މަޖިލިސް އިންތިހާބު ލަސްކުރުމުގެ ބިލު ތަސްދީގުނުކުރާތީ ކުއްލި މައްސަލައެއް
ކުރިއަށް އޮތް ރޯދަމަސް ނިމޭތާ 10 ދުވަސް ފަހުން ރައްޔިތުންގެ މަޖިލީހުގެ އިންތިހާބު ބާއްވާ ގޮތަށް، އިންތިހާބުތަކާ ބެހޭ އާއްމު ގާނޫނަށް ގެނައި އިސްލާހު ތަސްދީގުނުކޮށް ލަސްކުރާތީ، މަޖިލީހަށް ކުއްލި މައްސަލައެއް ހުށަހަޅައިފިއެވެ.
މި ކުއްލި މައްސަލަ ރައްޔިތުންގެ މަޖިލީހަށް ހުށަހަޅާފައިވަނީ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ)އެވެ.
އެ މައްސަލާގައި ބުނެފައިވަނީ އިންތިހާބުތަކާބެހޭ އާންމު ޤާނޫނަށް އިސްލާހުގެނެސް ފާސްކޮށްފައިވާ ބިލު ތަސްދީގުކުރުމަށް ފޮނުވާފައިވާތާ ހަފްތާއަކަށްވުރެއް ގިނަ ދުވަސް ވެފައިވާ ކަމަށާއި ނަމަވެސް މި ބިލު ތަސްދީގުކުރާނެ ކަމުގެ އެއްވެސް އިޝާރާތެއް ލިބިފައިނުވާ ކަމަށެވެ.
އަދި އިންތިހާބު ފަސްކުރުމަށް ޤާނޫނު އިސްލާހުކުރީ ރޯދަ މަހު އިންތިހާބު ބޭއްވުމުން ރައްޔިތުންނަށް ކުރިމަތިވާނެ ދަތިތަކަށް ހަލެއް ހޯދުމަށް ކަމަށާއި އެހެންނަމަވެސް ބިލު ތަސްދީގު ނުކޮށް ހުރުމުން މަޖިލީހުގެ އިންތިހާބު އޮންނާނެ ތާރީހަކާމެދު އޮޅުންބޮޅުން އަރާފަދަ ހާލަތެއްގައި ރައްޔިތުން ތިބޭންޖެހުމަކީ ކަންބޮޑުވާ ކަމެއް ކަމަށެވެ.
