މަރާމެދު ސަމާސާކޮށް މަޖާކުރުމަކީ ހުތުރު ޢަމަލެއް: ޢަލީ ރަމީޒު
މަރާއިމެދު ސަމާސާކޮށް މަޖާކުރުމަކީ ހުތުރު ޢަމަލެއް ކަމަށް ކުރީގެ ލަވަކިޔުންތެރިޔާ އަދި މިހާރު ދީނީ އަގުހުރި ނަސޭޙަތް ދެއްވަމުން ގެންދަވާ ޢަލީ ރަމީޒު ވިދާޅުވެއްޖެއެވެ.
ޢަލީ ރަމީޒު އޭނާގެ ރަސްމީ ފޭސްބުކް އެކައުންޓުގައި މިއަދު ކުރެއްވި ޕޯސްޓެއްގައި ވިދާޅުވެފައި ވަނީ ކުރިން މަރުވާނެ މީހުންނާއި ފަހުން މަރުވާނެ މީހުން އެނގޭނީ އިންސާނުންނަކަށް ނޫން ކަމަށާއި އެކަން ދެނެވޮޑިގެންވާނީ މާތް ﷲ ކަމަށެވެ.
މިފަދައިން ޢަލީ ރަމީޒު ވިދާޅުވީ ސީދާ ކޮންކަމަކާއި ގުޅިގެންކަމެއް ހާމަވެފައެއް ނުވެއެވެ.ނަމަވެސް އޭނާ މިފަދައިން ވިދާޅުވެފައި މިވަނީ ކުރީގެ ރައީސް މައުމޫން ޢަބްދުލްޤައްޔޫމް ކޮވިޑް-19 އަށް ފައްސިވުމާއި ގުޅިގެން، ބައެއް މީހުން އެމަނިކުފާނު އަވަހާރަވެދާނެ ކަމަށް މިހާރުވެސް ނިންމާފައިވާ ދަނޑިވަޅެއްގައެވެ.
އެގޮތުން ކާށިދޫ ދާއިރާގެ މެންބަރު ޢަބްދުﷲ ޖާބިރު ވެސް ރައީސް މައުމޫން ފަސްދާނު ލެއްވުމުގެ ކުރިން ތަރިކަ މުދަލުން ޙައްޤުގެ ގޮތުގައި ކިނބިގަސްދޮށުގޭ ރެޖިސްޓްރީ ދިނުމަށް ގޮވާލާފައެވެ.
ޖާބިރުގެ އިތުރުން ވެސް ފޭސްބުކްގައި އެހެން މީހަކު ވަނީ، ރައީސް މައުމޫނަށް ކޮވިޑު ޖެހިމުން އެމަނިކުފާނު އަވަހާރަ ވެދާނެކަމުގެ ފުރުސަތު އިތުރުވެފައިވާ ކަމަށް ބުނެ، އެއީ ރަނގަޅު ކަމެއްގެ ގޮތުގައި ވެސް ސިފަ ކޮށްފައެވެ.
މަރަކީ ކޮންމެ ދިރޭ މަޚްލޫގަކަށް ވެސް ހަމަޔަގީނުން ވެސް ކުރިމަތިވާނެ ކަމެކެވެ. އެމީހަކު މަރުވާނީ ކޮން އިރަކު ކޮން ވަގުތަކު ކަމެއް އެކަކަށް ވެސް ނޭނގޭނެއެވެ.
މީހެއްގެ މަރަށް އެދި މިފަދައިން ވާހަކަ ދައްކާއިރު، އެމީހާއަށް ވުރެ ކުރިން ތިމާއަށް ވެސް މިދުނިޔެ ދޫކޮށް ދާން ޖެހިދާނެކަމަށް ބިރުވެތިވެ ތައްޔާރުވާން ޖެހެއެވެ. ތިމާގެ ބަހާއި ޢަމަލުތައް ރައްކާތެރިވެސް ކުރަން ވާނެ އެވެ.
މާތް ﷲ ވަޙީ ކުރައްވާފައިވެއެވެ.
﴿102﴾ يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنتُم مُّسْلِمُونَ
އޭ إيمان ވެއްޖެ މީސްތަކުންނޭވެ! އެކަލާނގެއަށް تقوى ވެރިވުން حق ވެގެންވާ ގޮތުގައި ތިޔަބައިމީހުން اللَّه އަށް تقوى ވެރިވާށެވެ! އަދި، مسلم ން ކަމުގައިވާ حال ގައި މެނުވީ، ތިޔަބައިމީހުން މަރުނުވާހުށިކަމެވެ!
[އަލް އިމްރާން 102 ވަނަ އާޔަތް]
މީގެ އިތުރުން ވެސް ﷲ ތަޢަލާ ވަޙީ ކުރައްވާފައިވެއެވެ.
﴿185﴾ كُلُّ نَفْسٍ ذَائِقَةُ الْمَوْتِ ۗ وَإِنَّمَا تُوَفَّوْنَ أُجُورَكُمْ يَوْمَ الْقِيَامَةِ ۖ فَمَن زُحْزِحَ عَنِ النَّارِ وَأُدْخِلَ الْجَنَّةَ فَقَدْ فَازَ ۗ وَمَا الْحَيَاةُ الدُّنْيَا إِلَّا مَتَاعُ الْغُرُورِ
ކޮންމެ نفس އަކީވެސް، މަރުގެ ރަހަ ލިބިގަންނާނޭ އެއްޗެކެވެ. އަދި، (ތިޔަބައިމީހުން ކުޅަ عمل ތަކަށް) ތިޔަބައިމީހުންނަށް ފުރިހަމަޔަށް ޖަޒާ ދެއްވާނެކަން ކަށަވަރީ، قيامة ދުވަހުންނެވެ. ފަހެ، ނަރަކައިން އެއްކިބާކުރައްވައި، ސުވަރުގެޔަށް ވެއްދެވި މީހާ (ދަންނާށެވެ!) ފަހެ، އެމީހަކު نصيب ލިބިގެންފިކަން ކަށަވަރެވެ. ކެހިވެރިކަމުގެ ވަގުތީ އުފަލެއް ދޭ އެއްޗެއްކަމުގައި މެނުވީ، ދުނިޔޭގެ ދިރިއުޅުން ނުވެއެވެ.
[އަލް އިމްރާން 185 ވަނަ އާޔަތް]
