ޑރ. މުޢިއްޒަކީ އެއްވެސް މީހަކާމެދު ހަސަދަވެރިވެ ނޫނީ ބަދަލުހިފުމުގެ ރޫޙެއް ގެންގުޅުއްވާނެ ބޭފުޅެއްނޫން: މެޑަމް ސާޖިދާ

އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަކީ އެއްވެސް މީހަކާމެދު ހަސަދަވެރިވެ ނުވަތަ ބަދަލުހިފުމުގެ ރޫޙެއް ގެންގުޅުއްވާނެ ބޭފުޅެއްނޫންކަމަށް އެމަނިކުފާނުގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.
ޖުމްހޫރީ ދުވަހުގެ މުނާޞަބަތުގައި ޓީވީއެމްއިން ކުރިއަށްގެންދިޔަ "ދިވެހިންގެ ރާއްޖެ" ޕްރޮގްރާމްގައި ޑރ. މުޢިއްޒުއަށް ފޯރުކޮށްދެއްވި މެސެޖެއްގައި ސާޖިދާ ވިދާޅުވީ އެމަނިކުފާނަކީ ވިދާޅުވާ ކޮންމެ ކަމެއް ކުރައްވަން މަސައްކަތްކުރައްވާނެ ބޭފުޅެއްކަމަށާއި އެމަނިކުފާނާމެދު އެވަރުގެ ޔަޤީންކަމަކާއި ކަށަވަރުކަމެއް އޮންނަކަމަށެވެ.
އަދި ދިވެހިރާއްޖޭގެ ރައީސުލްޖުމްހޫރިއްޔާ ކަމުގައި ހުންނަވާއިރު، ރައްޔިތުންނަށްޓަކައި އެމަނިކުފާނު ވެދެއްވި ހުރިހާ ވަޢުދެއްވެސް ދަޢުލަތުގެ މާލީ ހާލަތު ހުރި މިންވަރަކުން ފުއްދަވާނެކަމަށާއި އެމަނިކުފާނަކީ ކުރައްވާ މަސައްކަތްތަކަށް އިޚްލާސްތެރި "ކޮމިޓެޑް" ބޭފުޅެއްކަމަށެވެ.
ސާޖިދާ ވިދާޅުވީ، އެކަމަނާގެ މުޅި ޙަޔާތުގައިވެސް ޑރ. މުޢިއްޒުހާ ކެތްތެރި ބޭފުޅެއް ދެކެވަޑައިނުގަންނަވާކަމަށާއި އެމަނިކުފާނަށް މިއަދު މަސައްކަތުގެ ދާއިރާއިންވެސް މިހިސާބަށް ވަޑައިގެންނެވުނީ އެ ސިފަފުޅުގެ ސަބަބުންކަމަށެވެ.
އަދި ޑރ. މުޢިއްޒުއަކީ ކަންކަން ކުރައްވަވާއިރު ވަރަށް މަޑުމައިތިރިކަމާއެކު، ވިސްނުންތެރިކަމާއެކު ހުރިހާ ބޭފުޅުންގެވެސް މަޝްވަރާއާއި އިރުޝާދާއެކު އެކަމެއް އެންމެ ރަނގަޅަށް ކުރެއްވުމަށް މަސައްކަތްކުރައްވާ ބޭފުޅެއްކަމަށާއި އެއީ މައިންބަފައިންނަށްވެސް އިޚްތިރާމްކުރެއްވުމުގައި ލާމަސީލު މިސާލެއްކަމަށެވެ.
ޑރ. މުޢިއްޒުއަކީ ތުއްޕުޅުއިރުން ފެށިގެންވެސް މައިންބަފައިންގެ ބަސް އަޑުއައްސަވާ އަދި އެއްވެސް އިރަކު އެއްވެސް މީހެއްގެ ޙައްޤަކަށް އަރުއްވާނެ ބޭފުޅެއް ނޫންކަމަށް ފާހަގަކުރައްވަމުން ސާޖިދާ ވިދާޅުވީ ޑރ. މުޢިއްޒުއަށް އެހެން މީހަކު އިހާނެތި ކަމެއް ކުރިނަމަވެސް، އެ މީހަކާމެދުވެސް ބަދަލު ހިފުމުގެ ރޫޙެއް އެމަނިކުފާނު ނުގެންގުޅުއްވާނެކަމަށެވެ.
"އެއްވެސް މީހަކާމެދު ހަސަދަވެރިކަމެއް ނޫނީ ނަފްރަތެއް ނޫނީ ބަދަލުހިފުމުގެ ރޫހެއް ނުވަތަ އެފަދަ އެއްވެސް ކަމެއް ނުގެންގުޅުއްވާނެ" ސާޖިދާ ވިދާޅުވިއެވެ.
ހަމައެއާއެކު، އެމަނިކުފާނަކީ މަސައްކަތްތެރިންދެކެ ލޯބިފުޅުވާ ބޭފުޅެއްކަމަށްވެސް ސާޖިދާ ވިދާޅުވިއެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.