މަޖިލީހުގައި ހިންގަމުންދާ ހަރަކާތަކީ 7 ފެބްރުއަރީގައި ހިންގި ކަހަލަ ބަޤާވާތެއްގެ ފެށުން: ޝިފާޒް
މަޖިލީހުގައި މިހާރު ހިންގަމުންދާ ހަރަކާތަކީ 7 ފެބްރުއަރީގައި ހިންގި ކަހަލަ ބަޢާވާތެއްގެ ފެށުންކަމަށް އެމްޑީޕީގެ ކުރީގެ ނައިބު ރައީސް މުޙައްމަދު ޝިފާޒު ވިދާޅުވެއްޖެއެވެ.
ޝިފާޒް މިހެން ވިދާޅުވެފައިވަނީ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެންދެވޭތީ އެކަމާ ގުޅިގެން އެމްޑީޕީން ހިތްހަމަނުޖެހުން ފާޅުކޮށްމަޖިލީހުގައި މިއަދު އަޑު އުފުލާފައިވަނިކޮށެވެ.
އެކަމާއި ގުޅިގެން ޝިފާޒް ކުރެއްވި ޕޯސްޓެއްގައި ވިދާޅުވީ، މިއީ 7 ފެބްރުއަރީގައި ހިންގި ކަހަލަ ބަޢާވާތެއްކަމަށާއި އޭރުވެސް އެކަން ހިންގީ ކޮމާންޑް ސެންޓަރުން އަންގައިގެންކަމަށެވެ.
"އޭރުވެސް އެކަން ހިންގީ ކޮމާންޑް ސެންޓަރުން އަންގާ އެންގުމަށް، މިހާރުވެސް މިކަން ހިންގަނީ އެމަގުން" ޝިފާޒު ވިދާޅުވެފައިވެއެވެ.
މަޖިލީހުގެ އެމްޑީޕީއަށް ނިޞްބަތްވާ ބައެއް ބޭފުޅުން ވަނީ މިއަދު މަޖިލީހުގެ އިދާރާގައި އަޑު އުފުލާފައެވެ. ބެނާ ހިފައިގެން އެމްޑީޕީގެ ޕީޖީ ގްރޫޕުން އަޑުއުފުލާފައިވާއިރު، އެ ބެނާގައި ރައީސް ނަޝީދަށް އިތުބާރު ގެއްލިފައިވާކަމާއި، އިތުބާރު ގެއްލުމުން އެންމެ ރަނގަޅު ގޮތަކީ އަމިއްލަފުޅަށް އިސްތިއުފާ ދެއްވުންކަމަށް ލިޔެފައިވެއެވެ.
އެމްޑީޕީން ސުޕްރީމް ކޯޓަށް ހުށަހެޅި މައްސަލާގައި އެދިފައިވަނީ ދެ ކަމަކަށެވެ. އެއީ، މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ ތާވަލުކުރާ ޖަލްސާއަށް ނައިބު ރައީސަށް ވަޑައިނުގެންނެވޭ ހާލަތުގައި، މަޖިލީހުގެ ގަވައިދުގެ 44 ވަނަ މާއްދާ އަށް އަމަލު ކުރަންޖެހޭ ގޮތަށް މާނަކޮށްދިނުމަށެވެ.
އަދި ދެވަނަ ކަމަކަށް އެދިފައިވަނީ، މަޖިލީހުގެ ރައީސްގެ އިތުބާރު ނެތް ކަމުގެ މައްސަލާގައި ގޮތެއް ނިންމުމަށްފަހު ނޫނީ މަޖިލީހުގެ އެހެން އެއްވެސް މަސައްކަތެއް ކުރިއަށް ނުގެންދެވޭނެ ކަމަށް މާނަކޮށްދިނުމަށެވެ.
މަޖިލީހުގެ ރައީސްގެ އިތުބާރު ނެތް ކަމުގެ މައްސަލައިގެ ރިޔާސަތު ބަލަހައްޓަވާނީ މަޖިލީހުގެ ނައިބު ރައީސްކަމަށް މަޖިލީހުގެ ގަވައިދު ބުނާއިރު، މަޖިލީހުގެ ނައިބު ރައީސް ވަޑައިނުގަންނަވާ ހާލަތެއްގައި ވާނެ ގޮތެއް ޤަވާއިދުގައި ސާފުކޮށް ބުނެފައެއް ނެތެވެ.
ތިޔަ ހާމަކުރީ 7 ފެބްރުއަރީގައި ހިންގި ބަޣާވާތް ރާވައި ހިންގީ އެންޑީޕީން ކަމަށް.