ ވިދާޅުވިއެވެ.
"ހަމަ ދުނިޔެ ނިދަން އޮތް ކަހަލަ ގޮތަކަށް އަޅުގަނޑުމެންނަށް މި ފެންނަނީ. ހަމަ ސީދާ ޑަބަލްސްޓޭންޑަޑް، ދެފުށްކެހެރިކަން އަޅުގަނޑުމެންނަށް ފެންނަމުން ދަނީ."
ޔަހޫދީންގެ ހަމަލާތަކުގައި ޝަހީދުވި ފަލަސްޠީނުގެ ރައްޔިތުންގެ އަދަދު 6000އާއި ގާާތްކުރާއިރު، އޭގެތެރޭގައި 3000 ކުޑަކުދިން ހިމެނެއެވެ.
