ރައީސް ވިދާޅުވީ "ވާނުވާ" ބަންދުގެ މައްސަލަ ހައްލުކުރައްވާނެކަަމަށް
ޝަރީއަތް ނިމެންދެއް ބަންދުކޮށް ދިގުލައިގެންދާ މައްސަލަ "ވާނުވާ ބަންދު"ގެ މައްސަލަ ތަހުގީގު މަރުހަލާ އާއި ގާނޫނަށް ބަދަލުތަކެއް ގެނެސް ހައްލުކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރައީސް އޮފީހުން ސިލްސިލާކޮށް ކުރިއަށްގެންދާ ''ރައީސްގެ ޖަވާބު''ގައި، ވާނުވާ ބަންދުގެ މައްސަލަ އިސްލާހުކުރުމާ ގުޅޭ ގޮތުން އާންމު މީހަކު ކުރި ސުވާލަކަށް ޖަވާބުދެއްވަމުން އެމަނިކުފާނު ވިދާޅުވީ، ވާނުވާ މައްސަލަ ހައްލުކުރުމަށް ގާނޫނަށް ގެންނަން ޖެހޭ ބަދަލުތައް މިހާރު ފަށާފައިވާކަމަށެވެ.
"އިރާދަކުރެއްވިއްޔާ ގާނޫނީ ހައްލެއް ތި މައްސަލައަށް ގެނެވޭނެ ގޮތްތަކެއް ކުރަމުން މިގެންދަނީ. އަދި ތަހުގީގު މަރުހަލާގެ ކަންތައްތައް ވެސް މިހާރަށްވުރެ ރަނގަޅުކުރުމަށްޓަކާ މަސައްކަތްތަކެއް އެބަ ކުރެވޭ" ރައީސް ވިދާޅުވިއެވެ.
ރައީސް ވިދާޅުވީ، ވާނުވާ ބަންދުގެ މައްސަލައަށް ރަނގަޅު ދާއިމީ ހައްލެއް ގެނެސްދެއްވާނެކަމަށެވެ.
ބަންދުގެ މުއްދަތު ދިގުލައިގެން ގޮސްފައިވާ ގިނަ ބަޔަކު ތިބި އިރު، އެ މައްސަލައަށް ހައްލެއް ގެނެސްދިނުމަށް ގިނަ ބަޔަކު އެދެ އެވެ. ވާނުވާ ބަންދުގެ މައްސަލަ ހައްލުކޮށްދެއްވާނެ ކަމަށް ރައީސް މުއިއްޒު ވަނީ ވައުދުވެވަޑައިގެންފައެވެ.
މި މައްސަލަ ހައްލުކުރުމަށް މިހާރު ސަރުކާރުން ވަނީ ކަފާލާތުގެ ދަށުން އިސްތިއުނާފު ނިމެންދެން ބަންދުން ދޫކޮށްލެވޭނެ ހަމަތައް ހިމަނައި، ޖިނާއީ އިޖުރާއަތުގެ ގާނޫނަށް އިސްލާހު ހުށަހަޅާފައެވެ.
