ޙުކުމް އިއްވީމަވެސް ރައީސް ނަޝީދު ވިސްނަވަނީ މަޤާމުގައި ބައްދައިގެން އޮންނަން: ރޮޒައިނާ
ސުޕްރީމް ކޯޓުން ޙުކުމް އިއްވެވީމަވެސް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިސްނަވަނީ މަޤާމުގައި ބައްދައިގެން އޮންނަވަންކަމަށް މަޖިލީހުގެ އައްޑޫ މީދޫ ދާއިރާގެ މެމްބަރު، ރޮޒައިނާ އާދަމް ވިދާޅުވެެއްޖެއެވެ.
ރޮޒައިނާ މިހެން ވިދާޅުވެ އެކްސްގައި ކުރެއްވި ޕޯސްޓެއްގައި ވިދާޅުވީ، އިންތިޚާބީ ރައީސް ޑރ. މުޙައްމަދު މުޢިއްޒު ހުވާކުރެއްވުމުގެ ރަސްމިއްޔާތަށް 7 ދުވަސް ވެފައިވާއިރު، މި 7 ދުވަސް ވަންދެން މަޖިލީހުގައި އެމަނިކުފާނުގެ އިތުބާރު ނެތްކަމުގެ މައްސަލަ ހިފަހައްޓަވަން ރައީސް ނަޝީދު މަސައްކަތްކުރައްވާކަމަށެވެ.
މަޖިލީހުގެ ވަޓްސްއެޕް ގުރޫޕުގައި ރައީސް ނަޝީދު ފޮނުއްވި މެސެޖުތަކެއް ކަމަށް ވިދާޅުވެ ރޮޒައިނާވަނީ އެކްސްގައި އެ ޗެޓްލޮގްގެ ފޮޓޯތައްވެސް ހިއްޞާކުރައްވާފައެވެ.
މީގެ އިތުރުން، ރޮޒައިނާ ވިދާޅުވީ، ފަނޑިޔާރުންނަށްވެސް ރައީސް ނަޝީދު ދޫނުދެއްވާކަމަށާއި، އެބޭފުޅުންނަށްވެސް މަލާމާތްކުރައްވާފައިވާކަމަށެވެ.
ރައީސް ނަޝީދުގެ އިތުބާރު ނެތްކަމުގެ މައްސަލައިގެ ޙުކުމް މިއަދު އިއްވާފައިވާއިރު، ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް އެޖެންޑާ ކުރާ ޖަލްސާއެއްގެ ރިޔާސަތުގައި މަޖިލީހުގެ ނާއިބު ރައީސް ފިޔަވައި އެހެން މީހަކަށް ރިޔާސަތު ބެލެހެއްޓޭނެ ކަމަށް ސުޕްރީމް ކޯޓުން ވިދާޅުވެފައިވެއެވެ.
ސުޕްރީމް ކޯޓުގެ ޙުކުމުގައި ރައީސް ނަޝީދުގެ އިތުބާރު ނެތް ކަމުގެ ޤަރާރު މަޖިލީހުގައި ކުރިއަށް ނުދިޔުމަކީ އިންތިހާބީ ރައީސް ޑރ. މުޙައްމަދު މުޢިއްޒުގެ ހުވާ ކުރެއްވުމަށް އެއްވެސް ހުރަހެއް އެޅޭނެ ކަމެއް ނޫން ކަމަށް ބަޔާންކޮށްފައިވެއެވެ.
އެކަމާއި ގުޅިގެން ރައީސް ނަޝީދު ވަނީ، އިންތިޚާބީ ރައީސްގެ ހުވާކުރެއްވުމުގެ ޖަލްސާ ހުއްޓުވަން އެމްޑީޕީން ރޭވި ރޭވުން ފެއިލްވެއްޖެކަމަށް ވިދާޅުވެ މާތްﷲ އަށް ޙަމްދުކުރައްވާފައެވެ.
ސުޕްރީމް ކޯޓުގެ ޙުކުމާއި ގުޅިގެން ރައީސް ނަޝީދު ވިދާޅުވީ އެމްޑީޕީން މަސައްކަތްކުރެއްވީ ޑރ. މުޢިއްޒުގެ ހުވާކުރުމުގެ ރަސްމިއްޔާތު ހުއްޓުވަން ކަމަށާއި އެ ރޭއްވުން ފެއިލްވެއްޖެކަމަށެވެ.
"އިންތިޚާބީ ރައީސްގެ ހުވާކުރެއްވުމުގެ ޖަލްސާ ހުއްޓުވުމަށް އެމްޑީޕީން ރާއްވަވަމުންދިޔަ ރޭއްވުން ފެއިލްވިކަމަށްޓަކައި މާތްﷲ އަށް ޙަމްދުކުރަން" ރައީސް ނަޝީދު ވިދާޅުވިއެވެ.
އަދި ޑރ. މުޢިއްޒުގެ ހުވާކުރުމުގެ ރަސްމިއްޔާތު ދާނީ ރީތިކޮށްކަމަށްވެސް އެމަނިކުފާނު ވިދާޅުވިއެވެ.
ރައީސް ނަޝީދު މިހެން ވިދާޅުވުމުން، އެކަމާއި ގުޅިގެންވެސް ރޮޒައިނާ ވަނީ އެމަނިކުފާނަށް ރައްދުދެއްވާފައެވެ. ރޮޒައިނާ ވިދާޅުވީ، އިތުބާރުނެތް ރައީސް އެ ރަސްމިއްޔާތުގައި ނެތްނަމަ އެކަން ދާނީ ރީތިކޮށް ކަމަށެވެ. އަދި ވޯޓަށް ފިއްލަވައިގެން ކިހާ ދުވަހަކު ރައީސް ނަޝީދަށް އުޅެއްވިދާނެތޯ ރޮޒައިނާވަނީ ސުވާލުކުރައްވާފައެވެ.
އެމްޑީޕީން ސުޕްރީމް ކޯޓަށް ހުށަހެޅި މައްސަލަ ބައްލަވާ ސުޕްރީމް ކޯޓުގެ ބެންޗުގެ ރިޔާސަތުގައި އިންނެވި ފަނޑިޔާރު މަހާޒު އަލީ ޒާހިރު ވިދާޅުވީ ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް އެޖެންޑާ ކުރާ ޖަލްސާއެއްގެ ރިޔާސަތު ބެލެހެއްޓޭނީ ހަމައެކަނި ރައްޔިތުންގެ މަޖިލީހުގެ ނާއިބު ރައީސަށް ކަމަށް ކަނޑައަޅައި، އެ މައްސަލަ ރައްޔިތުންގެ މަޖިލީހުން ކުރިއަށް ނުގެންދަން ނިންމާފައިވަނީ ގާނޫނުއަސާސީއާ ޚިލާފަށް ކަަމަށް ދެކެވަޑައިގަންނަވާ ކަމަށެވެ.
Ads by STO
