ރާއްޖެ އެތެރެކުރަން އުޅުނު ފަސް ކިލޯގެ ޑްރަގްސް އަތުލައިގަނެފި

ރާއްޖެ އައި ޕާކިސްތާނު މީހެއްގެ ލަގެޖުން 5.30 ކިލޯގެ މަސްތުވާތަކެތި ކަސްޓަމުން އަތުލައިގެންފި އެވެ.
ކަސްޓަމުން ނެރުނު ނޫސްބަޔާނެއްގައި ބުނީ، މިމަހުގެ 12ގައި ގަތަރު ދޯހާއިން ރާއްޖެ އައި ޕާކިސްތާނު މީހެއްގެ ލަގެޖުގައި މަސްތުވާތަކެތި ހުރިކަމަށް ޝައްކު ކުރެވިގެން ބެލި އިރު މަސްތުވާތަކެތިކަމަށް ޝައްކު ކުރެވޭ އެއްޗެއް ފެނުނު ކަމަށެވެ.
މިތަކެތި ބަލައި ފާސްކުރުމުގެ ފުރަތަމަ މަރުހަލާގައި މަސްތުވާތަކެތީގެ ބާވަތެއްކަމަށްވާ "ހެރޮއިން"އަށް ފައްސިވެފައިވާކަމަށް ކަސްޓަމުން ބުނެ އެވެ.
މި ތަކެތީގެ މަގުމަތީގެ އަގަކީ 5،300،000 ދިވެހި ރުފިޔާ އެވެ.
މަސްތުވާތަކެތި އެތެރެކުރި މީހާ މިހާރު ފުލުހުންނާ ހަވާލުކޮށްފައިވާކަމަށް ކަސްޓަމުން ބުނެ އެވެ. މީގެ ކުރިން ވެސް ޕާކިސްތާނުން ރާއްޖެ އައި ގިނަ ބަޔަކު މަސްތުވާތަކެއްޗާ އެކު އަތުލައިގެންފައި ވެއެވެ.
މިދިޔަ ވެރިކަމުގެ ދައުރުގައި ކޮމިޝަނާ އޮފް ޕޮލިސްގެ މަގާމުގައި ހުންނެވި މުހައްމަދު ހަމީދު އޭރު ހާމަކުރެއްވި ގޮތުގައި ޕާކިސްތާނަކީ ރާއްޖެއަށް އެންމެ ގިނައިން މަސްތުވާތަކެތި އެތެރެކުރާ އެއް ގައުމެވެ.