ރައްޔިތުންގެ އިތުބާރު ގެއްލޭ ގޮތަށް އަވަސް އަރުވާލައިގެން ފްލެޓުތައް ހަވާލުކުރުމުގެ މަސައްކަތް ނުކުރެއްވުމަށް ޑރ. މުޢިއްޒު ގޮވައިލައްވައިފި

ރައްޔިތުންގެ އިތުބާރު ގެއްލޭ ގޮތަށް، އަވަސް އަރުވާލައިގެން ފްލެޓުތައް ޙަވާލުކުރުމުގެ މަސައްކަތްތައް ނުކުރެއްވުމަށާއި އަދި އެ މަސައްކަތް މަޑުޖައްސާލެއްވުމަށް އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.
ޑރ. މުޢިއްޒުގެ ތަރުޖަމާނު، މުޙައްމަދު ފިރުޒުލް މިއަދު ނޫސްވެރިންނާއި ބައްދަލުކުރައްވަމުން ވިދާޅުވީ މި ސަރުކާރުން ގެދޮރުވެރިޔާ މަޝްރޫޢުގެ ދަށުން ފްލެޓާއި ގޯތި ދޫކުރަން ކުރާ މަސައްކަތްތަކާއި ގުޅިގެން އާންމުންގެ އެތައް ބައެއްގެ ޝަކުވާ އިންތިޚާބީ ރައީސުލްޖުމްހޫރިއްޔާގެ އޮފީހަށްވެސް ލިބެމުންދާކަމަށެވެ.
އަދި އެ ޝަކުވާތައް މައިގަނޑުގޮތެއްގައި ގުޅިފައިވަނީ ގެދޮރުވެރިޔާ މަޝްރޫޢުގެ ދަށުން ދޭން ހަމަޖައްސާފައިވާ 4000 ފްލެޓަށް އެދުނު މީހުންނަށް ޕޮއިންޓް ދީފައިވާ ގޮތާއި އަދި ޖުމްލަކޮށްވެސް އެ މަސައްކަތް ކޮށްފައިވާ ގޮތާއިމެދުކަމަށެވެ.
"މިހާރު މަސައްކަތް ކުރިއަށްދާ 4000 ފްލެޓް އެލޮކޭޓްކުރުމުގެ މަޝްރޫޢުގެ މަސައްކަތްތަކާއި ގުޅޭގޮތުން ވަރަށް ބޮޑެތި ކަންބޮޑުވުންތަކާއި ވަރަށް ގިނަ ޝަކުވާތައް އިންތިޚާބީ ރައީސުލްޖުމްހޫރިއްޔާގެ އޮފީހަށްވެސް ލިބެމުންދޭ" ފިރުޒުލް ވިދާޅުވިއެވެ.ފިރުޒުލް ވިދާޅުވީ އެ ޝަކުވާތަކާއެކު އޭސީސީންވެސް ބައެއް ކަންކަން މަޑުޖައްސާލުމަށް މި ސަރުކާރަށް އަންގާފައިވާއިރު ޑރ. މުޢިއްޒުވެސް އެދިވަޑައިގަންނަވަނީ އެ މަސައްކަތް އަވަސް އަރުވާލައިގެން ނުކުރެއްވުމަށް ކަމަށެވެ. "އިންތިޚާބީ ރައީސުލްޖުމްހޫރިއްޔާގެ ގޮވާލެއްވުމަކީ، އަދި ހަމައެހެންމެ އެދިވަޑައިގަތުމަކީ މި މަސައްކަތާއި ގުޅޭގޮތުން މިހާ ބޮޑެތި ކަންބޮޑުވުންތަކެއް އަދި މިހާ ގިނަ ޝަކުވާތަކެއް ހުރި އިރު، އަވަސް އަރުވާލައިގެން މި މުއްދަތުގެ ތެރޭގައި މުޅި ޕްރޮސެސްއާ ދޭތެރޭ އެއްވެސް އިތުބާރެއް ނެތްގޮތަށް އަވަސް އަރުވާލައިގެން ކުރިއަށް ގެންގޮސް ނިންމުމަކީ އެއީ ވަރަށް ގިނަ މައްސަލަތަކަށް މަގުފަހިވާނެކަމެއް ކަމަށް ވާތީވެ، އޭސީސީންވެސް ލަފާ އަރުވާފާވާގޮތަށް، އަދި އާ ސަރުކާރު ފެށުމާ ދެމެދު 9 ވަރަކަށް ދުވަސް އޮތްއިރު، މި ކުރުމުއްދަތުގެ ތެރޭގައި އަވަސް އަރުވާލައިގެން މި މަސައްކަތް ނިންމާ ފްލެޓްތަކުގެ ލިޔުން ނުވަތަ ފްލެޓް ހަވާލުކުރަން މަސައްކަތްކުރުމުގެ ބަދަލުގައި އެކަން މަޑުޖައްސާލައި އާ ސަރުކާރަށް އެ މަސައްކަތް ރަނގަޅަށް ކުރިއަށް ގެންދިޔުމަށް ޖާގަ ދެއްވަން އެއީ އިންތިޚާބީ ރައީސުލްޖުމްހޫރިއްޔާގެ ގޮވާލެއްވުން" ފިރުޒުލް ވިދާޅުވިއެވެ. ނޮވެންބަރު 4 ގައި އާންމުކުރި ފްލެޓް ލިސްޓުގައި, ފުރަތަމަ ބުރުގައި 4,000 ފްލެޓް ލިބޭ މީހުން ކަނޑައަޅާފައި ވަނީ ދީފައިވާ ޕޮއިންޓުންނެވެ. އެކަމާ ގުޅިގެން ގިނަ ބަޔަކު ކަންބޮޑުވުން ފާޅުކުރަމުންދާއިރު, ހައުސިން މިނިސްޓްރީއަށް ގޮސް ބަޔަކު އިހުތިޖާޖުވެސް ކޮށްފައި ވެއެވެ. މީގެ ކުރިން ނެރުނު ފްލްޓުގެ ވަގުތީ ލިސްޓުގައި ޕޮއިންޓު ދީފައެއް ނުވެއެވެ. ޝަކުވާ ހުށަހެޅުމުގެ ފުރުސަތު ހުޅުވާލާފައިވަނީ މިމަހުގެ ނުވަވަނަ ދުވަހުގެ ހަވީރު 4:00 ގެ ނިޔަލަށެވެ. މި ލިސްޓު އާންމުކޮށްފައި ވަނީ އުސޫލުން ބޭރުން, ކޮރަޕްޝަން އެކުލެވޭހެން 4,000 ފްލެޓް ބަހާލަން އުޅޭކަމުގެ ތުހުމަތުގައި އޭސީސީއަށް މައްސަލަ ހުށަހަޅާފައި ވަނިކޮށެވެ. އެ މައްސަލަަ މިހާރު ވަނީ އޭސީސީގައި ރަޖިސްޓްރީ ވެސް ކޮށްފައެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.