އެކްސިޑެންޓްވުމުން ފިލި ބަޔަކު ހޯދަނީ
ޕާކުކޮށްފައި އޮތް ކާރެއްގައި ޖެހި އެކްސިޑެންޓުވުމުން، ރިޕޯޓުނުކޮށް ފިލި ބަޔަކު ހޯދަން ފުލުހުން ވީޑިއޯއެއް އާންމުކޮށްފި އެވެ.
ފުލުހުން އާންމުކުރި ވީޑިއޯއިން ފެންނަނީ 'ފިނޯ' ސައިކަލެއްގައި ދުއްވާފައި ދިޔަ ޒުވާން ދެ އަންހެން ކުދިން، މަގުގެ އެއްކައިރީގައި ޕާކުކޮށްފައި އޮންނަ ކާރެއްގައި ޖެހި އެކްސިޑެންޓުވި މަންޒަރެވެ.
އެކްސިޑެންޓު ހިނގި ވަގުތު އެ ސަރަހައްދަށް މީހުން އެއްވާ މަންޒަރު ވެސް ވީޑިއޯއިން ފެނެ އެވެ. އޭގެ ފަހުން ފެންނަނީ ރިޕޯޓުނުކޮށް، ވެއްޓުނު ސައިކަލު ނެގުމަށް ފަހު އެ ސަރަހައްދު ދޫކޮށް ދާ މަންޒަރެވެ.
އެ އެކްސިޑެންޓު ހިނގީ ކޮން ސަރަހައްދެއްގައި ކަމެއް ފުލުހުން ހާމައެއް ނުކުރެ އެވެ. މި މައްސަލަ ތަހުގީގުކުރަނީ ހުޅުމަލޭ ފޭސް އެކެއްގެ ޕޮލިސް ސްޓޭޝަނުންނެވެ.
ފުލުހުން ބުނީ ވީޑިއޯއިން ފެންނަ މީހުންނާ ބެހޭ އެއްވެސް މައުލޫމާތެއް އެނގޭނަމަ، ހުޅުމާލެ ފޭސް އެކެއްގެ ޕޮލިސް ސްޓޭޝަންގެ ނަންބަރު 9980062 އަށް ގުޅައި އެކަން ހިއްސާކުރުން އެދޭކަމަށެވެ.
"މިފަދަ މީހުން ހޯދުމުގައި ރައްޔިތުންގެ ފަރާތުން ފުލުހުންނަށް ލިބެމުންދާ އެއްބާރުލުން މިފުރުސަތުގައި ފާހަގަކޮށް ޝުކުރު ދަންނަވަމެވެ." ފުލުހުން ބުނެ އެވެ.
Ads by STO
