ވަޒީރުންނަށް ރުހުން ދިނުމަށް ކޮމިޓީން ފާސްކޮށްފި

ރައީސް ޑރ. މުޙައްމަދު މުޢިއްޒުގެ ކެބިނެޓަށް ރުހުން ދޭން، ރައްޔިތުންގެ މަޖިލީހުގެ ސަރުކާރު މަސްޢޫލިއްޔަތު އަދާ ކުރާ މިންވަރު ބަލާ ކޮމެޓީއިން ފާސްކޮށްފިއެވެ.
މަޖިލިސް ޗުއްޓީގައި އޮތްނަމަވެސް މިއަދު ބޭއްވި ކޮމިޓީގައި ވަނީ ވަޒީރުންނަށް ރުހުން އޮތްތޯ ޖުމްލަކޮށް ވޯޓަށް އަހާފައެވެ. އެގޮތަށް ހުށައެޅުއްވީ އެމްއެންޕީގެ ތިމަރަފުށީ ދާއިރާގެ މެންބަރު ޢަބްދުﷲ ރިޔާޒެވެ. ރިޔާޒުގެ އެ ހުށައެޅުމަށް ތާޢިދުކުރެއްވީ ދަ ޑިމޮކްރެޓްސްގެ އަޙްމަދު ރަޝީދެވެ. ވަޒީރުންނަށް ރުހުން ދޭން ފެންނަކަމަށް ފާސްވީ ޙާޒިރުވެވަޑައިގެންނެވި 10 މެންބަރުންގެ ތެރެއިން 5 މެންބަރުންގެ އަޣްލަބިއްޔަތުންނެވެ. ކޮމިޓީގެ މުޤައްރިރު ވިދާޅުވީ، 5 މެންބަރުންގެ އަޣްލަބިއްޔަތުން ހުރިހާ ވަޒީރުންނަށް ރުހުން ދޭން ފެންނަކަމަށް ފާސްވެފައިވާކަމަށެވެ. އެ ހުށަހެޅުމަށް އެމްޑީޕީގެ މެންބަރުން ވޯޓު ދެއްވައިފައި ނުވާއިރު، އެ ޕާޓީން އެއްވެސް ކޮޅަކަށް ވޯޓު ދީފައެއް ނުވެއެވެ. މި ދައުރުގެ މަސައްކަތްތައް ނިންމާ މަޖިލިސް ޗުއްޓީއަށް ދިޔައިރު އަދިވެސް ވަޒީރުންނަށް ރުހުން ދިނުން އޮތީ ކޮމިޓީ މަރުހަލާގައެވެ.



ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.