މިނިސްޓަރު ޒަހާ ވަޒީރު ކަމުގެ މަސްއޫލިއްޔަތު އަދައެއް ނުކުރައްވާ: ނަޝީދު
ފިޝަރީޒް މިނިސްޓަރު ޒަހާ ވަހީދު ވަޒީރުކަމުގެ މަސްއޫލިއްޔަތު އަދާ ނުކުރައްވާކަން މިހާރު ސާފުވެއްޖެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެެ.
މަސްވެރިކަމާ ބެހޭ ގާނޫނަށް ސެޕްޓެމްބަރު 16، 2019 ގައި އައު އިސްލާހު ތަކާއެކު އަމަލުކުރަން ފެށުމާއެކު އެ އެ ގާނޫނުގައި ބުނާ ގަވައިދުތައް އެ ތާރީޚުން ފެށިގެން ހަ މަސްދުވަހުގެ ތެރޭގައި ހަދަން ޖެހޭ ކަން ފާހަގަ ކުރައްވައި ރައީސް ނަޝީދު ވިދާޅުވީ، އެ ގަވައިދުތައް އަދިވެސް ހަދާފައި ނުވާތީ، މިނިސްޓަރު ޒަހާ ގާނޫނާ ހިލާފުވެފައިވާ ކަމަށް، މައްސަލަ ބެލި ގަވައިދު ކޮމިޓީގެ ރިޕޯޓުގައި އެބައޮތް ކަމަށެވެ.
ކޮމިޓީން އެ މައްސަލަ ބަލައި ވަޒީރުގެ މަސްއޫލިއްޔަތު އަދާ ނުކުރާ ކަމަށް މީގެ ކުރިން ވެސް ކަނޑަ އަޅާފައެވެ. އޭގެ ފަހުން މަސްވެރިކަމުގެ އެ ގަވާއިދުތައް އެކުލަވާލައި ނިންމައި ބަންޑާރަ ނައިބުގެ އޮފީހަށް ލަފައަކަށް އެދި ފޮނުވި ކަމަށް މަޖިލީހަށް ސިޓީއަކުން މިނިސްޓަރ ޒަހާ އެންގެވިއެވެ.
މަޖިލީހުގެ މިއަދުގެ ޖަލްސާގައި ރައީސް ނަޝީދު އަލުން އެ މައްސަލަ ފާހަގަކުރެއްވިއިރު، ވަޒީރުގެ މަސްއޫލިއްޔަތު އަދާ ނުކުރެއްވުމުން ރައްޔިތުންގެ މަޖިލީހުގެ މެންބަރުން އަޅުއްވަން ޖެހޭ ފިޔަވަޅު މެންބަރުންނަށް ވަރަށް ސާފުވާނެ ކަމަށް ނަޝީދު ވިދާޅުވިއެވެ.
"އަޅުގަނޑުމެނަށް މި މައްސަލަ ސަރުކާރުގެ މަސްއޫލިއްޔަތު އަދާ ކުރާ މިންވަރު ބަލާ ކޮމިޓީއަށް ފޮނުވިދާނެ، އެކަމަކު އެ ކޮމިޓީން ވެސް އަނެއްކާ ނިންމަން އޮންނާނީ ވަޒީރުގެ މަސްއޫލިއްޔަތު އަދާ ނުކުރެވޭ ކަމަށް، އަޅުގަނޑު މަޖިލީހުގެ މެންބަރުން އަންގަން އޮތީ ވަޒީރު މަސްއޫލިއްޔަތު އަދާ ނުކުރީމަ ކަން ކުރަން ޖެހޭ ގޮތް ސާފުވާން ވާނެ،" ނަޝީދު ވިދާޅުވި އެވެ.
އެ މަނިކުފާނު އެ ވިދާޅުވީ ބެލެވޭ ގޮތުގައި މިނިސްޓަރު ޒަހާގެ އިތުބާރު ނެތްކަމުގެ ވޯޓެއް ނަގަން ޖެހޭ ވާހަކަ އެވެ.
ޒަހާގެ އިސްތިއުފާ އަށް ރައްޔިތުންގެ މަޖިލިހުގައި އެމްޑީޕީގެ މެމްބަރުން މީގެ ކުރިން އެކި ފަހަރު މަތިން ގޮވާފައި ވެއެވެ.
މައުމޫނު މީނާ އާއި ދެކޮޅަށް ބަހެއް ބުނީމަ މި އުޅެނީ