މުޢިއްޒުގެ ފުރަތަމަ 100 ދުވަސް: މަސްވެރިންނަށް ފަސޭހައިން އައިސް ލިބޭނެ އިންތިޒާމު ހަމަޖައްސައިދޭނެ
އިންތިޚާބީ ރައީސް ޑރ.މުޙައްމަދު މުޢިއްޒުގެ ވެރިކަމުގެ އެންމެ ފުރަތަމަ 100 ދުވަހުގެ ތެރޭގައި މަސްވެރިންނަށް ފަސޭހައިން އައިސް ލިބޭނެ އިންތިޒާމު ހަމަޖައްސައިދިނުމުގެ މަސައްކަތް ފަށަން އަމާޒު ހިފައިފިއެވެ.
ދަރުބާރުގޭގައި ބޭއްވި ހާއްސަ ރަސްމިއްޔާތެއްގައި "ހަފްތާ 14″ ނަމުގައި މި މަގު ޗާޓް އިފްތިތާހް ކުރެއްވީ އިންތިހާބީ ރައީސް މުއިއްޒެވެ. އެ މަގު ޗާޓުގައި 161 ވައުދު ފުރިހަމަކުރުމަށް ހިމެނެއެވެ. އެ ޗާޓުގެ މަސައްކަތް ބަހާލާފައިވަނީ އަށް ދާއިރާއަކަށެވެ.
އެ ދާއިރާތަކުގެ ތެރޭގައި ހިމެނެނީ މިނިވަންކަމާއި ސިޔާދަތު, އިސްލާމް ދީނާއި ގައުމިއްޔަތު
ގެދޮރުވެރިކަމާއި އުމްރާނީ ތަރައްގީ, އިގްތިސާދާއި ތިމާވެށި އަންހެނުން، ޒުވާނުން، ފަންނިއްޔާތު އަދި ކުޅިވަރު, ސިއްހީ ދުޅަހެޔޮކަމާއި އޯގާތެރި މުޖުތަމައު, ތައުލީމާއި ތަމްރީނު އަދި ސަރުކާރުގެ ސިޔާސަތާއި ގާނޫނީ އިސްލާހެވެ.
އިންތިޚާބީ ސަރުކާރުގެ ފުރަތަމަ 14 ހަފްތާ ތެރޭގައި މަސްވެރިކަން ކުރިއަރުވަން މަސައްކަތް ފަށާއިރު، ފަސޭހައިން އައިސް ލިބޭނެ އިންތިޒާމު ހަމަޖެއްދުމުގެ އިތުރުން މަސްވެރިންގެ ގައުމީ ދަފްތަރެއް އެކުލަވާލުމުގެ ގޮތުން ދަފްތަކުގައި ރަޖިސްޓްރީވުމުގެ ފުރުސަތުވެސް 14 ވަނަ ހަފްތާގައި ހުޅުވާލާނެއެވެ.
އެ ޙަފްލާގައި ވާހަކަފުޅުދައްކަވަމުން އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވީ، މި މަގުޗާޓަކީ ފުރަތަމަ 14 ހަފްތާގައި ކުރައްވާނެ ކަންކަން ކަމަށެވެ. ނަމަވެސް މިއީ ހަމައެކަނި ކުރައްވާނެ ކަންކަން ނޫންކަމަށެވެ. ބަޖެޓާއި ޢާމްދަނީ ހޯދޭ ގޮތާއި އެކީގައި 14 ހަފްތާގެ ޕްލޭންގައި ހިމެނޭ ކަންކަމުގެ އިތުރަށްވެސް ކަންކަން ކުރެވިގެންދާނެކަމަށް އިންތިޚާބީ ރައީސް ވަނީ ވިދާޅުވެފައެވެ.
Ads by STO
